Daniel 4
4
1Něbukadnězar y‘ upolo, na bato běhěpi, betomba, na mayângâ ma diyakě o he yěhěpi; jonga i vuhake n‘ inyěni.
2E yěněněki bwamu o umba‐mbi jadi, na, mbi levakidě ndembo na beměmělě bea Anyambě ya oba mětě be hadi n‘ umba.
3Emě! ndembo jaju o kena! Emě! beměmělě beaju o ita ngudi! ipangiya jaju i nd‘ ipangiya ja pěkě‐na‐jome, na iyambiya jaju i nd‘ oviya mbamba na ’la mbamba.
4Umba, Něbukadnězar, mbi diyakindi mbi yâjâkâ o ndabo ’amě, mbi longwaka o ikenga jamě.
5Mbi yâtâki ndâtâ e bangakidě ’mba; na mapikiliya ma ikondo jamě, na jěně ja molo muamě i haka ’mba njuke.
6Ovaně nd‘ o umba‐mbi lenakidě ikamba i pâkidě bamo ba iyowě ba Babilon běhěpi o umba‐mbi jadi, na ba yowakidě ’mba ipakuwa ja ndâtâ.
7Jâ ndi ja bapâgi, batimbi, ba‐Kaldi, na basâki ja pâ; k‘ umba mba languwa ndâtâ o boho bwabu; ndi bù yowakidě ’mba yâ ipakuwa.
8Nandi, na mbuhwěmbuhwě, Daniěl a pândi o boho bwamě, a diyaki dina, na, Běltishazar, hohonganěngo na dina ja anyambě ’amě, na a didi na ilina ja beanyambě bea hole: k‘ umba‐mba languwa ndâtâ o boho bwaju,
9Na, Ah! Běltishazar, ngâwě ya ba pâgakě, ikabojana mbi yowěngo na ilina ja beanyambě bea hole i na nâvě, na o ’bě na ihâwě i ka hayě ’âvě njuke, langwakiya ’mba jěně ja ndâtâ ’amě eamě e di yěněngo, na ipakuwa jaju.
10Kakana ndi ka jěně ja molo muamě o ikondo jamě i diyakidi: mbi yěněkindi, na hilakě ele o hanganě ya he, na utě muaju u jadi uněně.
11Ele na tombwaka, ya bě bokolo, na utě muaju u kâbâkidě oba, na e yěněněkě o mahuku ma he měhěpi.
12Bekai beaju be diyaki n‘ ibělě, na bebuma beaju bwinge, na yâ nd‘ e diyaki beja bea běhěpi; tito ja ehiki i duwaka igombegombe o ngudungudu ’aju, na lonâni la oba lo diyaka o melabe meaju, na mehoni meěhěpi me jakiya yâ.
13Mbi yěněkindi o jěně ja molo muamě o ikondo jamě, na hilakěte, evengi na wa‐hole‐umbâkâ a hubaka oviya oba.
14A yamakindi, na vâkâ kakana: Kwělěkě ele, na lena melabe meaju, vugumakidě bekai beaju, wa pajanganě bebuma beaju: tito i kumbulanake o ngudungudu ’aju, na lonâni oviya melabe meaju.
15Nandi tombekete, dikakate ekumu ya metamba meaju o he, paniyango na ukato mua ekěyi na nyěnyě, o mbusanga ja ehiki ibâbu; na yâ‐e bâhâkwě na jupa ja oba, na ngabo ’aju e ka diyaka na tito, o mbusanga ja he:
16Ebum‘ ’aju ya ulema e ’lwakudwě, è diye pě ya moto, na ebumulema ya tito e věkwě mâ; na begombe hěmbwědi be tombake mâ.
17Ikamba i lenakiyandi na bevengi, na isombiya na ndaga ya ba‐hole: na ovaně nd‘ o ba diyediye ba ka yowě, na, Wa‐Oba‐Mětě a pangakiyandi o ipangiya ja bato, na Mâ‐a věkěte jâ uaju a pangakě wěhěpi, na Mâ‐a těkidě omě tombe moto wa hubiyango mětě.
18Ndâtâ těkaně ndi eamě ya upolo Něbukadnězar e yěněkidi: nandi, âvě, Běltishazar‐O! langwaka ipakuwa, ikabojana bato ba iyowě ba ipangiya jamě běhěpi bà ’bě na ngudi ya yowudě ’mba ipakuwa; ndi âvě ndi o jadi na ngudi, ikabojana ilina ja beanyambě bea hole i na nâvě.
19Jâ ndi ja Daniel, a diyaki na dina, na, Běltishazar, ja mama o ulingo, na mapikiliya maju ma ka haka mâ njuke. Upolo na timbakě, na, Běltishazar, ndâtâ tombe ipakuwa i hake âvě njuke. Běltishazar na timbwanaka, na, Paia! ndâtâ e diyake na ba lonakě âvě, na ipakuwa jaju na ndoba jâvě.
20Elě tě ’âvě e yěněkidi, e tombwakidi, e diyakidi bokolo, e diyakidi utě muaju u kâbâkidě oba, na e yěněněkě na he yěhěpi;
21E diyakidi bekai beaju n‘ ibělě, na bebuma beaju bwinge, na yâ na beja bea wěhěpi: ya tito ja ehiki e ma diyaki o ngudungudu, na ya lonâni la oba e ma duwaka eboboka o melabe meaju:
22Upolo‐O! yâ ndi âvě, o tombuwedi, wa bě bokolo: ikabojana boněně bwâvě bo tombuwendi, na kâbidě oba, na ipangiya jâvě, na ’la o ihuku ja he.
23Na nyanga ya upolo e yěněkidi evengi na wa‐hole a hubaka oviya oba, a vâkâ, na, Kwělěkě ele, wa jongolidě yâ; nandi tombekete dikakate ekumu ya metamba meaju o he, paniyango na ukato mua ekeyi na nyěnyě o mbusanga ibâbu ja ehiki; na yâ e ka bâhâkâ na jupa ja oba, na ngabo ’aju e diyake na tito ja ehiki, kabo begombe hěmbwědi bea ta tomba mâ;
24Upolo‐O! ipakuwa ndi ekadi, na jâ i ndi ikamba ja Wa‐Oba‐Mětě, i pâdi o paia upolo a jadi ekadi;
25Na, o ka dumwěndi o bato ba jadi, na bodiya bwâvě bwa bě na tito ja ’hiki, na o ka jedwěndi mbusanga ka nyati, na o ka bâhi na jupa ja oba, na begombe hěmbwědi be ka tomband‘ âvě; kwanga na nâvě o ka yowě na Wa‐Oba‐Mětě a pangakiyandi ipangiya ja bato, a věkě jâ uaju a pangakě wěhěpi.
26Tepě nyang‘ ’abu e sombiyakidě, na, ekumu ya ele e ka dikakwě metamba, ipangiya jâvě i ka diyate o âvě‐o jadi banda; kabo o âvě‐o ka diyě wa yowě, na, oba ndi e pangakiya.
27Upolo‐O! vâkâna ibeva jamě i nângâkwě na nâvě, wa lena mabe mâvě na hohonganěngo, na mapulě mâvě na iyěně ja mekuge ngěbě; ipě, i ka diya iyavě ja manjě mâvě.
28Ekabe beěhěpi te be pâkidi o upolo Něbukadnězar a jadi.
29O ihuku ja jomu na ngândě ibale, a tamwaka o ikenga ja ivenda ja Babilon,
30Upolo n‘ a kalaka, na, A bě Babilon eněně ekaně, eamě e longakidi na ediya ya ivenda, na pimba ya ngudi ’amě, na ya ivenda ja boněně bwamě?
31O upolo a diyakidi a ngite ndaga o udumbu muaju, joyi i kutwakindi oviya oba, na, Ah! upolo Něbukadnězar, âvě nd‘ o kalanakwě: ipangiya i věngěmindi na nâvě.
32O ka dumwendi o bato ba jadi, na bodiya bwâvě bwa bě na tito ja ’hiki, o ka jedwěndi mbusanga ka nyati, na begombe hembwědi be ka tombandi âvě, kabo o âvě‐o ka yowě, na, Wa‐Oba‐Mětě a pangakiyandi ipangiya ja bato, n‘ a věkě jâ uaju a pangakě wěhěpi.
33Iwěla tě te ja elombo tě ya tima na Něbukadnězar; n‘ a dumakwě o bato ba jadi, n‘ a jaka mbusanga ka nyati, na nyolo ’aju na bâhâkâ na jupa ja oba, na vala o howe jaju i tombwaki ona mekâtâ mea mbela, na nyanda jaju ja bě ka nyanda ja lonâni.
34O ihuku ja hwi tě, umba, Něbukadnězar, mbi betakidi mihâ mamě oba, na ibweyidě jamě na timbaka ’mba, n‘ umba na langaka Wa‐Oba‐Mětě, na bendakě, na dilakě a diyakě o egombe yěhěpi; na jambojana iyambiya jaju i ndi iyambiya ja pěkějome, na ipangiya jaju oviya igona na ’la igona:
35Na ba diyakě o he běhěpi ba langakwěndi ona ba bě elombo; na Mâ‐a haki hohonganěngo na upango muaju na ndumba ya oba, na o ba diyakě o he ba jadi; na o ’bě na a ka himbidě ikadu jaju, tombe wa vâ na ju, na, O haka lě nde?
36O egombe tě, ka ibweyidě jamě ja timba ’mba; na o pělě ya ivenda ja ipangiya jamě, boněně bwamě, na bwe, be timbakite ’mba; ka balevi bamě na benami beamě ba vahidě ’mba; n‘ umba na těkudwě pě o ipangiya jamě, boněně bo kebanakě na badakudwě pě ’mba.
37Nandi, umba, Něbukadnězar, mbi bendakěndi, mbi kenakě, na umba‐mbi dilakě upolo mua Oba; ikabojana behavu beaju beěhěpi be ndi pâkwěpâkwě, na njeya jaju mehango; na ba tamwakě na maměmě a te na ngudi ya hubidě bâ.
Currently Selected:
Daniel 4: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
