Daniel 1
1
1O upuma mua melalo mua ipangiya ja Jěhoiakim upolo mua Juda, mâ ndi mua Něbukadnězar, upolo mua Babilon, u pâkidi o Jěruselěm, na petaka mâ.
2Ka Jěhova a vě Jěhoiakim, upolo mua Juda, o ikadu jaju, na mběyi ya beva bea ndabo ya Anyambě; ka mâ‐a valana beâ o ehe ya Shainar, o ndabo ya anyambě ’aju: ka mâ‐a pânâ beva o kundu ya anyambě ’aju.
3Ka upolo a kala na Ashpenaz, upangiyi mua metonga meaju, na, a vanake mběyi ya bana ba Isreěl, paniyango ba ibângâ ja upolo na ja bevolo:
4Mawanja ma ha ’bě na yěmě, ma di na elanga, ma jadi na ikěngě ja iyowě jěhěpi, na bokeli bwa yoweyowě, na ibweyidě ja iyokuwedi, na ma di na ngudi e těměkě o ikenga ja upolo; na mâ‐a yokwakidě bâ iyokwanidi, nandi na emi ya ba Kaldi.
5Ka upolo a lenidě bâ ngabo ya buhwa buěhěpi ya beja bea upolo, na ya ivě jaju i ma mâtâkâ, na ba bombakwě mepuma melalo; na ovaně nd‘ o meâ me ka hukiyě, vâkâna ba těmindi o boho bwa upolo.
6Nandi, ba diyaki ba tango těkaně, ba bana ba Juda, ndi, Daniel, Hananaia, Misheěl, na Azaraia.
7Ka evolo e ma pangakiya metonga a vangidě bâ mina: Daniel ndi uaju a vangakidě, na, Běltishazar; na Hananaia, na, Shadrak; na Misheěl, na, Měshak; na Azaraia, na, Abědnigo.
8Ndi Daniel a yanaki na ulema muaju, na, à jongolidě nyolo na beja bea upolo, tombe na ivě ijaju i ma mâtâkâ: ovaně nd‘ o mâ‐a jombakidi evolo ya metonga, na ’banga a jongolidě nyolo.
9Nandi Anyambě a duwakiděndi Daniel unyěvěno na ipoginwě o pwanja ya evolo ya metonga.
10Ka evolo ya metonga a vâ na Daniel, na, Mbi bangakandi Paia, upolo, a didi inyěni leniděngo beja na imâtâ janyu; ikabojana, a ’mbaka lě o yěně myoho meanyu ehini bobe wa na mawanja mapâkwě ma igona janyu na nde? nonaně vâkâna wa pangindi ’mba ni molo muamě mahihi o upolo a jadi.
11Jâ ndi ja Daniel ja vâ na yongo, ya evolo ya metonga e těkidě molo mua Daniel, Hananaia, Misheěl, na Azaraia, na,
12Mbi hâhâlâkiděnd‘ âvě, na, yějěkiyě bahayi bâvě o jomu ja hwi, ba věke hwě mehange me jakě na miba ma mâtâkě.
13Nandi běngě myoho meahu me tamwakudwě o âvě‐o jadi, na myoho mea mawanja ma jakě beja bea upolo; nandi na nyang‘ ’avě e ka yěně, o ka haka yâ na bahayi bâvě.
14Nonaně ka mâ‐a yokolidě bâ o itato těkadi, ka mâ‐a yějiyě bâ jomu ja hwi.
15O ihuku ja jomu ja hwi, myoho meabu me diyakindi elanga wa, na mehoni meabu me diyaki boněně wa, na mawanja ma ma jaka beja bea upolo měhěpi.
16Nonaně ndi ka yongo a věngidě beja beabu na ivě jabu i ’mbakid‘ o mâtâ; na a věkě bâ mehange.
17Nandi, o pělě ya mawanja tě manai ekama, Anyambě na věkě bâ yowěyowě na ikěngě ja iyokuwa jěhěpi na iyowě: na Daniel a diyaki na ibweyidě ja jeně jěhěpi na ndâtâ.
18Nandi o ihuku ja hwi ja upolo i lenakidě na ba nganakudwě, evolo ya metonga a ngidě bâ o boho bwa Něbukadnězar.
19Ka upolo a languwa na bâ; o njamb‘ ’abu yěhěpi o ’bě n‘ umbâkâ a duwanakiyedi pani‐ka Daniel, na Hananaia, na Misheěl, na Azaraia.
20Na, na upako muěhěpi mua iyowě na ibweyidě mua pělě ya upolo u ma uwaka bâ, a duwaki bâ jomu ja njo bwamu wa na běhěpi ba ma pâgaka na ba ma timbaka o ipangiya jaju jěhěpi.
21Ka Daniel a pâdě kwanga na ’la o upuma mua bohoboho mua upolo Cyrus.
Currently Selected:
Daniel 1: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
