Daniel 3
3
1Upolo Něbukadnězar a hakindi tove ya hika‐’veyu, e diyakindi o udomba mabo ma hamba‐’nâ utoba, na njanjo ’aju e didi hamba‐’nâ utoba; n‘ a těkidě yâ o ehanja ya Dura, o ehiki ya Babilon.
2Ka upolo Něbukadnězar a loma ka yolě bevolo, maiha, na gâveni, bayěkěnidi, batati‐hika, balevi, baleni ba mehango, na ba ma pangakiya behiki běhěpi, na, ba vake ka hima tove ya upolo Něbukadnězar e těkidě.
3Ka bevolo, maiha, na gâveni, bayěkěnidi, batati‐hika, balevi, baleni ba mehango, na bapangiyi ba behiki běhěpi, ba lataniya běhěpi ta, ka hima tove ya upolo Něbukadnězar u těkidě; ka bâ‐ba těmě o boho bwa tove ya Něbukadnězar e těkidě.
4Jâ ndi ja ukambi ja yama na ngudi, na, Bato, na betomba, na mayângâ‐O! inyěni ndi o sombiyakwěni,
5Na, o egombe ’anyu e ka yokě joyi ja ibeka, na ilâmbâ, na ngâmbi, na sambi, na eleke, na ibota, na mangâ ma mabeka měhěpi, o ka bumamakani ka kaliya tove ya hika‐’veyu ya upolo Něbukadnězar e di těděngo:
6A ka měndě à bumame n‘ a kaliya, o iwěla tě ja jâkâ a ka ’hwakwě o hanganě ya ebeke ya veya e yodakě.
7Vâkâna egombe ya bato běhěpi e yokakidi joyi ja ibeka, na ilâmbâ, na ngâmbi, na eleke, na ibata, na mangâ ma mabeka měhěpi, ka bato běhěpi, betomba, na mayângâ, ba ka bumama na kaliya tove ya hika‐’veyu ya upolo Něbukadnězar e těkidě.
8Nandi, o ’gombe tě, ka bato ba Kaldi bâkâ ba bengiya pyělě, na vanaka itubi o pělě ya Jiu.
9Ka bâ‐ba timbě na upolo Něbukadnězar, na, Upolo‐O! diyaka egombe yěhěpi,
10Upolo‐O! o ndi lenango holo, na, moto wěhěpi a ka yokě joyi ja ibeka, ilâmbâ, ngâmbi, eleke, ibota na sambi na mangâ ma mabeka měhěpi, a bumamake, na kaliya tove ya hika‐’veyu.
11Nandi, a ka měndě à bumame n‘ a kaliya, a ka ka ’hwakwě o hanganě ya ebeke ya veya e yodakě.
12Jiu jâkâ i ndi okava ijâvě i těkidě molo mua matato ma ehiki ya Babilon, Shadrak, Měshak, na Abědnigo; bato těkaba, Upolo‐O! bà yěněkě âvě pivi; bà dilakě beanyambě beâvě, na bâ‐bà kalakiya tove ya hika‐’veyu eâvě e didi těděngo.
13Jâ ndi ja Něbukadnězar ja bumba na malingwa na‘ a sombiyakě na Shadrak, Měshak, na Abědnigo ba vanakwě o mâ‐a jadi. Jâ ndi ’jabu ja vana bamo těkaba o boho bwa upolo.
14Ka Něbukadnězar a kala na bâ, na, Inyi, Shadrak, Měshak, na Abědnigo, vi te paniyango vyâlâ via na wà dilěni anyambě ’amě, na inyěni wa kalakiyani tove ya hika‐’veyu eamě e didi těděngo?
15Nandi, oningě o diyengěni kokěngo o egombe tě ’anyu e ka yokě joyi ja ibeka, ilâmbâ, ngâmbi, eleke, ibota na sambi na mangâ ma mabeka měhěpi, na bumama na kaliya tove ya hika‐’veyu eamě e didi haděngo, bwamu; nd‘ oningě ò kaliyeni, o ka uhwěndini iwěla tědině o ebeke ya veya e yodakě o hanganě; nandi, anyambě tě lě nja e didi e patwaka inyěni o makadu mamě?
16Shadrak, Měshak na Abědnigo ba yavwanakindi na upolo, na, Něbukadnězar‐O! ho ibě na mala ma yavwanakě âvě o upako těkamu.
17Oningě e diyengě nonaně, Anyambě ’ahu, eahu e hakiyě, a te a patwaka hwě o ebeke ya veya e yodakě; Upolo‐O! na Mâ‐a patuwa hwě oviya ikadu jâvě.
18Ndi oningě è diye nonaně, upolo‐O! diyaka yowěngo, na, hwà haye beanyambě beâvě, na hwě‐hwà kaliye tombe tove ya hika‐’veyu eâvě e di těděngo.
19Ka Něbukadnězar a londa na jeku, ka ehini ya pwanj‘ ’aju ya ’luwa na Shadrak, Měshak na Abědnigo; ovaně nd‘ o mâ‐a kalakidi, ka mâ‐a sombiyě, na, ba bekake pě ebeke njo hěmbwědi wa na nyanga ’ju e diyakě mběmbě.
20Ka mâ‐a sombiyě bamo na bahuhu ba pimba ba diyakidi o ndumb‘ ’aju, na, ba katake Shadrak, Měshak, na Abědnigo, na ba uhwa bâ o ebeke e yodakě veya.
21Jâ ndi ja bamo těkaba ja katwě na fato jabu, sini jabu, na melogosamba meabu, na mabâtâ mabu mapâkwě, na ’hwě o hanganě ya ebeke ya veya e yodakě.
22Vâkâna, ikabojana isombidi via upolo vi diyaki bopambalakidě, na ebeke ya tombe yomu, ungonyi mua veya na weyaka bamo tě ba valanakidi Shadrak, Měshak na Abědnigo, baně.
23Ka bamo tě balalo ekaba, Shadrak, Měshak na Abědnigo, ba kwa katwěngo o ebeke ya veya o hanganě.
24Jâ ndi ja upolo Něbukadnězar a mama, ka mâ‐a hungana o ’muwa; a kalaki na balevi baju, na, Hu ’hwa bamo balalo katwěngo o ebeke ya veya o hanganě? Ba yavwanaki mâ, na, Upolo‐O! pâkwěpâkwě!
25Ka mâ‐a timbě, na, Hilakěteni, mbi yěněkěndi bato banai unjuwěngo, ba tamwaka e veya hanganě, bà kokiye; ndi ehini ya wa banai e ndi pani‐ka mwana wa beanyambě.
26Jâ ndi ja Něbukadnězar ja bengiya pyělě na ubiyâ mua ebeke ya veya e yodakě: n‘ a kalaka, na; Shadrak, Měshak na Abědnigo, inyeni bahayi ba Anyambě ya oba mětě, jabwakani, wa viyani ono. Jâ ndi ja Shadrak, Měshak na Abědnigo ja jabuwa o hanganě ya veya.
27Na bevolo, bapangiyi, na gâvene, na balevi ba upolo, ba diyakidi lataniyango ta, na yěněkě bamo tekaba, ba veya vi ha diyaki na ngudi o nyolo jabu, na howe ja myolo meabu jù vâvâkiyě, tombe na fato jabu jù ’lwaka ehini, na unâvi mua veya mù kupanakě bâ.
28Něbukadnězar n‘ a kalaka, na, Ibâtâ na Anyambě ya Shadrak, Měshak, na Abědnigo, a ma loma enjěl ’aju, ka patuwa bahayi baju ba pitakidě Mâ, ka bâ‐ba ’ludě ndaga ya upolo, ka bâ‐ba huludě nyolo jabu, na ovaně nd‘ o bâ‐ba ka měndě bà dilě, na bâ‐bà kaliye anyambě epâkwě, kabo Anyambě ’abu mětě.
29Ovaně nd‘ o umba‐mbi lenakě ikamba, na, bato běhěpi, na etomba, na iyângâ, i ka kalě edâhâ yěhěpi, o pělě ya Anyambě ya Shadrak, Měshak, na Abědnigo, ba ka pěhěkwě bepěhi, na mandabo mabu ma ’ludwě tobo: ikabojana o ’bě pě na anyambě epâkwě e didi na ngudi ya patuwa nyanga těkaně.
30Jâ ndi ja upolo ja betidě Shadrak, Měshak, na Abědnigo, o ehiki ya Babilon.
Currently Selected:
Daniel 3: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
