Roma 3
3
1?Anyo ayiji irari Ayudetanani? ?Anyo bwo fe ayiji iŋotori? 2Oyyu bebe irari Ayudetanani bwo fe iŋotori. Ahosyere isyo nya Hollum ekyanita honyi jyo laati Yudea. 3Kuyya omuk hulosi obeŋi iyihini jyo Hollum, ati ta abyaŋan hosi yihina jyo Hollum, ?itapwak adi inyi ecoriti honyi? 4Obeŋ ’tuŋ. Dwadi ogesemi laati daŋ ara Hollum ahode ihwa igyoroni,
“Tania oleyo abisan hoi te ekyanita hoi,
Bwo fe igalik adi iye ta asaa ono aŋoco.”
5-6Ati kuyya itahutani arrohojita hohoi ayiji ono Hollum, ?anyo adi ejo hohoi? ?Ihanio Hollum on orroho al isyo inyi jihohoi abahyo? Obeŋ ’tuŋ. Ekyana ni ihwa ikyanarik omuk laati. Nyo kuyya ara ihwania, ?aŋai oremik Hollum ŋot afau? 7Ati kuyya ta agesemita hoŋ oleyo nelahode ono Hollum iko akwatan honyi, ?nyo oŋot inyi eyyau jihoŋ? 8Hafatta iyyautari oŋida ayiji oleyo. Ihwa ojori laati ettiyenio ni, ati ogesemi isi. Orrohoji hul ikyanai’to ihwania.
Obeŋ obo ol Olibo
9?Anyo attadi? ?Eyyu hohoi Yudea egalik paganohyen? Obeŋ ’tuŋ. Ihwa etahutak dwo ni jo, arai laati daŋ apiti jyo eyyau, laati hutto Yudea iko hutto Grik. 10Ihwa igyoroni jo,
“Obeŋ obo ol olibo ’tuŋ, dwadi abotye.
11Obeŋ obo ol itaniŋu.
Obeŋ obo ol ottifya Hollum.
12Isyabarai isi daŋ addi jyo Hollum
Ette fwanna ’rohoji.
Obeŋ obo ol ihanio on oyyu, dwadi abotye.
13Arai ogolohi hosi ihwa elumyo hun obwarai’to.
Ta aŋadyefa hosi ikyanai isi erre huno enyobyo.
Arai ekyanita hosi ihwa eyyeri muno to hutuhe hosi.
14Ifuti etuhe hosi iko epitita iko aŋuŋusya.
15Awahi ejek hosi afwatan irryomoniere iko aati.
16Owon etatturyo iko ejiriŋa ikota hosi.
17Bwo obeŋi isi omijani ekoi ono nelik tajya.
18Bwo obeŋi isi abaŋi Hollum ta atajya hosi.”
19Emijak hohoi jo erre daŋ hun igyoroni ifahita arai isi ta aati hul ifwotuni efahita, jo oŋida obeŋ obo elyat jyo obo atulo ati ofwoi aati daŋ jyo aŋoco ono Hollum. 20Nyo obeŋi adi italibori obo atulo to hoŋite Hollum te ejifatyo honyi efahita, nyo te efahita omijani isi neyyau.
Attuna Libori ta Neruk
21-22Ati ihwania egonyu hohoi aŋai itimoru Hollum laati jihonyi, obyaŋara te efahita. Nyo igyoroni nya efahita iko eyak sayyo ta alibori on ottu’to jyo Hollum ta neruk jyo Yesu Kristo. Isyori ana jyo eruhok daŋ nyo obeŋ alufaji. 23Nyo iyyauni aati daŋ ette ilak fanyan ihosyere Hollum. 24Ati italibo Hollum isi asai ta amehino honyi ta ahohina ono Yesu Kristo eyyata. 25Nyo isyo nya Hollum inyi irari ehumi itimwaraniere laati ta neruk jyo naye honyi. Ihanio Hollum ihwania itahutaniere alibori honyi, nyo odihu nya inyi laati ta abyaŋan honyi igigilo te eyyata hunya beryen. 26Ati to oŋitek huna itahutak inyi jo ara inyi Hollum ol omijak aŋoco bwo fe italibo aati daŋ hul iruhi’to jyo Yesu.
27?Tania owon etadara hohoi aja? Obeŋ bu inyi. ?Aŋai obeŋ etadara? ?Ilak alibori ottu te efaha efahita? Obeŋ, ottu inyi ta neruk hohoi. 28Nyo ejo hohoi jo itimwarani atulo te eyihina honyi, obyaŋara te efaha honyi efahita. 29?Ara Hollum Hobu olo Yudea hama? ?Ilak ara inyi bwo fe Hollum olo paganohyen? Afe, ara inyi olo paganohyen bwo fe. 30Nyo owon Hollum abotye bwo itimwarak adi inyi laati Yudea iko paganohyen daŋ ta neruk hosi hama. 31?Tania etapwak hohoi efahita ta neruk? Obeŋ ’tun. Ati etagol hohoi efahita.
Currently Selected:
Roma 3: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
