Daniel 5
5
1Bělshazar y‘ upolo a hakiděndi tâjeni ’aju ya benami isango iněne, a mâtâkâ ivě o boho bwa tâjene tě.
2Bělshazar a vekakate ivě, ka mâ‐a sombiyě na beva bea hika‐’veyu na bea hika‐’tano, bea hangwě Něbukadnězar be vanakiyedi o Temple e diyakidi o Jěruselěm, be vanakwě; ovaně nd‘ o upolo na benami beaju na bajo baju na kângě jaju ba ka mâtâně beâ.
3Jâ ndi jabu ja vana beva bea hika‐’veyu be nângâkudwě oviya Temple ya ndabo ya Anyambě e diyakidi o Jěruselěm; na Upolo na benami beaju, na bajo baju na kângě jaju ba ka mâtânâkâ beâ.
4Ba mâtâkâ ivě, ba bendakě beanyambě bea hika‐’veyu, na bea hika‐’tano, bea nyěnyě, bea bekěi, bea bele, na bea malale,
5O iwěla tě mepenjo mea ikadu ja moto me pumiděndi, me ka lěnděkě banjaniděngo na uhângâ‐mua‐vitwa o laso ya epima ya ikenga ja upolo: ka upolo a yěně ekulu‐ikadu e lěnděkidi.
6Upolo a ’luwa pwanja, mapikiliya maju ma ka haka mâ njuke, malata ma ngala jaju ma hěhělěně mâ, mabângâ maju ma ka bweyanaka,
7Ka upolo a yama, na, ba vanake bapâgi, na ba‐Kaldi, na basâki. Upolo na kalaka na bato ba iyowě ba Babilon, na, Wěhěpi a ka langě ilěndwě těkadi, na mâ‐a levidě ’mba jâ ipakuwa, a ka bâtudwěndi ingâla, mâ‐a bě na panga ya hika‐’veyu o ibâlu jaju, a ka diyandi upangiyi mua melalo o ipangiya.
8Jâ ndi ja bato b‘ iyowě ba upolo běhěpi ja pâ; ndi bà yâlě o langa ilěndwě, na bà yâlě tepě o yowudě upolo ipakuwa.
9Jâ ndi ja upolo Bělshazar ja yěně njuke eněně, ka boho bwaju bwa ’luwa, na benami beaju bea ndeba.
10Nandi, konde a ngakiyendi o ndabo ya ebanga, na tina ya ndaga ja upolo na benami beaju; ka konde a kala, na, Upolo‐O! diyaka egombe yěhěpi! mapikiliya mâvě mà hake âvě njuke, na boho bwâvě bò ’luwake:
11Moto a nd‘ okava o ipangiya jâvě, a jadi na ilina ja beanyambě bea hole; na o hwi ja hângwě, bwe na ibweyidě na iyowě, pani‐ka iyowě ja beanyambě i duwanakiyi na ju: na, hângwě Něbukadnězar y‘ upolo (mba vwi, na, hângwě upolo) na pangaka mâ molo mua bapâgi, batimbi, ba‐Kaldi, na basâki:
12Jambojana ilina i kebanakě, na yowěyowě, ibweyidě, ipakuwa ja ndâtâ, na ilevidě ja ndaga ja ivititi, na ilena ja penda, be duwanakiyendi na Daniel tě, ya upolo a vangakidě, na, Běltishazar, Nandi, Daniel a ndakudwě, mâ nd‘ a ka levidě ipakuwa.
13Jâ ndi ja Daniel ja nganudwě o boho bwa upolo, Ka upolo a kala na Daniel, na, Âvě ndi Daniel tě, ya bana ba mbwedi ja Juda, wa paia upolo a vanakiyedi oviya Juda?
14Mbi yokango o pěl‘ ’âvě, na, ilina ja beanyambě i na nâvě, na bwe, na ibweyidě, na iyowě i kebanakě i duwaniyango na nâvě.
15Nandi, bato ba iyowě, na bapâgi ba ma vanwěndi o umbi jadi, na, ba langake ilěndwě těkadi, na bâ‐ba yowudě ’mba jâ ipakuwa; ndi bù yâlě o levidě ipakuwa ja elombo těkae.
16Nandi, mbi nd‘ âvě yokango, na, na o ndi o věkě mapakuwa, na o lenaka penda; nandi, ipě o te o langaka ilěndwě, na nâvě wa yowudě ’mba jâ ipakuwa, o ka bâtudwěndi ingâla, na nâvě wa bě na panga ya hika‐’veyu o ibâlu jâvě, na nâvě o ka diyandi upangiyi mua melalo o ipangiya.
17Jâ ndi ja Daniel ja timbwana upolo, na, Myova meâvě me diyakete na nâvě mětě, na nâvě o ka věkě mahomano mâvě upâkwě. Nandi, tombekete, mbi ka langiyate upolo ilěndwě, na umba‐mba yowudě mâ ipakuwa.
18Âvě! upolo‐O! Anyambě ya Oba‐Mětě a věkindi hângwě Něbukadnězar ipangiya, na boněně, na ivenda, na utambo:
19Nandi, tina ya boněně bwaju bo věki mâ ndi ya bato běhěpi, betomba, na mangâ e ma likimaka, na bâ‐ba bangaka o boho bwaju; uaju a pangakě, a weya, na uaju a pangakě, a yongě; na uaju a pangakě, a betidě, na uaju a pangakě, a hubidě.
20Ndi, o ulema muaju u diyaki mua betiya, na ilina jaju ja yâdâ, a ka haka maměmě, n‘ a hubakwě o ek‘ ’aju ya upolo, ka bâ‐ba nângânâ mâ ivenda jaju;
21Na mâ na dumakwě o bana ba bato ba jadi; na ebumulema ’aju na ’lwakudwě ya bě ona ya tito, na mâ‐a bě ediya na buru ja mehili; a ka jakudwě mbusanga ka nyati, na nyolo ’aju e ka bâhâkâ na jupa ja oba: kabo kwanga na o mâ‐a yowakidě na, Anyambě ya Oba‐Mětě nd‘ a pangakiyě o mapangiya ma bato, na Mâ‐a těkidě jâ uaju a ka pangě wěhěpi.
22Na nâvě, mwan‘ ’aju, Eh! Bělshazar, wu hubidě ebumulem‘ ’âvě, âvě‐ò dimbiye ekabe beěhěpi:
23Ndi o betidi nyolo ’âvě na Upangiyi‐mwa‐Oba, ka bâ‐ba bana beva bea ndabo ’aju o âvě‐o jadi, na nâvě na benami beâvě, bajo bâvě na kângě jâvě, o ka mâtânâki beâ ni ivě; na nâvě o bendakě beanyambě bea hika‐’tano, hika‐’veyu, bea nyenyě, bekěyi, bele, na malale, be ha yěněkě, be ha yokaka, na be ha ’wě: nandi, Anyambě e jadi na pudi ’âvě o ikadu jaju, a duwě njeya jâvě jěhěpi, wù bendě Mâ:
24Jâ ndi ja ekulu ya ikadu e ma lomwě oviya o mâ‐a jadi; na ilěndwě těkadi na lěnděkwě.
25Nandi ilěndwě i lěnděkudwě nd‘ ekadi, MENE, MENE, TEKEL, UPHARSIN.
26Ipakuwa ja elombo těkae ndi ekadi: MENE: Anyambě a langindi ipangiya jâvě, a hukidi jâ.
27TEKEL: O pehudwěndi o udodo, o duwaniyendi o yěněkiyě.
28PERES: Ipangiya jâvě i kabudwěndi, na věwě ba Midia na ba Persia.
29Jâ ndi ja Bělshazar ja sombiyě, ka bâ‐ba bâtidě Daniel ingâla, na pang‘ ’a hika‐’veyu o ibâlu jaju, ka bâ‐ba umidě o pěl‘ ’aju, na, a diyake upangiyi mua melalo o ipangiya.
30Na bulu tě te bwa Bělshazar upolo mua Kaldia bo weyakudwě.
31Ka Daraius wa Midi a kaha ipangiya, a bě igona ja ka ba mabo ma mepuma utoba na mepuma mebale.
Currently Selected:
Daniel 5: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
