Daniel 10
10
1O upuma mua Sairus, upolo mua Persia, mua melalo, elombo e salakudwi Daniel, a ma tubakwě, na, Běltishazar, na elombo tě e diyaki pâkwěpâkwě, paniyango eduka eněně; a bweyakiděte elombo tě, n‘ a diyaki na ibweyidě ja jěně tě.
2O hwi tědině, umba Daniel, mbi diyakindi mbi eyaka wiki ihuhu ilalo.
3Mbì je beja beyamu, tombe mehoni tombe ivě be‘ ù pâ o udumbu muamě, tepě mbù hiya nyolo ’amě mavulě na vilolombo, kwanga na ’la wiki ihuhu ilalo i timakidi.
4O mabo mabale na hwi inai ja ngândě ya boho, umba baka na kângâki ya viho viněně vi tubakwě, na, Hidikěl;
5Mbi betakiděndi mihâ mamě, ka umba‐mba tamuwa, hilakěte, momo bâtângo ivěla ja liněn, a jadi dingwěngo o ehen‘ ’aju, hika‐eveyu ekěngu ya Ufaz:
6Tepě nyolo ’aju e kwanaka běryl, na pwanj‘ ’aju ehini ka epělupělu, na mihâ maju pani‐ka lampi la veya, na benâ beaju na matambi maju o ehini pani‐ka nyěnyě ya hidwěngo, na joyi ja ndaga jaju pani‐ka joyi ja ebimba.
7Nd‘ umba Daniel dipâ te mbi yěněkidi jěně; jambojana bato ba diyaki n‘ umba bù yěněkě jěně, ndi ikombe iněně i bweyaki bâ, ka bâ‐ba kweya, ka kuta nyolo.
8Nonaně ndi k‘ umba‐mbi dikanakidi dipâ, na yěněkě jěně tě eněně ekadi, ngudi yu dikana pě ’mba, jambojana elang‘ ’amě ya nyolo e diyaki ya pula, mbi diye pě na ngudi.
9Ndi, mbi yokakite joyi ja ndaga jaju; o umba‐mbi yokakidi joyi ja ndaga jaju, běngě mbi kwake o viyâ vi‘ ibihi bumamango, boho bwamě na pělě ya he.
10Ndi, hilakěte, ikadu i pupanakě ’mba, jâ ndi i ’mwakidě ’mba na mabângâ mamě na o mabanjo ma makadu mamě.
11Ka mâ‐a vâ n‘ umba, na, Daniel, âvě moto a tândâkwě na ngudi, O! bweyakidě ndaga jamě i kalakě na nâvě, wa těmě de; ikabojana o âvě‐o jadi ndi umba nandi mba lomwě; o mâ‐a běki n‘ umba ndaga těkadi kalango, umba de, kabo likimaka.
12Ka mâ‐a vâ n‘ umba, na, Daniel‐O! o bangake; ikabojana oviya buhwa bwa boho ibwâvě bo těkidě ulema muâvě o ibweyidě, na ihubidě ja nyolo o boho bwa Anyambě ’âvě, te bwa ndaga jâvě bo yokanakidi; nandi mba viyandi o nyanga ya ndaga jâvě.
13Ndi enami ya ipangiya ja Persia a těněkidi n‘ umba mabo ma hwi mabale na buhwa bâkâ; ndi, hilakěte, ka Maikel, enami yâkâ ya molo, a viya ka hana ’mba, ka umba‐mba dikana omě na mepolo mea Persia.
14Nandi mbi pândi ka panga âvě o bweyakidě nyanga e ka hamě na bato bâvě o hwi ja madikanido: ikabojana jěně i ngite ja hwi iitě.
15O mâ‐a diyakidi a kala n‘ umba hohonganěngo na ndaga těkadi, mbi tângâkiděndi boho bwamě o he, mba bě emukumuku.
16Nandi, hilakětě, umbâkâ pani‐ka ehini ya bana ba bato a kupaně ba belěbu beamě; běngě mbi bumwake udumbu muamě, na kalaka, na vâkâ na a diyaki těměngo o boho bwamě, na, Paia‐O! tina ya jěně ndi ya ngěbě jamě e di ’mba timbango, mbi diye pě na ngudi.
17Ikabojana uhayi mua paia ’kaně u ka kala lě na paia ’kaně na‐ě? jambojana, umba, o pěl‘ ’amě, mbu diyaka pě na ngudi, tombe na pudi yù dikanaka n‘ umba.
18Jâ ndi ja umbâkâ a kupaně pě ’mba, ehini ka moto, ka mâ‐a yâdidě ’mba.
19Ka mâ‐a vâ, na, Moto a tândâkwě na ngudi‐O! o bangake, we; jonga na nâvě, yâdâkâ, e! yâdâkâ. O mâ‐a kali n‘ umba, k‘ umba‐mba yâdiyě, na vâkâ, na, Nandi, Paia a kalake; ikabojana o yâdidi ’mba.
20Jâ ndi jaju ja vâ, na, O yowuděte ka umba‐mbi vakě o âvě‐o jadi? nandi mbi timbakandi ka yana na enami ya Persia: o umba‐mbi ka pumě, umbwakiyate, enami ya Grecia e pâkâ.
21Ndi mbi t‘ o languwa âvě nyanga e di lěndwěngo o ilěndwě ja pâkwěpâkwě; o ’bě n‘ umbâkâ a dibakě n‘ umba, o ikita ja ’kaba, kabo Maikěl enami ’anyu.
Currently Selected:
Daniel 10: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
