Daniel 6
6
1Daraius a tândâkindi o tědě kama bevolo na mabo mabale o ipangiya ma ka diyě kwanga o ipangiya jěhěpi:
2Na, o molo muabu, ba hilakě balalo (mâ, umbâkâ ndi Daniel); na bevolo těkabe be pakwaka o bâ‐ba jadi, ovaně nd‘ o upolo a ka měndě à diye na ipeludě.
3Jâ Daniel těkadi a pumakiyendi o boho na ba hilakě na bevolo, ikabojana ilina i balanakě i diyaki na ju; na upolo a ka pikilakiya mâ itědě ja molo mua ipangiya jěhěpi.
4¶ Jâ ndi ja ba hilakě na bevolo ja vaha o duwa Daniel ponda o pělě ya ipangiya; ndi b‘ ù duwaka na ponda na njěnji; na jambojana a dikindi upeha, a ’b‘ ù duwanakiya na elemě tombe na njěnji.
5Jâ ndi ja bamo tě ja vâ, na, Hwa duwe Daniel těkaně ponda, kabo hwa duwa yâ o pělě ya elekanako ya Anyambě ’aju.
6Ka ba hilakě na bevolo ba yolaně o upolo a jadi, ka bâ‐ba vâ na mâ, na, Upolo Daraius! diyaka egombe yěhěpi!
7Upolo‐O! ba hilakě ba ipangiya běhěpi, benami na bevolo, balevi na gâveni, ba tingango ta, na, ikamba ja upolo i lenakudwě, na njeka ekolo ya hawě, na, wěhěpi a ka jombě njombi tombe na Anyambě yěhě tombe na moto, o mabo ma hwi malalo, âvě věngiděngo, a ka uhwakwě o mbela ya bea amalě.
8Nandi, upolo‐O! yâdâkidě njeka, wa vamě enâ o ilěndwě, ovaně nd‘ o jâ‐i ka měndě i ’luwe, hohonganěngo na ikamba ja ba‐Midi na ba‐Persia i ha ulwaka.
9Ovaně nd‘ o upolo Daraius a vamakidě enâ o ilěndwě na njeka.
10¶ O Daniel a yowudě na ilěndwě i vamudwěndi enâ, a kěkindi o ndabo ’aju (nandi windě ja ilika viaju i diyaki bwe na pělě ya Jěruselěm) ka mâ‐a huma na mabângâ maju, buhwa njo ilalo, a kalakiya, a věkě wa‐kaba o boho bwa Anyambě ’aju, ka mâ‐a ma hakate mběmbě.
11Jâ ndi ja bamo těkaba ja yolaně, na kâbâkidě Daniel a jombaka njombi na mâ‐a hâhâlâkidě Anyambě ’aju.
12Jâ ndi ’jabu ja bakama, ka kala o boho bw‘ upolo o pělě ya njeka ya upolo, na, Upolo‐O! o ’bě vaměngo enâ o njeka, na, moto wěhěpi a ka jombi tombe na anyambě yěhě tombe moto, o mabo ma hwi malalo, kabo o âvě o‐jadi, a ka ’hwakwě o mbela ya bea amalě? Ka upolo a timbwana, na, Elombo těně e ndi pâkwěpâkwě, hohonganěngo na ikamba ja ba‐Midi na ba‐Persia, i ha ulwaka.
13Jâ ndi ’jabu ja timbwana o boho bw‘ upolo, na, Upolo‐O! Daniel tě ya bana ba mbwedi ja Juda à yěněkě âvě pivi, tombe na njeka eâvě e di vaměngo enâ, ndi a jombakiyandi njombi ’aju buhwa njo ilalo.
14Jâ ndi ja upolo, o mâ‐a yoki ndaga těkadi ja bina na ngudi, ka mâ‐a buna na ulema muaju n‘ a patwaki Daniel; n‘ a kalanganakě kwanga na vala o joba i kweyakiyedi na a yongaki mâ.
15Ka bamo těkaba ba yolaně o upolo a jadi, ka bâ‐ba vâ na upolo, na, Upolo‐O! yowakě, na, e ndi elekanako ya ba‐Midi na ba‐Persia, na, o ’bě na njeka tombe ikamba j‘ upolo i lenakidě i ka uludwě.
16Jâ ndi j‘ upolo ja sombiyě, ka bâ‐ba vana Daniel na uhwa mâ o mbela ya bea amalě. Nandi, na upolo na vâkâ na Daniel, na, Anyambě ’âvě e hakiyě o egombe yěhěpi, a ka patuwate âvě.
17Ka ilale ja vanwě, na kahudwě o udumbu mua mbela; ka upolo a yangiya jâ na ndembo ’aju mětě, na ndembo ya benami beaju, na na elombo e ulwake pě o pělě ya Daniel.
18Jâ ndi ja upolo ja vala o ikenga jaju, na tombakě bulu těboně a hindinaka; na mabeka m‘ ù bomakwě pě o boho bwaju; ka viyâ viaju via kweya mâ.
19Ka upolo a ’muwa n‘ ubwa mětě, na hungana o vala o mbela ya bea amalě.
20O mâ‐a bakami na mbela o Daniel a diyakidi, ka mâ‐a yama na joyi ja mbembe: ka upolo a vâ na Daniel, na, Ah! Daniel, uhayi mua Anyambě e di mihâ, Anyambě ’âvě e hakiyě egombe yěhěpi a yâlěte o patuwa ’âvě na bea amalě?
21Jâ ndi ja Daniel ja vâ na upolo, na, Upolo‐O! diyaka egombe yěhěpi!
22Anyambě ’amě a lomandi enjěl ’aju, ka yâ‐ya diba bea amalě medumbu, be‘ ù kokidě ’mba; na na mbà duwaniya o boho bwaju vâvâlâ: na, o boho bwâvě tepě, Upolo‐O! mbi ’bě hango ikokidě.
23Ka upolo a yěně mbya eněně, ka mâ‐a sombiyě, na, Daniel a hodwakwě o mbela; ka Daniel a hoduwě o mbela, tombe na ikokiya ka ikokiya j‘ ù duwanakiya na mâ, ikabojana a pitakiděndi Anyambě ’aju.
24¶ Ka upolo a sombiyě, ka bâ‐ba vana bamo tě ba sâjakiyedi Daniel, ka bâ‐ba uhwa bâ na bana babu na bajo babu o mbela ya bea amalě; ka bea amalě bea bala bâ, ka beâ‐bea buka bâ bevehe beabu beěhěpi nguhu, bà pâye n‘ ibongo ja mbela.
25¶ Nandi ka upolo Daraius a lěndiyě bato běhěpi, betomba, na mangâ be diyakě o he yěhěpi, na, Jonga i tumbake n‘ inyěni.
26Mba lenandi ikamba, na, O egândâ ya ipangiya jamě yěhěpi, bato ba likimake na bâ‐ba ka bangaka Anyambě ya Daniel; ikabojana Mâ ndi Anyambě e di mihâ, e ha hokaka egombe yěhěpi, na ipangiya jaju ndi i ka měndě ì buluwe, na egândâ ’aju e ka diyě kwanga na ’la o ihuku;
27A patwaka, na a yonganakě, na mâ‐a haka ndembo na bememělě oba na he; a patuwedi Daniel oviya ngudi ya bea amalě.
28Nonaně ndi ka Daniel těkaně a pahakidi o ivenda ja Daraius, na o ivenda ja Cyrus ya Persia.
Currently Selected:
Daniel 6: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
