Daniel 8
8
1O upuma mua melalo mua ivenda ja upolo Bělshazar, jěně i pumakiyi ’mba, paniyango o umba Daniel mbi jadi, e pumakiyi ’mba ya boho kělěbě.
2Mbi yěněkindi o jěně, nandi e diyaki nonaně o umba‐mbi yěněkidi, mba bě o Shushan, ikenga i jadi o ehiki ya Elam; mbi yěněkindi o jěně, mba bě baka na viho via Ulai.
3Jâ ndi jamě ja betaně mihâ mamě, na yěněkě, na, hilakěte, momi mua udâmbě, mabomba mabale, u jadi těměngo baka na viho; mabomba mabale ma jadi na udomba; ndi jâkâ i diyakindi udomba wa na ipâkwě, ja udomba wa ndi i pumakidě o mbuhwěmbuhwě.
4Mbi yěněkindi momi‐mua‐udâmbě u lokwakidě o pělě ya ulânga, na ya ngângâ, na ya diko; na tito ipâkwě ì diye na ngudi ya těnidě na yâ, tombe na wa patuwa o ikadu jaju; ndi u hakite hohonganěngo na upango muaju, u ka kenakě mâ mětě.
5O umba‐mbi diyakidi mbi batakě, na, hilakěte, momi‐mua‐tomba u vakiyendi oviya o ulânga o boho bwa he yěhěpi, u kupaně he; nandi mbodi tě ya tomba e diyaki na ibomba i hilakwě o hanganě ya mihâ maju.
6Ka yâ‐ya pâ o momi‐mua‐udâmbě, u diyaki na mabomba mabale u jadi, umuamě u yěněki těměngo baka na viho, ka yâ‐ya kuduwa mâ na jeku ja ngud‘ ’aju.
7Ka umba‐mba yěně yâ e vaka baka na momi‐mua‐udâmbě, ka yâ‐ya linguwa na mâ, na lokudě momi‐mua‐udâmbě; ka yâ‐ya buka mabomba maju mabale; na ngudi yù diya pě na momi‐mua‐udâmbě ya těnidě na yâ; ndi e kwehekidě mâ o he, e ka pitaka mâ; ovaně o diye na wa patuwa momi‐mua‐udâmbě o ikadu jaju.
8Ka momi‐mua‐tomba mua keně nyolo ’aju na ngudi; o mâ‐u diyaki mua yâdâ, na ibomba iněně na bukakiya; o maiha maju ka mabomba ma hilakwě ma pumě manai, ma tamwanakiya mepupě mea oba menai.
9Ka ibomba ihâlě ja puma o ibomba těmaně jâkâ, ka jâ‐ja kena na ngudi, na pělě ya diko, na pělě ya madiki, na pělě ya ehe ya ivenda.
10I kenaki na ngudi, kwanga na vala ndumba ya oba; na mběyi ya ndumba pâkâ, na ya nyětěti nd‘ eaju e pukwakidě o he, na jâ‐i pitaka jâ.
11E, i kenakidi nyolo ’aju kwanga na vala o upolo‐mua‐ndumba u jadi; na patwanaka mâ mwambo u tumbakwě egombe yěhěpi, na iboko via ndabo ’aju ya ikaliya na bulwakudwě.
12Ka jâ‐ja věwě ndumba na mwambo u tumbakwě egombe yěhěpi ta, na tina ya ipulě; n‘ a kutwakidě pâkwěpâkwě o he, i hakindi upango muaju, na jâ‐i longwaka.
13¶ Ka umba‐mba yoka Wa‐hole a kalaka; ka upâkwě Wa‐hole a vâ na umbâkâ n‘ uhuhu a kalakidi ně, na, Jěně ja pělě ya mwambo u tumbakwě mua egombe yěhěpi, na ipulě i pangakě evââvâ, o ivě ja ndabo ya ikaliya na ndumba beěhě be pitakwě na matambi, i ka diya lě nj‘ ulingo‐ě?
14Ka mâ‐a vâ n‘ umba, na, Kwanga na vala o tâjeni ibale na kama ja kolo na mebwa ilalo; nandi běngě ndabo ya ikaliya e tanakwě.
15¶ Ndi e běkindi, o umba, hângě umba Daniel, mbi yěněkidi jěně, ka umba mba vaha o bweyidě jâ, nandi, hilakěti, egâlani ya ehini ya moto o boho bwamě de.
16Na umba na yokaka joyi ja moto o hanganě ya kângâki ja Ulai, i ndakiya, na, Gabriel! pangaka momo těkaně a bweyakidě jěně.
17Na mâ na bengakiya o umba‐mbi těměkidi; o mâ‐a pâdi, mbi bangakindi, na kwaka bumamango: ndi a vâki n‘ umba, na, Mwana‐moto‐O! bweyakidě, ikabojana jěně i ndi ja egombe ya ihuku.
18Nandi, o mâ‐a diyakidi a kalaka n‘ umba, mbi kwakindi o viyâ via ’bihi, boho bwamě na he; na mâ na kupanakě ’mba, ka mâ‐a tědě ’mba de.
19Ka mâ‐a vâ, na, Hilakěte, mbi ka yowuděnd‘ âvě nyanga e ka diyě o ’gombe ya madikanido ma ngambi; ikabojana e ndi ya egombe ya lenudwěngo ya ihuku.
20Momi mua udâmbě umuâvě u yěněkidi u jadi na mabomba mabale, mâ ndi mepolo mea Midea na Persia.
21Nandi, momi mua tomba mua yaye ndi upolo mua Grecia; nandi ibomba iněně i jadi o hanganě ya mihâ maju ndi upolo mua bohoboho.
22Nandi o pělě ya i bukakiyedi, ja iboko viaju i těměkidi mapâkwě manai, mapangiya manai ma ka těměndi o etomba těyeně, ndi hanga na ngud‘ ’aju.
23Na, o ihuku ja egombe ya ipangiya jabu, o bapuli ba ka běyě ba londa, upolo mua pwanja ya mahihi, na mâ‐u bweyakidě mekalo mea ivititi, u ka těměndi.
24Ngud‘ ’aju e ka diyandi eněně, nandi hanga na ngudi ’aju mětě; a ka jilaniděndi bomamanakwě mětě, a ka longwaka; a haka upango muaju; a ka jiliděndi bakolo na bato ba hole.
25Na tina ya ugone muaju ndi eaju e ka panganě ukândâ u longwaka o ikadu jaju; a ka kenakě nyolo ’aju mětě o ebumulem‘ ’aju, na voyavoya ’abu nd‘ eaju e ka kwiyanidě baitě; a ka těnidě tepě na upolo mua mepolo; ndi a ka bukiyate, ikadu ì diye.
26Nandi jěně ja kolo na mebwa i ma langudwě i pâkwěpâkwě; ndi dibak‘ âvě jěně; na jambojana i ngite ja hwi iitě i vakě.
27Ka umba Daniel mba hoviya, mbi běkindi mběyi ya hwi; běngě mbi umwake ka ha megono mea upolo; umba kabo mamaka jěně, ndi i diye na wa bweyidě jâ.
Currently Selected:
Daniel 8: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
