Daniel 2
2
1Nandi o upuma mua mebale mua ivenda ja Něbukadnězar, Něbukadnězar a yâtâki ndâtâ; na ilina jaju na yěněki njuke, ka viyâ viaju via kweya mâ.
2Jâ ndi ja upolo ja sombiyě na ba pâgakě, na ba timbakě, na ba sâkâkě, na Kaldian, ba ndakudwě ka languwa upolo ndâtâ jaju. Nonaně ndi ka bâ‐ba viya, ka bâ‐ba těmě o boho bwa upolo.
3Ka upolo a vâ na bâ, na, Mbi ma yâti ndâtâ, nandi ilina jamě i yěněkě njuke iyowě ja ndâtâ.
4Jâ ndi ja Kaldian ja kala na upolo na ukalo mua Syria, na, Upolo‐O! diyaka egombe yěhěpi! langwakiya bahayi bâvě ndâtâ, na ho levidě âvě ipakuwa.
5Ka upolo a yavwana Kaldian, na, Elombo e nyangi ’mba: oningě ò yowudi ’mba ni ndâtâ na ipakuwa ja omě, vâkâna o ka pěhwěndini bepěhi, na mandabo manyu ma ka pangwěndi tobo.
6Ndi oningě o leviděngi ndâtâ na ipakuwa jaju, o ka pahiyandini bea bověkwě na mahomano na idilwě iněně o umbi jadi: vâkâna levakidi ’mba ni ndâtâ na ipakuwa jaju.
7Ba yavwanakindi njo ya ibale, ka bâ‐ba vâ, na, Upolo a levakidě bahayi baju ndâtâ, na hwě‐ho ka levakidě ipakuwa.
8Ka upolo a yavwana, ka mâ‐a vâ, na, Mbi yowuděndi mbambayě na o vahakandi o kovani egombe, ikabojana o teni yěněngo na elombo e peli ’mba.
9Ndi oningě ò yowuděngi ’mba ni ndâtâ, o teni elekanako yâkâ pa, ikabojana o ndini kenjěngo ndaga ja bojowa n‘ ujolongo i kalakě o pwanj‘ ’amě, kabo egombe ya uluwa: vâkâna langwakiyi ’mba ni ndâtâ, n‘ umba mba yowě na o t‘ o levakidi ’mba ni ipakuwa jaju.
10Ka Kaldian ba yavwana, o pwanja ya upolo, ka bâ‐ba vâ, na, O ’bě na moto o he a ka levidě upako mua upolo: pani te ka yâ di na o ’bě na upolo, tombe upangiyi na ba moto wa molo, a didi uwango bapâgi na batimbi, tombe Kaldian, elombo ka yeně.
11Na, e ndi elombo ya eveyě na upolo e tundwakidě yeně, na o ’bě na upâkwě a didi a levakidě yâ o pwanja ya upolo, kabo beanyambě, e ha ’bě ediya ’abu na ba mehoni.
12Tina těkaně ndi ya upolo e lingwaki, a ka bumbaka na ngudi, ka mâ‐a sombiyě na bato ba iyowě ba Babilon běhěpi ba jilakiye.
13Ka ikamba ja vala, na bato ba iyowě ba ’li ka weyakwě; ka bâ‐ba vaha Daniel na megangano meaju ka weywě.
14Jâ ndi ja Daniel ja timbě iyavwana j‘ ikěngě na bokeli na Ariâk, ngâwě ya batati ba upolo ba diyaki ba vala ka weya bato ba iyowě ba Babilon:
15A timbakiděndi na Ariâk, ngâwě ya upolo, na, E lě nja tin‘ ě ya ikamba i vakě bo babalakidě nonaně oviya o upolo a jadi? Jâ ndi ja Ariâk ja yowudě Daniel elombo tě.
16Ka Daniel a ngiya, ka mâ‐a vaha na upolo a lenakidě mâ egombe, na mâ‐a ka leviděte ipakuwa.
17Jâ ndi ja Daniel ja vala o ndabo ’aju, ka mâ‐a yowudě megangano meaju, Hananaia, Misheěl na Azaraia elombo tě:
18Na, ba vahake mabya ma Anyambě ya oba, o pělě ya ihâwě těkadi; na ovaně nd‘ o Daniel na megangano meaju ba ka měndě bà nyange o njamba ya bato bapâkwě ba iyowě ba Babilon.
19Nandi ka ihâwě tědině ja salwě Daniel o jěně na bulu. Jâ ndi ja Daniel ja vambiya Anyambě ya oba ibâtâ.
20Daniel a timbakiděndi, ka mâ‐a vâ, na, Ibâtâ, na dina ja Anyambě ja pěkě‐na‐jome; ikabojana iyowě na ngudi be ndi ibeaju:
21Mâ ndi a ’lwakidě begombe na hongodi: Mâ ndi a věngěkidě mepolo, Mâ tepě a těkidě mepolo; Mâ ndi a věkě ba iyowě, iyowě, na yowěyowě o ba yowudě ibweyidě ba jadi:
22Mâ nd‘ a salakě belombo bedângu na bea mahâwě; Mâ nd‘ a yowudě be jadi o ivititi, na bwe e diyaki na ju.
23Âvě, Anyambě ya bapaia‐O! mbi věndi âvě wakeba, mba bendě tepě âvě, a vi ’mba iyowě na ngudi, na nâvě wa yowudě ’mba okava eahu e ma vaha na nâvě; ikabojana o i hwě yowuděngo upako mua upolo.
24Ovaně nd‘ o Daniel a kěkidi o Ariâk a jadi, wa upolo a diyakidi a lenidě, na, a jilakidě bato ba iyowě ba Babilon: a kěkindi ka mâ‐a vâ na ju, na, O jilakidě bato b‘ iyowě ba Babilon: pâkidě ’mba o boho bwa upolo, vâkâna mbi ka leviděndi upolo ipakuwa.
25Ka Ariâk a hungana o pâdě Daniel o boho bwa upolo, ka mâ‐a kala na ju, na, Mbi duwendi moto wa bana ba mbwedi ja Juda, a ka yowudě upolo ipakuwa.
26Jâ ndi ja upolo ja timbě, ka mâ‐a vâ na Daniel, a diyaki dina, na, Běltishazar, na, O te na ngudi e yowakidě ’mba ndâtâ ’amě e di yěněngo, na ipakuwa jaju?
27Ka Daniel a yavwana o boho bwa upolo, na mâ, na, Ihâwě ja Upolo i vahakě i te, tombe na bato ba iyowě, na ba timbakě, na ba pâgakě, tombe na ba sâkâkě, bà yâlě o levidě jâ Upolo:
28Ndi o na Anyambě oba, e salakě mahâwě, Mâ ndi a youdě upolo Něbukadnězar be ka diyě o hwi ja madikanido. Ndâtâ ’âvě, na jěně ja molo muâvě, o ikondo jâvě, nd‘ ekabe;
29O pěl‘ ’âvě, Upolo‐O! mapikiliya mâvě ma pâkidi âvě o molo, o ikondo jâvě, ndi nyanga e ka hamě okava kělěbě: ka a salakě mahâwě a yowudě âvě nyanga e ka hamě.
30Ndi o pěl‘ ’amě, ihâwě těkadi jù salwě ’mba, o pělě ya na mbi na iyowě wa na moto wěhěpi a di mihâ, ndi kabo na ovaně nd‘ o ipakuwa i ka yowudwě upolo, na na ovaně nd‘ o âvě o ka yowě mapikiliya ma ulema muâvě.
31Upolo‐O! o yěněkindi, na hilakě tove ’něně. Tove těkaně e diyaki na ngudi, na ipanyidi viaju vi balanaka, e di těměngo o boho bwâvě: na ehini ’aju mahihi ti.
32O pělě ya tove těkaně, molo muaju u diyakindi mua hika‐’veyu eyamu, ngonga ’aju na benâ beaju be jadi bea hika‐’tano, ihuhu jaju na bebyâbyâ beaju bea nyěnyě,
33Membende meaju mea bekeyi, matambi maju pati bekeyi na pati ikona.
34O yěněkindi kwanga na ilale i ha lenakudwě na makadu, i bweyidi tove o matambi maju ma diyaki ma bekeyi na ikona, ka jâ‐ja buludě mâ nguhu.
35Jâ ndi ja bekeyi, ikona, nyěnyě, hika‐’tano, na hika‐’veyu bea buluwa nguhu beěhě ta bea bě ka nguhu ja nděki‐e‐vyâpâlâkwě ya lohi, ka upupě mua věvidě beâ, bè duwaniye pě n‘ iboko: ka ilale tě i bweyakidi tove ja uluwa ukodi uněně, ka jâ‐ja pinyě he yěhěpi.
36Ndâtâ ndi ekaně: na hwě‐ho ka languwandi ipakuwa jaju o boho bwa upolo.
37Upolo‐O! âvě nd‘ o jadi upolo mua bolo mepolo, wa Anyambě ya oba a jadi věngo ipangiya na ngudi na pimba na ivenda,
38Na iboko viěhěpi via bana ba bato vi diyedi, ndi viaju vi vědi tito ja ehiki na lonâni la oba o ikadu jâvě, na Mâ‐a tědě âvě na pangakiya beâ beěhěpi: âvě i moto tě mua hika‐’veyu.
39Na o mbuhw‘ ’âvě, ipangiya ipâkwě yěviyěngo wa na nâvě i těmindi; na ipangiya ipâkwě ja malalo ja nyěnyě, jâ ndi i ka pangiyě he yěhěpi.
40Na, ipangiya ja manai i ka diyi bokolo ka ekěyi: pani‐ka ekěyi a bulwakidě nguhu na mâ‐a balaka belombo beěhěpi; na pani‐ka ekěyi a tudakě ekabe beěhěpi, te ka jâ i ka buludě nguhu, na jâ i tudaka.
41Nyang‘ ’âvě e yěněkidi matambi na mepenjo be jadi pati jeka ja uměyi na pati ekěyi, i ka diyandi ipangiya i kabanakiyě; ndi i ka diyandi omě na ngudi ya ekěyi, pani te ka âvě o yěněkidi ekěyi hâbângo na ikona ja mabâdâ.
42Pani‐ka mepenjo mea matambi me diyakidi pati ekěyi na pati ikona, nyanga tě yâně ndi ya ipangiya i ka diyě pati bokolo, na pati kěhâ.
43Nyang‘ ’âvě e yěněkidi ekěyi hâbângo na ikona ja mabâdâ, ba ka hâbi nyolo na ibângâ ja bamo; ndi bà hâmbângâně upâkwě n‘ upâkwě, pani‐ka ekěyi e ha hâbâkâ na ikona.
44Na o hwi ja mepolo těměně ndi ya Anyambě ya oba i ka tědě ipangiya i ka měndě ì buluwe, na ngudi ’aju yà dikane na bato bapâkwě, ndi i ka buludi nguhu, ndi ka tukandi, na jâ‐i ka hiniděndi mapangiya těkama měhěpi, na jâ‐i ka těměndi egombe yěhěpi.
45Nyang‘ ’âvě e yěněkidi, na, ilale i lenakudwěndi oviya ukodi, makadu mà diye, na na jâ i bulwakidě bekěyi, nyěnyě, ikona, hika‐’tano na hika‐’veyu nguhu: Anyambě eněně ndi a yowudě upolo be ka hamě okava kělěbě: na ndâtâ e ndi mbambaě, na ipakuwa ja yâ tepě sulaniyango.
46Jâ ndi ja upolo Něbukadnězar ja bumama, a ka kalakiya Daniel, ka mâ‐a sombiyě, na, ba yambakiye mâ mwambo na ebedi ya kango.
47Ka upolo a timbwana Daniel na mâ, na, O pâkwěpâkwě, Anyambě ’âvě ndi Anyambě ya bolo beanyambě, na Upangiyi mua mepolo, na usali mua mahâwě, wa yěněkě o yâlâkě o sala ihâwě těkadi.
48Jâ ndi ja upolo ja keně Daniel, n‘ a věkě mâ myova meněně meitě, ka mâ‐a tědě mâ na a pangakiye ehiki ya Babilon yěhěpi, na mâ‐a ka diyaka upangiyi mua molo mua bato ba iyowě ba Babilon běhěpi.
49Ka Daniel a jomba upolo, ka mâ‐a tědě Shadrak, Měshak, na Abědnigo molo mua matato ma ekiki ya Babilon: ndi Daniel nd‘ a diyakidi o ikenga j‘ upolo.
Currently Selected:
Daniel 2: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
