Ehanita 28
28
Afanyan Paulo Iful Melita
1Eris hohoi daŋ ifau, enyurak hohoi afure ono aful ana inyi Melita. 2Omehinie laati hulo Melita jihohoi bebe. Inahini isi neema jihohoi isujari nyo asayo ahide bwo fe ihacoro jihohoi bebe. 3Iduhu Paulo omuk eyek ette ihanana ihima ati ottu epakidaŋ totwa ette illullur aani Paulo. 4Ninya igonyuni laati amunu ania illullur aani honyi, ette isi jaran ta ahwattek hosi, Ahode ara atulo olo ahattohoni. Dwadi iris inyi to hari oŋoti aye jihonyi. 5Attati Paulo illillihana amunu itwa hima bwo aani honyi obeŋ odyaha. 6Itilai aati ette ikikorihina jihonyi nyo igigiloi isi oyejak adi naani honyi kuyya oye adi inyi kwak. Ati gaa igonyuni isi obeŋi omuk erre jihonyi, ette isi jaran ara inyi ajok.
7Owoni amatta hun ilyahai jyo amaji ania huno hobu olo aful ania afure honyi Pubilo. Iloŋu inyi hohoi ihaji honyi ette isyo hohoi aŋiyo ta oŋitek hunihoi. 8Attati monye Pubilo ŋwai bebe iko ayoti bwo fe onok ahwan honyi bebe. Alo Paulo jihonyi ette mojo ette iyyabana ahas honyi jihonyi ette inyi ŋidari. 9Ninya itaniŋuni laati ehani ana ette aŋwak daŋ hulo aful ania fwanna jyo Paulo ette inyi itaŋida isi daŋ. 10Isyori isi esyorita arryai jihohoi bwo fe al efwo hohoi ta ababur obo ifihani isi erre daŋ hun ewak hohoi itwa babur.
Afanyan Hosi Roma
11Ihalu omuk ayafajin hunihoi ebusak hohoi aful ania ta ababur obo an itoŋotyo dia ta ameyu. Inyi ababur ono Alesandro on owon iko arrijori ono aturot ihide honyi. 12Ninya efany hohoi ifau Siraco ette hohoi rasa dia oŋitek hunihoi. 13Ihalu efany hohoi imiji Rejuma ette oyyami inyyak ’tuna to wor. Ihalu omuk oŋitek arrihai efany hohoi imiji Puteli. 14Enyurak hohoi dia omuk illarak ette itoŋo ikosi oŋitek hattarik. Ihalu efany hohoi Roma. 15Itaniŋuni illarak hya teyya jo efwonni hohoi ette isi fwanna irraŋuniere hohoi many amaji lokiko ono Apio bwo fe jyo akulubi hunihoi. Ninya igonyu Paulo isi ojo inyi humo jyo Hollum bwo itagol ataji honyi. 16Teyya efany hohoi Roma ette Paulo itoŋo iko oseŋeritanani abotye ihaji abotye.
Ettiyenio Honyi Roma
17Ihalu omuk oŋitek hunihoi iloŋo Paulo eleittaha hulo aati Yudea hul owoni dia ifwanniere jihonyi. Ette inyi jaran jihosi, Hotto hulo, abeŋ nya ni ehanio obo ariŋ on orroho jyo laati hohoi kuyya emohiti huno hohonyok hohoi ati ifitani nya isi ani ibabus Yerusalem ette isyo ani jyo aati Roma. 18Iwwahai isi neram hoŋ bwo fe awahi isi hohina ani nyo obeŋi isi onyurani obo ariŋ on osiru’to ittohori ani. 19Ati ihari Yudea hohina ani attati ni jaran ejulum ni eram hoŋ jyo Cesare ati abeŋ ni arrasak laati Yudea obo ariŋ. 20Ihwania eloŋo ni itai ikyanari jihatai nyo ifitani isi ani te eram lya al iyihini Israele. 21Ojori isi jihonyi, Ebeŋ hohoi efwotu obo awaraga to Yudea te eram hoi bwo illarak hohoi hul ofwonni dini obeŋi ikyanai omuk erre hun orrohoji teye. 22Ati ewak hohoi etaniŋuna to hutuk hoi eram ana nyo etaniŋu hohoi jyo laati daŋ jo orrohoji laati hul iruhi’to ihwania.
23Tania ojori isi efwonni adi isi to obo oloŋ attati isi fwanna ihaji Paulo iko laati arryai. Ette inyi ittittoyo isi te eram ono olobye Hollum ta amotye many arari attari itahutaniere isi eram Yesu to buhi huno Mose iko eyak sayyo. 24Ati iruhi nya omuk ekyanita honyi bwo omuk ihari. 25Hofwoi isi ette isi ŋalafaru ta ahwattek hosi te ekyanita huno Paulo jihosi hun ojori, Ahode ikyana nya Oloyiri nelahode ibuk ono eyani sayyo Isaya ninya ojari inyi jyo hohonyok hatai jo:
26“Ifwatta jyo laati hulo ikyanari jo,
Itayirutati adi itai ahode ati ibyaŋata tai itaniŋuna.
Imijyete adi itai ahode ati ibyaŋata tai igonyuna.
27Nyo odwari atajya wati hulo
Bwo fe ottuhoi ayyaha hosi.
Imuti isi oŋite hosi
Ŋadi isi igonyuni to oŋite hosi.
Kuyya itayiruni ta ayyaha hosi,
Kuyya itaniŋuni ta atajya hosi,
Attadi isi cohuno jihoŋ ifwotuniere aŋidari.”
28Ihwania imijyete, ahode, ifak Hollum etalahuna honyi jyo paganohyen, bwo fe oniŋye adi isi. 29Ninya likyana inyi ihwania ette Yudea caharu bwo aŋaŋalafarai te ekoi.
30Ihalu erre huna amanya Paulo aŋasi arrihai ihaji honyi hama ette rehuna aati daŋ hul ofwonni jihonyi. 31Ittittoyo inyi te eŋere jihosi daŋ attuna ono olobye Hollum bwo fe eram ono Hobu Yesu Kristo ati obeŋ obo atulo itik inyi.
Currently Selected:
Ehanita 28: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
