Roma 15
15
Itamunoto Illarak Hatai
1Oŋida hohoi hul egol’to ta neruk edihu epalita huno elihak bwo fe ebeŋ ettifya etamunoyo hwattek hohoi. 2Ijara hohoi daŋ etamunoyo hutto lonyihari te erre hun oyiji itaboloryere isi. 3Nyo obeŋ nya Kristo itamunoyo ahwan honyi ati ihwa igyoroni ojo, “Emoriti huno hya hul omorye’to iye emorye ani.” 4Nyo erre hunya igyoroni igyerita beryen igyoroni nya ittiyeniere hohoi bwo fe itilihyere hohoi jo oŋida hohoi ewon iko eyihina bwo fe adihan. 5Ihwania ijara Hollum olo adihan iko etilihyo hesyara jihatai amanya iko egigilo arabotye to Yesu Kristo. 6Jo oŋida itahabuyete tai Hollum, Monye Hobu hohoi Yesu Kristo ta ataji abotye iko etuk abotye.
Afanyan Sayyo hun Oyiji jyo Paganohyen
7Tania ifwotutati illarak hatai ta arryaha ihwa inya ifwotuniere Kristo itai itahabuyere Hollum. 8Nyo ajo ni jo ottu nya Kristo irari apit jyo aati Yudea itahutaniere nelahode ono Hollum bwo fe itasiruniere ecoriti hunya ocorok Hollum jyo hohonyok hohoi. 9Bwo fe jo oŋida paganohyen itahabuye Hollum ta amehino honyi. Ihwa igyoroni ojo,
“Tania etahuyo adi ni iye ihiji paganohyen,
Bwo fe edolo adi ni ta afure hoi.”
10Inyyak bu inyi jaran,
“Itai paganohyen, omunoti iko laati hulo Hollum.”
11Ojo bwo fe,
“Itai paganohyen, itahabuyete Hobu,
Ijara aati daŋ itahabuye inyi.”
12Bwo fe inyyak Isaya jaran,
“Ottu adi obo to woyo ba Yese.
Lya ol odetuno’to ilettohori adi paganohyen,
Iyihini adi paganohyen jihonyi.”
13Ihwania ijara Hollum olo eyihina itufutak itai ta namuno iko nelik tajya ta neruk, jo oŋida neyihina hatai oboboloruno ta adwaran ono Oloyiri ol Olibo.
14Illarak hoŋ, ani ta ahwan hoŋ eyihi ni jo ifutata tai iko nayiji bwo ofyoro daŋ hun iremehina tai isiŋyere illarak hatai. 15Ati egyoro ni jihatai te eŋere itagiluniere itai nyo ta amehino an isyo Hollum jihoŋ 16irari apit olo Yesu Kristo jyo paganohyen. Ara ni ihwa ehumani te ettiyenio asayyo huno Hollum, jo oŋida Hollum ifwotu paganohyen ihwa ehumi an ittaŋani ta Oloyiri ol Olibo. 17Tania etadara ni to Yesu Kristo te egyama hoŋ jyo Hollum. 18Nyo ettallik ni ekyana to obo ariŋ arari te erre hun ihanio Kristo toni iyaŋuniere aniŋyo te ekyanita iko ehanita jyo paganohyen. 19Ottu ana jihosi ta adwaran ono etamijanita iko ellillihita bwo fe ta adwaran ono Oloyiri ol Olibo. Tania atuk ni ettiyenio asayyo huno Kristo imisihi daŋ to Yerusalem many ifau Iliriko. 20Many beryen awak ni ittiyeniere asayyo hun oyiji’to jyo amasik huno hobeŋi’to omijani afure Kristo. Jo oŋida ani abeŋ ettiyenio jyo amaji an ittiyeniere obo atulo. 21Ati ihwa igyoroni jo,
“Itaniŋuni adi hulo hobeŋi’to itayiruni eram honyi.
Omijani adi hulo hobeŋi’to itaniŋuni afure honyi.”
Ajaran Paulo Leten Roma
22Inyi ana an itihotyerek ani ittuniere jihatai enyyahita arryai. 23Ati ihwania obeŋ obo amaji jihoŋ dini igyamari. Bwo fe ta aŋasi arryai awak ni ittuniere jihatai. 24Tania awak ni mijaro itai al alo ni Espania bwo iremehina tai ilwak ani ta adaha hoŋ al etuk hohoi abala. 25Ati ihwania alo ni Yerusalem iyari alwahyo jyo aati Hollum. 26Nyo owahi nya aati hulo Masedonia iko Akaya ilwahyere aati Hollum alocaŋak hutto Yerusalem. 27Omunoi aati hulo Masedonia iko Akaya bebe ilwahyere alocaŋak hya nyo arai isi awati horos hosi. Nyo kuyya ifwotuni paganohyen jyo Yudea erre hun oyiji huno oloyiri, ara ahoros jihosi ilwahyere isi te erre huno ahwan. 28Tania al atuk ni egyama ania bwo fe etagol ni isi ta alwahyo ana attu adi ni atta latai al alo ni Espania. 29Bwo amijak ni al attu ni jihatai attu adi ni al efut iko emuniti huno Kristo.
30Ihwania elolya ni jihatai illarak to Hobu hohoi Yesu Kristo bwo fe ta namuno ono Oloyiri; hamojoti ikoŋ bebe jyo Hollum toni. 31Omojoti jo oŋida italahuni ani jyo aati hutto Yudea hul obeŋi’to iruhi. Omojoti bwo fe jo oŋida aati Hollum hutto Yerusalem ifwotuni ta amuno alwahyo an eyaŋuno ni. 32Tania ta awahan ono Hollum ijara ani attu jihatai ta amuno bwo anyurak ayiri ihiji hatai. 33Ihwania ijara Hollum al isyo’to nelik tajya hatawana jihatai. Amen.
Currently Selected:
Roma 15: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
