Ehanita 27
27
Naleten Paulo Roma
1Ninya lawon adaha Italya ta ababur eyarai nya Paulo iko lomuk ababus jyo eleittok olo oseŋer hulo Agusto, afure honyi Julio. 2Ejiŋak hohoi jyo ababur ninya ottu’to to Adramito bwo ojo nya inyi alo jyo omuk amisihi hutta fau Asia ilotifor hari. Tania ebusak nya hohoi olotifor ette fwatan ta ababur iko lobo latulo olo Tesalonika ifau Masedonia, afure honyi Aristako. 3Nya motye efany hohoi Sidon. Ati omehino nya Julio jyo Paulo ette harana inyi hetelo jyo mottyarak honyi liŋiyere. 4Ninya ebusak hohoi amaji ania edaha hohoi ta ababur iwoyo Ciporo nyo ohuco oyyami bebe. 5Ette hohoi ’laŋan aari etteger Silisia iko Pamfilia ette fanyan jyo Mira ifau Licea. 6Dia onyurak eleittok olo oseŋer ababur obo ono Alesandria on olo Italya ette itajiŋana hohoi dia. 7Edaha nya hohoi kai kai to omuk oŋitek ati efany hohoi Cindo ta nettigemyo on obolo. Ninya arasari oyyami hucere bebe ebeŋ hohoi eremik fanyan dia ati edaha hohoi iwoyo Kreto iger Solomone. 8Ta nettigemyo ono oyyami edaha hohoi kai ette fanyan jyo amaji an ifurani amaji yiri ilyaha amiji ono Lasea.
9Nyo allaŋi oŋitek arryai bwo fe oyeyer nya adaha hosi, allaŋi bwo fe oŋitek huno aferuna. Ihwania ojo Paulo jihosi, 10Hotto hulo, egigilo ni orroho adi jihohoi el efwo hohoi ihwania. Olitohi adi ababur iko erre daŋ huttotwa bwo fe ara heye hohoi. 11Ati eleittok olo oseŋer obeŋ itaniŋu ekyanita huno Paulo ati oniŋyo inyi ekyanita huno monye babur. 12Iwwahai isi ette jaran, Oyyu adi lefwo hohoi kwak nyo orroho amaji ania itoŋori ta ameyu. Kuyya el efany adi hohoi Finis, amiji ono Kreto ottohide, oyyu adi itoŋori dia ta ameyu.
Oyyami on Obolo’to
13Ninya al ottu oyyami kai to wor ojori isi oyyu adi adaha ihwania ette isi busana amaji ania ette fwatan ilyahari olotifor ono Kreto. 14Ati ihalu kai odyoto oyyami on obolo’to bebe an ifurani Erekilo. 15Attati inef ababur ette iloit inyi ette iyaro addi. 16Iyaro oyyami hohoi kokwak ilyaha ilotifor ono obo aful an ifurani Kauda ette hohoi ifitana atogol ono ababur. 17Okemye isi ihuhumaniere atogol on ogol, ati ihalu al ohuco oyyami bebe bebe abaŋi isi jo ŋadi isi esyak amorwoi ette isi houna aboŋo ono ababur bwo oyyami ette hutaru isi hama. 18Nya motye, nyo eyaro oyyami ababur bebe, ette isi itteryo ibiryo hirre hun iyatye isi ihari. 19Ihalu amotye nya inyyahi isi ibirotya asenuhi iko nerre hutto babur. 20To oŋitek arryai obeŋ nya oloŋ afaŋ kuyya bu elelyefi nyo obolo asiŋit attati aati byaŋan inyyak igigilo ta nesu.
21To oŋitek arryai obeŋi isi oŋiye, attati Paulo dyoto ’tehiji hosi ette jaran, Hotto hulo, oyyu dwo kuyya itayiryete nya itai ani. Kuyya erasa nya hohoi Kreto ebeŋ dwo hohoi enyurak ettigemita ihwo huna. 22Ati itagoloto atajya hatai nyo obeŋ adi obo alatai oye. Olito adi ababur hama. 23Nyo ta arwe ana owotya anjelo olo Hollum ihosyere hoŋ, inyi Hollum al ara’to a Hobu hoŋ el etahabuyo ni. 24Ojo inyi, Paulo, hebaŋ, nyo iwotya adi iye ihosyere Cesare bwo fe italahu adi Hollum aati daŋ hul ledahati’to ikoye. 25Ihwania itagoloto atajya hatai nyo eyihi ni jyo Hollum jo idwoŋ adi ihwa ikyana nya inyi jihoŋ. 26Ati oŋida hohoi dwo ewotya jyo obo aful.
27Ihalu oŋitek ’tomon haŋwan iyaro oyyami hohoi ta arwe ihiji hari an ifuri Adria. Ihiji harwe igigiloi aati hul igyamai’to ababur jo elyaha hohoi jyo obo olotifor. 28Tania okemye isi awudori hari ette nyurana inyi ayardahyen atomwana aŋwan. Ihalu kai inyyahi isi kemyo awudori ette nyurana ayardahyen atomwana hunihoi. 29Abaŋi nya isi jo ŋadi isi esyak amorwoi ette isi itadohina abilat aŋwan hun iryatani ta aririk hun odiŋi ’tehalu babur hun inefi’to ababur ifau ette isi mojo jo ijara afaŋan hetettu. 30Bwo fe ojori omuk hulosi efuho to babur itwa togol on odiha. Itusuruni isi atogol ania itwa hari, ojori efwo adi isi inefuna omom ono ababur ta abilata iko ta aririk. 31Ojo Paulo jyo eleittok olo oseŋer iko oseŋer, Al obeŋi aati hulo daŋ arasai itwa babur obeŋi adi itai italahuni. 32Tania oŋoti oseŋer ofi huno atogol ette atogol leten addi itwa hari ahania.
33Ninya ilyaha afaŋan motye, ojo Paulo jihosi, Iŋiyete obo aŋiyo nyo ara ahana oŋitek ’tomon haŋwan an ibyaŋata tai iŋiyete ta abaŋi. 34Ihwania iŋiyete aŋiyo itagolyere ahwattek hatai nyo obeŋ obo ofiti to hosi hatai olito. 35Ojo inyi ana ette iduhuna emunio ette jaran humo jyo Hollum ihosyere hosi ette ibibeny ette ŋiyo. 36Attati isi daŋ itagol atajya hosi ette ŋiyo bwo fe. 37Era nya hohoi daŋ awati esiha arrihai iko omuk atomwana hattarik heille itwa babur. 38Ninya ifoŋi isi daŋ ibironi isi ema daŋ itwa hari jo oŋida ababur itawwaha.
Awuro ono Ababur
39Ninya afaŋ amotye igonyuni isi olotifor ati obeŋi isi omijani ara inyi afau anani. Ati igonyuni isi obo egu iko asuluŋayo ette isi jaran eruharo ababur dia. 40Teyya ohouni isi abilat iko aririk ’totwa hari ette kafana aboŋo ono oyyami ette ruharo ababur ilotifor. 41Ati ninya ilyaha olotifor, isyak ababur asuluŋayo iko amaji on obeŋ owudo. Iryet awoyo otto homom babur isuluŋayo bwo ehalu babur ette wuro te epipoŋi hari iko oyyami. 42Ojori oseŋer ettoho ababus ŋadi omuk riŋyarai itwa hari many ilotifor ette fuho. 43Ati itik eleittok isi nyo awak inyi italahuna Paulo. Iramak inyi hul omijani ariŋita ihari oŋida isi olluhini ihari iriŋyari ilotifor. 44Bwo hul omuk inefuni abauhyen iko omuk asaŋ hun owurunie’to to babur ette fwatan ilotifor tesi. Ihwania efany hohoi daŋ ilotifor.
Currently Selected:
Ehanita 27: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
