Daniel 7
7
1O upuma mua bohoboho mua Bělshazar y‘ upolo mua Babilon, Daniel a yâtâki ndâtâ na jěně ja molo muaju o ikondo jaju; jâ ndi jaju ja lěndě ndâtâ, na langwaka tango ya matato.
2Daniel a kalakindi na vâkâ, na, Mbi yěněkindi o jěně jamě na bulu, na, hilakě, mepupě mea oba menai me kuhwaka o manga maněně.
3Ka tito iněně inai ja pumě oviya o manga ì kwanane.
4Ya bohoboho pani‐ka amalě, e jadi na mapěpu, na mbela: mbi hilakiděndi kwanga na mapěpu maju ma pâkudwě, ka yâ‐ya hěhwě oviya o he, ka yâ‐ya tědwě na beko bebale ka moto, ka yâ‐ya věwě ebumulema ya moto.
5Na umbwakiyate, tito epâkwě ya ibale, e kwanaka bear, na yâ e betakudwěndi pělě pâkâ oba, na bevehe bea mbanja belalo be diyakindi o udumbu muaju o hanganě ya mahonga maju; ka bâ‐ba vâ na yâ kakana, Umwaka, o ka jaka njângâ ya mehoni.
6Ekaně kělěbě, mbi hilakiděndi, na, umbwakiyate, epâkwě e kwanaka njâ, yâ, o ukângâ muaju, na mapěpu ma inâni manai; tito tě e diyaki tepě myolo manai; na yâ na věkwě ipangiya.
7Ekaně kělěbě, mbi yěněkindi o jěně ja bulu, na hilakě, tito ya inai, mahihi, na pimba, na ngudi eitě mětě; e diyaki na mahonga ma bekěyi maněně; e jaka, e bukaka nguhu na yâ e nyingaka be dikanakě na matambi maju; na yâ è kwane tito ipâkwě jěhěpi i diyaki yâ o boho; e diyaki jomu ja mabomba.
8Mbi batakidi mabomba, hilakěte ibomba ipâkwě i pumiděndi o njamb‘ ’abu, ihâlě, mabomba tě mapâkwě malalo ekama ma ukwanakiyendi na o tina o boho bwaju; nandi, hilakěte, o ibomba těkadi, o jadi na mihâ, ka mihâ ma moto, na udumbu u kalaka belombo beněně.
9Mbi hilakiděndi kwanga na ’la o beka be těkudwě, na Wa‐hwi‐ja‐vyo na diyaka; ibâtâ jaju i diyaki botano ka mataya, na howe ja molo muaju ona mevâtâ metano mětě; eka ’aju e diyakindi mengonyi mea veya, na belape bea omě veya vi yodakě.
10Tongo ya veya e kuhwaka, na yâ e pumaka oviya boho bwaju, tâjeni ya tâjeni ndi i ma hakiya Mâ, ka jomu ja tâjeni ja njo jomu ja tâjeni ja těmě o boho bwaju; ka yěkě ya yolaně, na bejanganangobo na bumwakudwě.
11Ka umba mba hilě o egombe těyeně, jamboja joyi ja ndaga iněně ja ibomba i kalakidi; mbi hilakiděndi kwanga na ’la o tito e weyakudwě, ka ukuku muaju mua jongoludwě, ka mâ‐a věwě ka tumbwě na veya.
12Nandi, o pělě ya tito ipâkwě, ngudi ’abu e věngěkudwěndi; ndi tombekete nonaně, beměnâ beabu be yavakudwěndi o epedi na egombe.
13Mbi yěněkindi o jěně ja bulu na, hilakěte, Umbâkâ a vaka na bevindi bea oba, pani‐ka mwana‐moto, ka mâ‐a pâ paniyango o Wa‐hwi‐ja‐vyo a jadi, ka bâ‐ba bengidě Mâ o Mâ‐a jadi.
14Ka Mâ‐a věwě egândâ, na ivenda, na ipangiya, na bato běhěpi, betomba, na mangâ be dilakě Mâ; egândâ ’aju e ndi egândâ ya pěkě‐na‐jome, e ka měndě e tombe, na ipangiya jaju ndi i ka měndě i jiliye.
15¶ O pělě ’amě ya Daniel, ilina jamě i yěněkindi ngěbě o nyolo ’amě utema, ka jěně ja molo muamě ja ha ’mba njuke.
16Mbi bengakiyendi o umbâkâ wa ba těměki baka a jadi, na uwaka mâ pâkwěpâkwě ya ekabe beěhěpi. Nonaně ndi ka mâ‐a languwa ’mba, n‘ a yowakidě ’mba ipakuwa ja belombo tě.
17Tito tě iněně, i jadi inai, ekadi, ndi mepolo menai, me ka puliyě o he.
18Ndi bayamu ba Wa‐Oba‐Mětě ndi ba ka kahě ipangiya, na bâ‐ba piga ipangiya egombe yěhěpi, paniyango o egombe yěhěpi na egombe yěhěpi.
19Jâ ndi jamě ja vaha o yowě pâkwěpâkwě o pělě ya tito ja inai, e ha kwanaki jâ jěhěpi, mahihi ti, e diyaki na mahonga ma bekěyi, na nyanda jaju ja nyěnyě; e ma jaka, n‘ a bukaka nguhu, n‘ a nyingaka be ma dikanaka na matambi maju:
20Na, o pělě ya jomu ja mabomba ma diyakidi o molo muaju, na ibomba tě ipâkwě i pumakidě, ja mapâkwě malalo ma kwakidi o boho bwaju; paniyango ibomba tě i diyakidi na mihâ, na udumbu u ma kalaka belombo beněně, i diyakidi ehini ’aju ipaguma wa na mapâkwě.
21Mbi hilakiděndi, ka ibomba tě ja yana na bato bayamu, na balaka bâ;
22Kwanga na ’la Wa‐hwi‐ja‐vyo a vakidi; ka uhango mua věwě o ba bayamu ba Wa‐Oba‐Mětě; ka egombe ya pâ ya bayamu e pigakidi ipangiya.
23A vâki kakana, Tito ya inai e ka diyandi ipangiya ja manai o he, i ka diyě nyang‘ ibale na mapangiya měhěpi, i ka jě he yěhěpi, i ka nyingě yâ, i bukaka yâ nguhu.
24Nandi, o pělě ya jomu ja mabomba, oviya ipangiya těkadi o ka beti jomu ja mepolo; na upâkwě u ka betandi o mbuhw‘ ’abu; mâ nd‘ u ka diyě nyang‘ ibale na mea bohoboho, a ka hubidě mepolo melalo.
25A ka kaliyandi Wa‐Oba‐Mětě ndaga, a ka yalěndi bayamu ba Wa‐Oba‐Mětě; a ka pikiliyandi iludě ja begombe na elekanako; na beâ‐be ka věwěndi o ikadu jaju, kwanga na ’la o ’gombe na begombe na ekulu ya ’gombe.
26Ndi uhango u ka diywěndi, na bâ‐ba ka věngiděndi ipangiya jaju, o inyâmbidě na ijilidě jaju, kwanga na ’la ihuku.
27Vâkâna ipangiya, na egândâ, na boněně bwa mapangiya ma ibomako ja oba yěhěpi, ma věwudwěndi o bato bayamu ba Wa‐Oba‐Mětě; ipangiya jaju i ndi ipangiya ja pěkějome; na begândâ beěhěpi be ka hakiya, na beâ‐be ka hekakidě Mâ.
28Ihuku ja itato ndi okava. O pěl‘ ’amě ya Daniel, mapikiliya mamě ma haki ’mba njuke eitě, ka boho bwamě bwa uluwa ’mba: ndi mbi tatakindi itato o ebumulema ’amě.
Currently Selected:
Daniel 7: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
