Daniel 11
11
1Nandi, o pěl‘ ’amě, mbi těměkindi o upuma mua Daraius ya ba‐Midi mua bohoboho, ka huka na ka yâdidě mâ.
2Nandi, mbi ka leviděndi âvě pâkwěpâkwě. Hilakěte, mepolo melalo me ka těmě pě o Persia; na mua menai u ka diyi ungumba wa na meâ meěhěpi; o mâ‐a ka diyě a yâdâ na tina ya ungumba muaju, a ka vegudě běhěpi ka kita ipangiya ja Grecia.
3Ndi upolo mua ngudi u ka těměndi, u ka yambiyě na ipangiya iněně, na a haka hohonganěngo na upango muaju.
4Ndi o mâ‐a ka těmě, ipangiya jaju i ka buluwandi, na jâ‐ja kabaniya o mepupě mea oba menai; ndi hanga na ibângâ jaju, tombe hohonganěngo na ipangiya jaju i ma yambakiya: ikabojana ipangiya jaju i ka ukuwěndi paniyango o pělě ya mapâkwě ta na ekama.
5¶ Nd‘ upolo mua diko u ka diyandi na ngudi, na enami ’aju yâkâ; mâ a ka diyi na ngudi wa n‘ aju, a ka pangakiyandi; ipangiya jaju i ka kenandi.
6O ihuku ja mepuma, vâkâna bâ mětě na bâ mětě ba lataniyendi ta; mwamwajo wa upolo mua diko a ka viyandi o upolo mua ngângâ u jadi, ka ha ulato: ndi wa‐mwajo à huke ngudi ya enâ ’aju ya mwajo; na mâ wa momo à těme, tombe enâ ’aju; ndi wa mwajo a ka bweyudwěndi, na ba vanaki mâ, na a jaki mâ, na a ma yâdâkidě mâ o begombe těbeně.
7Ndi o elowani e ka viyě o metamba mea wa mwajo, ndi e ka těmě umbâkâ o iboko via wa momo, mâ ndi a ka pâyě o ukindi u jadi, na beta mboka ekolo ya upolo mua ngângâ, a ka těnidi na bâ, na mâ‐a ka balandi:
8Tepě na beanyambě beabu, na tove jabu ja bohovakwě, na beva beabu beyamu bea hika‐’tano, na bea eveyu, beâ ndi ibeaju be ka valaně mbwedi o Ijipt; a ka himbamandi n‘ upolo mua ngângâ mepuma meâkâ.
9A ka pândi o enge ya upolo mua diko, ndi a ka timbate o ehe ’aju mětě.
10Na bana baju ba ka yanandi eduka, ba ka latěndi ebimba ya ngudi eněně, e ka pâyě, ya kulumana, na yâ‐ya pudungana; ba ka timbandi, ka yana, kwanga na o mbok‘ ’aju ekolo.
11Na upolo mua diko u ka ’muwandi na jeku, na mâ‐a puliya ka yana na mâ, hângě na upolo mua ngângâ; nd‘ a ka těděndi ndumba eněně, ndi ndumba e ka věwěndi o ikadu jaju.
12Ndi ndumba e ka betiyandi, na ebumulem‘ ’aju e ka ngandamandi; a ka kwehěndi mabo ma tâjeni, ndi à bale.
13Ndi upolo mua ngângâ u ka timbandi, na mâ‐a tědě pě ndumba eněně wa na ya boho; a ka viyandi o ihuku ja begombe, paniyango ja mepuma na ukindi uněně na ngumba eitě.
14O begombe těbeně baitě ba ka těmě ka těnidě na upolo mua diko: tepě na bana ba mesâsâwě o njamba ya bato bâvě ba ka tědě nyolo jabu ka timě jěně; ndi ba ka kwandi.
15Nonaně ndi o upolo mua ngângâ u ka pâyě, na mâ‐a hopa ekandangolo, a nângâ mboka e di na kâtâ eyamu; na benâ bea wa diko beà huke, tombe na bato baju ba pânwěngo, na ngudi ya huka yà diye pě.
16Ndi a vakě ka těnidě na mâ a ka handi hohonganěngo na upango muaju mětě, wà diye na a ka těmě o boho bwaju: a ka těměndi o ehe ya ivenda, ujilo u ka diyandi o ikadu jaju.
17A ka tědi boho bwaju na a vake na ngudi ya ipangiya jaju jěhěpi, bâ na ba de; a ka handi itândidi viaju; na mâ‐a ka vi mâ itângâ via bajo, ka jongolidě viâ; ndi vià těme, na viâ‐vià diye na mâ pělě pâkâ.
18Ekae tombango, vâkâna a vongudi boho bwaju o nenge, a ka nângândi iitě; ndi enami e ka kovandi ikili jaju i věkidi i dâkâ; e! tepě, a ka kovandi ikili jaju i timbaka na mâ mětě.
19Nandi běngě a vongwakidě boho bwaju o pělě ya mboka‐ikolo ja ehe ’aju mětě; ndi a ka kâbândi, na mâ‐a kwa, na mâ‐a duwaniye pě.
20Běngě o těměke o iboko viaju a ka pangě umbababo u pudunganaka o ivenda ja ipangiya; ndi, na hwi ihâlě, a waka, hanga na malingwa tombe na eduka.
21Na, o iboko viaju o ka těmi moto a pějěkwě uabu a ha věkidi idilwě ja ipangiya: ndi a ka pândi o egombe ya voyavoya, na a ka duwandi ipangiya na bovunganakiya.
22Na benâ bea ujambě ndi be ka viâyě bâ o boho bwaju, ba bukakiya; e! tepě na upolo mua panga.
23Ulato u ka hawě na mâ tombango, a ka handi ihadi via mamyanga: ikabojana a ka betandi, a ka diyandi a bě bâde, te na bato bahâlě.
24O egombe ya voyavoya ndi eaju e ka pâyě, paniyango na vala o loboko la enge lovângu mětě: a ka handi bea bahangwě be ha hakidi, tombe na bahangwě ba bahangwě: a ka vanjangani bâ ebwelě, na imano, na jumba: e! a ka tingiyi metingo meaju o loboko lokolo, paniyango o egombe.
25Ndi a ka veguděndi ngudi ’aju na bwayě bwaju, ka těnidě na upolo mua diko, na ukindi uněně; ndi upolo mua diko a ka yanandi o eduka na ukindi u balanakě na boněně na ngudi: ndi à těme, ikabojana ba ka tingi mâ metingo.
26E, ba jakě beja beaju te ba ka weyě mâ, na ukindi muaju u ka yambiyandi; na baitě ba ka kwandi bekengo.
27Nandi o pělě ya mepolo tě mebale ekame, bebumulema beabu be ka diyandi o iha ja iyolongo, na bâ‐ba ka kalakandi mejowa tagulu pâkâ; ndi muà longuwe; ikabojana tombekete ihuku i ka diyate o egombe ya lenudwěngo.
28Běngě a timbake o ehe ’aju na jumba iitě; na ebumulem‘ ’aju e ka těnidi na panga ya hole: na mâ‐a ka handi itândidi viaju, na mâ‐a timba o ehe ’aju mětě.
29O ’gombe e lenakudwě ndi eaju e ka timbě na pâ o diko; ndi yà diye o egombe ya madikanido ka yâ e diyakidi o ’gombe ya boho.
30Ikabojana mealo mea Kittim me ka pândi ka yana na ju, ovaně ndi o mâ‐a ka yěně jeku, na timba, na mâ‐a ka yoki ngambi na panga ya hole, na mâ‐a ka handi upango muaju; a ka paniyi botimbaka, na mâ‐a ka tanginaka ba senjakidi panga ya hole.
31Na bevolani be ka těměndi o pěl‘ ’aju, be ka jongoliděndi ndabo ya ikaliya, kwanga na iboko via nguba, ba ka věngiděndi mwambo u tumbakwě mua egombe yěhěpi, na bâ‐ba tědě manya ma pangakě evââvâ.
32Na tango e hakě bobe o pělě ya panga ndi eaju e ka jongolidě na bovungakiya; ndi bato ba yowakě Anyambě ’abu ba ka yâdândi, ba haka evěmba.
33Na, ba ka diyě na iyowě o njamba ya bato ba ka yokudě baitě; yâ te nonaně, ba ka kwandi na ukwala na ungonyi, na mbwedi na imano o hwi iitě.
34Nandi o bâ‐ba ka kwě, ba ka hanwěndi ihanwě ihâlě: ndi baitě ba ka lati bâ mětě na bâ na bovungakiya.
35Ndi ba ka diyě na iyowě bâkâ ba ka kwandi, ka bonguwa bâ, na kěngě bâ, na ka taně bâ, kwanga na vala o egombe ya ihuku: ikabojana e ngite ja egombe e lenakudwě.
36Nandi upolo a ka handi hohonganěngo na upango muaju; a ka betidi nyolo ’aju, na mâ‐a ka keni nyolo ’aju wa na bolo anyambě, a ka kalaka belombo be mamanakwě o pělě ya Anyambě ya bolo beanyambě; na mâ‐a ka pahandi kabo kwanga na ’la o egombe ya ngambi e ka timě; ikabojana e jadi lenudwěngo e ka hamandi.
37A tangine tombe beanyambě bea bahangwě, tombe na edoko ya bajo, à tangine anyambě ka anyambě; ikabojana a ka keni nyolo ’aju wa na beěhěpi.
38Ndi o iboko viaju ndi iviaju vi ka hekidě anyambě ya loboko la nguba; na anyambě ya bahangwě baju e ha yowakidě yâ nd‘ eaju e ka hekidě na hika‐’veyu na hika‐’tano, na malale ma tâ, na belombo bea sa.
39Na mâ‐a ka yani na loboko la nguba lokolo wa, na ngama ya anyambě ya ngani; a ka měmě mâ wěhěpi te uaju a ka vuhě ivenda; na mâ‐a ka pangi bâ‐ba pangakiya baitě, a ka kabakandi ehiki na ihambe.
40Nandi o ’gombe ya ihuku ndi ya upolo mua diko e ka viyě ka yana na mâ: na upolo mua ngângâ u ka viyi ka kita mâ ona ngwěnyi, na ndabo‐ja‐belapi, na bamo‐ba‐kabala, na mealo meitě; na mâ‐a ka ngiyandi o behiki, a ka yambiyandi, na pudungana.
41A ka ngiya tepě kwanga na ’la o ehe ya ivenda, behiki beitě be ka tâlângânwě; ndi ekaba ndi be ka patuwě o ikadu jaju, Idâm, na Moab, na molo mua bana ba Amân.
42A ka hambidě tepě enâ ’aju o behiki; na ehe ya Ijipt yà yonge.
43Ndi a ka diyi na ngudi ya ungumba mua hika‐’veyu na hika‐’tano, na ya belombo bea Ijipt bea tâ beěhěpi: na ba‐Libya na ba‐Ithiopia ba ka diyandi o matambi maju.
44Ndi sango oviya o madiki na oviya o ngângâ i ka hi mâ njuke. Ndi a ka valandi na jeku iitě ka jilidě na ka weya boweyaka baitě.
45Na mâ‐a ka humi meâkâ mea ikenga jaju o hanganě ya manga na ukodi mua ivenda mua hole; ndi tombekete a ka pândi o ihuku jaju, à diye na wa hana mâ.
Currently Selected:
Daniel 11: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
