Roma 4
4
Arahan Abramo Etamijani Jihohoi
1?Ejo adi hohoi anyo ta hohonyi hohoi Abramo? 2Nyo kuyya itimwarani Abramo te ehanita honyi oremik inyi itadara ati obyaŋara ihosyere Hollum. 3?Ati ojori egyerita aŋai? “Iruk Abramo jyo Hollum, tania ihenuni inyi ahaliboroni.” 4Kuyya igyama atulo, obeŋi edumiti honyi arai esyoryo, ati arai ihwa ahoros. 5Ati jyo alya ol obeŋ’to igyama ati iruk inyi jyo lya al itimwarak arrohojak, ihyanani eruk honyi ihwa alibori. 6Ihwa iramak Davide jo omuno adi lya al ihenu Hollum ahaliboroni, ati obeŋ ara te ehanita honyi. 7Ojo Davide jo,
“Hotomunohi hya hul ahohinie arrohojita hosi,
Bwo fe imuhonie eyyata hosi.
8Hotomunoi atulo ol obeŋ Hobu ihyanak eyyata honyi jihonyi.”
9?Onyurani aati Yudea hama emuniti hwa? Obeŋ, onyurani adi bwo fe paganohyen. Nyo ejo hohoi jo ihyanani nya alibori jyo Abramo ta neruk honyi. 10?Aŋai nya ihyanani alibori jihonyi? ?To ninya oŋotori inyi ahwan honyi kuyya hobeŋ inyi oŋoto? Ihyanani jihonyi hobeŋ inyi oŋoto. 11Ifwotu nya inyi aŋoto etamijani ono neruk honyi on owon’to jihonyi hobeŋ inyi oŋoto. Tania oŋida ara inyi ohohonyi heruhok daŋ dwadi bu hobeŋi isi oŋotoi jo oŋida oremehini ihyanana jihosi alibori. 12Ara inyi bwo fe hohonyi haŋotok hul ijifatye’to neruk ono hohonyi hohoi Abramo inya iruk’to hobeŋ inyi oŋoto.
Attuna Corit ta Neruk
13Nyo obeŋi nya Abramo iko hutto woyo honyi ifwotuni ecoriti te ejifatyo hosi efahita. Ati ifwotuni isi ecorit ania ta neruk hosi an iyauno alibori. Ara inyi ecorit on ojo ifwotuni adi isi erre arryai jyo afau ana. 14Nyo kuyya hya hul ijifatye’to efahita arai aharutak, ara adi neruk asai bwo obeŋ obo ayiji jyo ecorit. 15Nyo iyaŋuno efahi abahyo ati al obeŋ efahi obeŋ bwo fe amesyo.
16-17Ara awoyo hiram honyi ihwa ana jo ottu ecorit ania ta neruk jo oŋida oleyo amehino ono Hollum, ette ecorit ’tuna jyo edetiti daŋ huno Abramo. Obyaŋara jyo hul ijifatye efahita hama ati iko jyo hul owoni iko neruk ihwo ono Abramo. Nyo ara inyi hohonyi hohoi daŋ ihosyere Hollum al iruhori inyi. Ihwa igyoroni jo, “Ehumak ni iye amonye woi wati arryai.” Inyi Hollum alya al isyo’to nesu jyo ayak bwo ojo, ijara erre hun obeŋi’to awattai hatawanahi. 18Owon Abramo iko eyihina dwadi obeŋ obo ariŋ jihonyi iyihiniere, ati odulo inyi iruk jo ottu adi inyi rahan amonye woi wati arryai ihwa ninya iramanierek jihonyi jo, “Obeŋ adi tulo ihenu awoi duri hoi.” 19Obeŋ neruk honyi opwak to ninya omijyere inyi ahwan honyi, dwadi bu arai aŋasi honyi esiha abotye ihwa ilyaha aye jihonyi. Dwadi igigilo inyi te eholofi ono Sara, obeŋ neruk honyi opwak. 20Obeŋ nya inyi ikuyya ta abyaŋan iruk al igigilo inyi te ecorit ono Hollum ati oboboloruno neruk honyi ette inyi isyarana etahabuyo jyo Hollum. 21Nyo omijak inyi ahode jo oremik Hollum ihanio erre hunya ocorok inyi. 22Tania ihyanani eruk honyi jihonyi ihwa alibori. 23Ihwania obeŋi nya igyoroni erre huna te eram honyi, 24ati ara tohohoi bwo fe nyo ihyanani alibori jihohoi hul eruk’to jyo Hollum al itubuhu’to Hobu hohoi Yesu to ye. 25Nyo itinyyaŋani nya inyi iyeri te eyyata hohoi bwo ibuhu inyi itimwaraniere hohoi.
Currently Selected:
Roma 4: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
