Roma 8
8
Amanya Hohoi to Oloyiri
1Ihwania obeŋ aŋoco ye jyo enosok iko Yesu Kristo. 2Nyo adwaran ono Oloyiri ono nesu on owon’to jyo Yesu Kristo ohohi ani jyo adwaran ono neyyau iko naye. 3Nyo ihan Hollum ariŋ on obeŋi efahita oremehini ihanio nyo ofyahaji ahwattek. Ette inyi ifahuna Lonyi ihwa atulo el eyyau’to irari ehumi te eyyata. Tania itaye inyi adwaran ono eyyata to hwattek wati. 4Tania eremik hohoi efaha efahita, hohoi hul ebeŋ’to edaha te ewahiti huno ahwan ati ta adwaran ono Oloyiri ol Olibo. 5Nyo hul adahai te ewahiti huno ahwan igigiloi isi te emuniti hwattek hosi. Ati hya hul adahai’to te ewahiti huno Oloyiri igigiloi isi te erre huno Oloyiri. 6Nyo hul ihanani’to egigilita hosi jyo erre hutto hwattek hosi, oyei adi, ati hul ihanani’to egigilita hosi jyo erre huno Oloyiri owoni isi iko nesu bwo nelik tajya. 7Hul ihanani’to egigilita hosi jyo erre hutto hwattek hosi, arai isi amyorok hulo Hollum bwo fe ittallihi isi niŋyo efahita huno Hollum ’tuŋ. 8Obeŋi hya oremehini itamuno Hollum hul igigiloi te erre hutto hwattek hosi.
9Ati ibyaŋata tai irata hulo afau ati hulo Oloyiri kuyya amanya Oloyiri olo Hollum itajya hatai. Ati lya ol obeŋ iko Oloyiri olo Kristo obeŋ inyi ara aholonyi. 10Kuyya owon Kristo itajya hatai ifuti oloyirihyen hatai iko nesu nyo ihyanani jihatai nalibori, dwadi bu oyei ahwattek hatai te eyyata. 11Kuyya amanya Oloyiri olo Hollum linya itubuhu’to Yesu to ye, itwajin hatai, isyo adi inyi nesu ihwattek hatai to Oloyiri honyi al amanya’to itwajin hatai.
12Ihwania illarak hoŋ, era hohoi awati horos ati ebeŋ hohoi era awati horos huno ahwattek ijifatyere emanyiti huno ahwattek. 13Nyo al ijifatyete tai emanyiti huno ahwattek iyeti adi itai, ati al ittohoro tai ehanita huno ahwattek to Oloyiri iswoto adi itai. 14Nyo hul itadihoro Oloyiri olo Hollum arai isi lonyirok Hollum. 15Ibyaŋata tai irata apiti hul abaŋi ati irata tai lonyirok to Oloyiri al isyo Hollum jihatai ette hohoi iloŋo inyi Monye hohoi. 16Itahutak Oloyiri honyi arabotye iko oloyirihyen hohoi etamijani jo era hohoi lonyirok hulo Hollum. 17Kuyya era hohoi lonyirok era hohoi bwo fe aharutak. Era hohoi aharutak hulo Hollum bwo fe erutak adi hohoi iko Kristo. Al eŋiŋara hohoi ettigemita iko Kristo ehor adi hohoi akwatan ikonyi.
18Ebeŋ hohoi eremik itarrijo ettigemita huno amanya ana iko akwatan on obolo’to an italeyeuni adi jihohoi. 19Itilai eyyeti daŋ ta awahan on obolo etaleyeuna ono lonyirok hulo Hollum. 20Ilettohori arrohoji eyyeti daŋ, obyaŋara ta awahan hosi ati ara awahan ono Hollum al ara’to ahobu hosi. 21Ati owoni eyyeti iko eyihina jo ohohini adi isi jyo efico ono arrohoji, ette fwanna manya ta akwatan ono aduri hulo Hollum. 22Emijak hohoi jo many iko ihwania itudetai eyyeti daŋ bwo fe iburaŋatye ihwa aŋotte on ojo’to esyo. 23Obyaŋara eyyeti ijai ati etudeta hohoi bwo fe ta atajya hohoi, dwadi efwotu hohoi Oloyiri inya ara etteri olo esyorita huno Hollum. Etudeta hohoi bwo fe etila oloŋ an ifwotuniere adi Hollum hohoi olonyirok honyi an ara ahohina ono ahwattek hohoi. 24Nyo italahuni hohoi te eyihina. Ihwania eyihina on oleyo’to obeŋ ara eyihina, ?nyo ŋai al iyihi’to jyo erre hun igonyu inyi? 25Ati al eyihi hohoi jyo erre hun ebeŋ hohoi egonyu, etila hohoi ta adihan dee.
26Bwo fe olwahyo Oloyiri elihita hohoi nyo etimo hohoi imojori on oyyu ati omojo Oloyiri tohohoi ta ayirita hun obeŋ tulo oremik itaniŋuna. 27Bwo Hollum ol ottifya’to atajya wati omijak anyo igigilo Oloyiri, nyo omojo, Oloyiri ta aati Hollum ta awahan ono Hollum.
Agalihina Hohoi Erre daŋ to Yesu
28Emijak hohoi jo igyama Hollum te erre daŋ iyaŋuniere ayiji jyo hya hul omunoi’to inyi, ojo hul iloŋo inyi ta awahan honyi. 29Hinya omijak Hollum, onyimu nya inyi isi ihuhumyere ihwa Lonyi honyi jo oŋida Lonyi honyi ara oloŋeu jyo illarak honyi hul olwaji’to. 30Bwo fe hya hinya onyimu inyi, iloŋu inyi isi daŋ. Bwo fe jyo hul iloŋo inyi itimwarak inyi isi ikonyi. Bwo fe hya hul itimwarak inyi, isyo inyi akwatan honyi jihosi.
31?Anyo attadi ejo hohoi jyo erre huna? Kuyya ewon Hollum ikohoi, ?ŋai adi oremik itarroho hohoi? Obeŋ tulo. 32Obeŋ nya Hollum italahu Lonyi honyi iholoŋ ye honyi, ati isyo inyi tohohoi daŋ. Tania isyo adi inyi jihohoi erre daŋ ikonyi. 33?Ŋai ol oremik’to ’rasana obo eram jyo onyimot hulo Hollum? Itimwarak nya Hollum isi. 34?Ŋai ol oremik’to inyyak ŋot aye jihosi? Obeŋ tulo. Ara Yesu Kristo inya oye’to bwo fe ibuhu ette itoŋo ihani iŋet ono Hollum, ol omojo’to tohohoi. 35?Ŋai ol oremik’to itapek hohoi jyo amuno ono Kristo? ?Oremehini adi ettigemita, kuyya ejiriŋa on obolo, ettigemita wati, ahure on obolo, nelocaŋ bebe, arrohoji, iko arrem? 36Ihwa igyoroni igyerita ojo,
“Oŋitek daŋ edaha hohoi ihiji hirre hun oyeyeri’to te eram hoi.
Era hohoi daŋ ihwa akyoro hun ofwoi ŋoco.”
37Ati eyyala hohoi erre huna daŋ to lya ol omuno’to hohoi. 38Nyo amijak ni obeŋ obo ariŋ oremik itapek hohoi jyo amuno honyi; obeŋ dwadi aye, nesu, anjelohyen, eleittaha hulo ajohin, edwariti, erre hun iburi’to bur, erre hun ofwonni’to, negoliti huno ajohin, 39erre hutte dou, erre hutta fau, kuyya obo ariŋ jyo eyyeti daŋ; jyo erre huna daŋ, obeŋ obo oremik itapek hohoi jyo namuno ono Hollum on owon’to jyo Yesu Kristo Hobu hohoi.
Currently Selected:
Roma 8: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
