Ai Vola I Sifaniya Na Parofita 3
3
Sa ra vunauci na kai Jerusalemi e na vuku ni nodrai valavala ca, 1-7. Sa vakaroti ko ira na yalododonu me waraka na lewa ni Kalou, 8-13, ka rekitaka ni sa vakayacori, 14-20.
1ENA ca ko koya sa yalobese ka yalo-dukadukali, na koroi valavala vakaukauwa! 2Sa tawa vakarorogo kina domona, sa bese ni vakavulici; sa tawa vakararavi vei Jiova; vua na nona Kalou sa tawa toro kina. 3O ira na nona turaga e tikina era sa laioni dautagi; o ira na nona dauveilewai era sa wolifa vakayakavi; ni ra quru sui, era tawa sigavaka. 4O ira na nona parofita era sa yalodauveidokadokai, era sa tamata dauveivakaisini: o ira na nona bete era sa vakacacataka na ka e tabu, era sa kauta vakatani na vunau.
5Sai Jiova na yalododonu e tiko kaya; sa sega ni cakava na ka tawa dodonu ko koya; e na mataka kecega sa vakarairaitaka na nona lewa dodonu, sa sega ni yali mai ko koya; ia ka sa sega ni kila madua ko koya sa tawa dodonu. 6Au sa muduka laivi na veimatanitu: sa vakacacani na nodra veivale ni valu; au a vakalalataka na sala ni nodra koro, me sega e lakova: sa rusa na nodra veikoro, sa sega ga na lewena, sa sega e tiko kina. 7Au a kaya, Mo rerevaki au ga, mo vakavulici; me kakua ni muduki tani na nodrai tikotiko, me vaka na ka kece kaʼu a lesia me kena: e na sabogibogi ga era souta, era sa cakava kecega na nodra cakacaka me ca.
8Ia dou waraki au ga, sa kaya ko Jiova, e na siga kaʼu na tu cake kina me ia na veitokitaki: ni sa noqu lewa me vakasoqoni ira na lewe ni veivanua, meʼu kumuni; ira vata na lewe ni veimatanitu, meʼu sovaraka vei ira na noqu cudru, me oti kece na noqu cudru katakata: ni sa buka ni noqu vuvu ena vakayavuni kina ko vuravura kecega.
9Niʼu na qai vukica na nodra vosa na veimataqali me vosa savasava, mo ra masu kecega ki na yaca i Jiova, me ra qaravi koya ni ra lomavata. 10Mai na tai kadua ni veiuciwai ni Kusi, o ira era masuti au, io, ko koya na gonealewa ni noqu mataqali sa vakasevi, era na kauta mai na noqui madrali. 11E na siga ko ya ko na sega ni madua e na vuku ni nomu cakacaka kecega, ko a talaidredre kina vei au: niʼu na qai kauti ira tani mai tikimu na kai nomu era yalodaumarau qaciqacia; ia ko na sega ni viavialevu tale e na noqu ulu-ni-vanua tabu. 12Au na vakavoca e tikimu e dua na mataqali yalomalumalumu ka dravudravua, a ra na vakararavi e na yaca i Jiova. 13A kedra vo na Isireli era na sega ni caka ka tawa dodonu, so vosa lasu; ena sega talega ni kune e gusudra na yame dauveivakaisini; ni ra na vakani ka koto sobu, ka sega ena vakarerei ira. 14Mo ia na meke, na gonealewa ni Saioni; dou kaikaila, na Isireli; mo reki ka marau e na vu ni yalomu, na gonealewa ni Jerusalemi. 15Sa kauta tani ko Jiova na nomu veicudruvi, sa vakalesui ira tani na nomu meca: sai koya na tui Isireli, ko Jiova, e tiko kei iko: o na sega ni kunea tale na ka rarawa.
16E na siga ko ya ena kainaki ki Jerusalemi, Mo kakua ni rere; ki Saioni, Me kakua ni wadamele na ligamu. 17O Jiova na nomu Kalou e tiko kei iko sa kaukauwa ko koya, ena ia na veivakabulai; ena rekitaki iko ko koya e na marau, ena vakacegu e na nona loloma; ena marautaki iko e na meke. 18O ira na kai nomu era tagi e na vuku ni solevu tabu, au na vakasoqoni ira mai, o ira sa bitaki e na veivakalialiai e na vuku i Saioni. 19Raica, au na cakacaka vei ira kecega e na gauna ko ya era vakararawataki iko; ia kaʼu na vakabulai koya sa lokiloki, o ira talega sa vakasevi kaʼu na kumuni ira mai; ia kaʼu na cakavi ira me ra vakacaucautaki ka rogo e na veivanua kece era a vakamaduataki kina. 20E na gauna ko ya au na kauti kemudou mai, io, e na gauna ko ya au na vakasoqoni kemudou mai; niʼu na cakavi kemudou me rogo ka vakacaucautaki vei ira na veimataqali kecega e vuravura, niʼu na vakatakalia e na matamudou na nomudou veivakabobulataki, sa kaya ko Jiova.
Currently Selected:
Ai Vola I Sifaniya Na Parofita 3: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
