Jěnisis 21
21
1Ka Jěhova a lumbiya Serah pani‐ka Mâ‐a vâkidi, ka Jěhova a ha Serah nyang‘ ’aju e kalakidi.
2Ka Serah a kaha, ka mâ‐a ja Ebreham mwa‐momo o utodu muaju, o yâ ’gombe tě ya Anyambě e kalaki na ju.
3Ka Ebreham a vangidě dina ja mwa‐momo a jakudwě o mâ‐a jadi, wa Serah a jaki na ju, na, Aisak.
4Ka Ebreham a hěbě mwan‘ ’aju wa momo, Aisak, o mâ‐a diyakidi a bě utodu hwi logwambi, pani‐ka Anyambě a sombiyakidě mâ.
5Ebreham a diyakindi a bě kama ya mepuma utodu, o mwan‘ ’aju wa momo Aisak a jakudwě o mâ‐a jadi.
6¶ Ka Serah a vâ, na, Anyambě nd‘ a di ’mba pangango na mbi yâke, ovaně nd‘ o wěhepi a yokakě a ka yâyě n‘ umba.
7Ka mâ‐a vâ, na, Nj‘ a diyakidi a vâkâ na Ebreham, na, Serah a ka nyangi bana? ikabojana mbi mâ jango mwana o utodu muaju.
8Ka mwana a tombuwa, ka mâ‐a kiyudwě dibě: ka Ebreham a hadě isango iněně o bwâ buhwa tě bwa Aisak bo kiyakudwě dibě.
9¶ Ka Serah a yěně mwana wa Hegar ya Ijipt, uwaju a jakidi na Ebreham, a věhěkě.
10Ovaně nd‘ o mâ‐a vâki na Ebreham, na, Věngěkidě uhaka tě mua mwajo ekamu na mwan‘ ’aju: ikabojana mwa‘ tě wa uhaka tě mua mwajo ekamu à diyake ujigi na mwan‘ ’amě Aisak.
11Ndi elombo těně e diyaki bokolo o mihâ ma Ebreham o pělě ya mwan‘ ’aju.
12Ka Anyambě a vâ na Ebreham, na, E diyake bokolo o mihâ mâvě o pělě ya iwanja tě na o pělě ya uhaka ’muâvě mua mwajo; na beěhěpi bea Serah be jad‘ âvě langwango, yokolakidě joi jaju: ikabojana o Aisak ndi wa ibângâ jâvě i ka tubanwě.
13Nandi, o pělě ya mwana wa uhaka mua mwajo tepě nd‘ uwamě a ka pangě etomba, ikabojana a ndi ibângâ jâvě.
14Ka Ebreham a punda n‘ ubwa, ka mâ‐a nângâ pěmbě, na mbute ya miba, ka mâ‐a vě beâ Hegar, ka mâ‐a kahidě beâ o iběkě jaju, na mwana tepě, ka mâ‐a validě mâ: ka mâ‐a vala, ka mâ‐a lenga na nginga ya Bir‐shiba.
15Ka miba ma diyakid‘ o mbute ma maya, ka mâ‐a nangidě mwana o ibomako ja vilele viâkâ.
16Ka mâ‐a vala, ka mâ‐a diya o pělě ’pâkwě na ju banjaniděngo, yaviděngo pani‐ka mbanja ya epambo ya tebwě: ikabojana a vâki, na, Mbi yěněke pě iwedo ja mwana. Ka mâ‐a diya banjaniděngo na ju, ka mâ‐a betě joi jaju, ka mâ‐a ya.
17Ka Anyambě a yoka joi ja mwana; ka enjěl ya Anyambě ya ndiya Hegar oviya oba, ka yâ‐ya vâ na ju, na, Upako u lě na, na nâvě, Hegar? O bangake; ikabojana Anyambě a ndi yokango joi ja mwana o mâ‐a jadi.
18Umwaka, hěhěkě mwana, na nâvě wa bweya mâ o ’nâ ’vě; ikabojana Mbi ka pangi mâ etomba eněně.
19Ka Anyambě a bumudě mihâ maju, ka mâ‐a yěně idango ja miba; ka mâ‐a vala, ka mâ‐a londě mbute na miba, ka mâ‐a mâtidě mwana.
20Ka Anyambě a diya na mwana; ka mâ‐a tombuwa, ka mâ‐a diya o nginga, ka mâ‐a diya umbeni mua ’pambo.
21Ka mâ‐a diya o nginga ya Peran: ka nyangwě a nângâ mâ mwajo oviya o ehe ya Ijipt.
22¶ O yâ běki tombango o ’gombe těně, ka Ebimelěk na Faikâl ngâwě ya ndumb‘ ’aju, ba kala na Ebreham, na, Anyambě a na nâvě n‘ ibeâvě be hakě beěhěpi;
23Nandi, kanakiya ’mba okava na Anyambě, na, wa jowiye ’mba, tombe na mwan‘ ’amě, na mwana wa mwan‘ ’amě; ndi nyang‘ ’amě e didi âvě hango kěngâ, yâ nyanga tě ndi eâvě e ka hayě ’mba, na o ehe tě eâvě e di yěngiděngo.
24Ka Ebreham a vâ, na, Mbi ka kaniyandi.
25Ka Ebreham a hěnjě Ebimelěk o pělě ya idango ja miba ja bahayi ba Ebimelěk i patwaki na sâwě.
26Ka Ebimelěk a vâ, na, Mbà ’wě a di hango elombo těkae; na nâvě w‐u langwakiya ’mba, tepě mb‐u yokaka yâ, kabo o buhwa.
27Ka Ebreham a nângâ medâmbě na nyati, ka mâ‐a vě beâ Ebimelěk; ka bâ babale ba ha panga.
28Ka Ebreham a tědě myadi mea medâmbě mea mwanga hěmbwědi, pěpěkě na eabu.
29Ka Ebimelěk a vâ na Ebreham, na, Myadi tě mea medâmbě hěmbwědi imeâvě me di paluděngo pěpěkě na eabu ekame me weyaka lě na?
30Ka mâ‐a vâ, na, Myadi tě mea medâmbě hěmbwědi ekame ndi meâvě me ka nângě o ’nâ ’amě, me ka diyandi tali o umbi jadi, nana, umba ndi mbi tongakidi idango těkadi.
31Ovaně nd‘ o mâ‐a vangakidě iboko těvině, na, Idango j‘ ikana; ikabojana bâ babale ba kanakindi omě.
32Nonaně nd‘ o bâ‐ba hakidi panga o Bir‐shiba; jâ ndi ja Ebimelěk ja ’muwa, na Faikâl ngâwě ya ndumb‘ ’aju, ka bâ‐ba timba o ehe ya Filistin.
33Ka Ebreham a liya iboko via bele o Bir‐shiba, ka mâ‐a ndiya omě dina ja Jěhova, Anyambě ya ’Gombe Yěhěpi.
34Ka Ebreham a yěngidě hwi üte o ehe ya Filistin.
Currently Selected:
Jěnisis 21: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
