Jěnisis 22
22
1Ediyakind‘ o belombo těkabe tombango, ka Anyambě a yějiyě Ebreham, ka Mâ‐a vâ na ju, na, Ebreham! ka mâ‐a vâ na, Umba nd‘ ekaně.
2Ka Mâ‐a vâ, na, Nângâkâ mwan‘ ’âvě wa momo, w‘ umbâkâ, Aisak, uâvě a tândâkě, na nâvě wa vala o ’hiki ya Moraia; wa vě mâ mwambo omě o ukodi umbâkâ umwamě u ka languwě âvě.
3¶ Ka Ebreham a ’muwa n‘ ubwa n‘ ubwa, ka mâ‐a kahidě buru ’aju ediya, ka mâ‐a nângâ bamo baju ba mawanja babale na mâ, na mwan‘ ’aju wa momo Aisak, ka mâ‐a pěhě leya la mwambo mua botumbakwě, ka mâ‐a ’muwa, na vala o iboko via Anyambě vi langwakiyi mâ.
4O buhwa bwa hwi ’lalo, ka Ebreham a betaně mihâ maju, ka mâ‐a yěně iboko tě yaviděngo.
5Ka Ebreham a vâ na bato baju ba mawanja, na, Diyakani okava na buru; umba na wa mwana ho ka ’landi okaoně ka kaliya, na hwě‐hwa timba pě o inyěni‐o jadi.
6Ka Ebreham a nângâ leya la mwambo mua botumbakwě, ka mâ‐a kahidě lâ o mwan‘ ’aju wa momo Aisak a jadi; ka mâ‐a nângâ veya o ’nâ ’aju, na pavo; ka bâ babale ba vala njamba.
7Ka Aisak a kala na hangwě Ebreham, na, Paia‐o! ka mâ‐a vâ, na, Mwan‘ ’amě, umba nd‘ ekaně. Ka mâ‐a vâ, na, Umbwakiyate veya na leya: ndi mwan‐udâmbě wa mwambo mua botumbakwě a l‘ ove?
8Ka Ebreham a vâ, na, Mwan‘ ’amě, Anyambě a ka kenji Mâ mětě mwan‐udâmbě wa mwambo mua botumbakwě: ka bâ babale ba vala njamba.
9Ka bâ‐ba pâ o iboko via Anyambě vi langwakiyi mâ; ka Ebreham a longa âltar omě, ka mâ‐a kahidě leya batě‐batě, ka mâ‐a kata mwan‘ ’aju wa momo Aisak, ka mâ‐a nangidě mâ oba ya leya o âlta.
10Ka Ebreham a hambidě enâ ’aju, ka mâ‐a nângâ pavo o iweya ja mwan‘ ’aju wa momo.
11Ka enjěl ya Jěhova ya ndiya mâ oviya oba, na, Ebreham! Ebreham! ka mâ‐a vâ, na, Umba nd‘ ekaně.
12Ka Mâ‐a vâ, na, O nangakidě enâ ’vě o mwana a jadi, na nâvě o hake mâ elombo; nandi Mbi yowuděndi na o bangakandi Anyambě, yěněkěte, wu himbidě mwan‘ ’âvě wa momo, mwan‘ ’âvě wa momo wa umbâkâ o Umba‐Mbi jadi.
13Ka Ebreham a betě mihâ maju, ka mâ‐a yěně, na umbwakiyate o mbuhw‘’aju, udâmbě mua momi bweywěngo na mabomba maju o bele: ka Ebreham a vala, ka mâ‐a nângâ udâmbě mua momi, ka mâ‐a tumba mâ mwambo mua botumbakwě o maihana ma mwan‘ ’aju wa momo.
14Ka Ebreham a vangidě dina ja iboko těvině, na, Jěhova‐jairě; pani‐ka yâ e di vânwěngo na bwa buhwa těkabo, E ka kenjwěndi o ukodi mua Jěhova.
15¶ Ka enjěl ya Jěhova ya ndiya Ebreham oviya oba njo y‘ ibale,
16Ka Mâ‐a vâ, na, Na Umba mětě nd‘ uwamě a kaniyedi, o vâkidi Jěhova, ikabojana o hango elombo těkae, nana o ’bě himbiděngo mwan‘ ’âvě wa momo, mwan‘ ’âvě wa umbâkâ:
17O ivambiya nd‘ ijamě i ka vambiyě âvě ibâtâ, na o ivuhě nd‘ ijamě i ka vuhě ibângâ jâvě pani‐ka nyětěti ja oba, na pani‐ka mahě ma jadi o uhěkě mua manga; na ibângâ jâvě i ka pahiyi jâmbě ja baloni baju:
18Na o ibângâ jâvě ndi ja betomba bea he beěhěpi be ka vambanudwě ibâtâ; ikabojana o ndi yokiyango joi jamě.
19Ka Ebreham a timba o mawanja maju ma jadi, ka bâ‐ba ’muwa na vala njamba o Bir‐shiba: ka Ebreham a diya o Bir‐shiba.
20¶ E diyakindi belombo těkabe tombango, ka yâ‐ya langudwě Ebreham, na, Umbwakiyate, Milka a ja tepě mwana‐nyangwě Nehâr bana;
21Uz njad‘ ’aju, na Buz mwana‐nyangwě, na Kamuěl hangwě ya Eram,
22Na Kěsěd, na Hezo, na Pildash, na Yidlaf, na Běthuěl.
23Ka Běthuěl a ja Riběka: logwambi těkalo ndi la Milka lo jaki na Nehâr, mwana‐nyangwě ’a Ebreham.
24Ka mwad‘ ’aju wa elěgě, a diyaki dina, na, Ruma, a ja tepě Teba, na Geham, na Tahash, na Maeka.
Currently Selected:
Jěnisis 22: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
