Ai Vola I Akei Na Parofita 1
1
A WASE I. —O Akei, sa vunauci ira na lewe ni vanua e na vuku ni ra sa gucataka na tara na vale tabu, 1-6. Sa kitaki ira me gumatuataka, 7-11. Sa vakaukauwataki ira e na vosa ni yalayala ni Kalou, 12-15.
1E NAI karua ni yabaki i Tario na tui, e nai kaono ni vula, e nai matai ni siga ni vula, sa yaco na vosa i Jiova vei Akei na parofita me tukuna vei Sirupapeli na luve i Sialitieli, na turaga ni Juta, kei Josua na luve i Yiosataki, na bete levu, ka vaka, 2Sa vosa vakaoqo ko Jiova ni lewe vuqa, ka kaya, A tamata o qo era sa kaya, Sa sega ni yaco na gauna, na gauna ni vale i Jiova me tara. 3Io, sa yaco na vosa i Jiova vei Akei na parofita me tukuna, ka kaya,
4 Sa yaco li vei kemudou na gauna, oi kemudou, mo dou tiko e na nomudou veivale e botani, ia na vale o qo me sa rusa koto ga?
5Ia o qo, sa vosa vakaoqo kina ko Jiova ni lewe vuqa; Dou vakasara na lomamudou ki na nomudoui valavala. 6Sa ka levu dou sa kaburaka, ia sa ka lailai dou sa yauta mai; dou sa kana, ka sega ni mamau kina; dou sa gunu, ka sega ni cegu kina; dou sa vakaisulu, ka sa sega e katakata kina; ia ko koya sa vakaivoli e na nona cakacaka sa vakaivoli mai ki na taga sa cicila.
7Sa vosa vakaoqo ko Jiova ni lewe vuqa; Dou vakasara na lomamudou ki na nomudoui valavala. 8Dou cabe cake ki na ulu-ni-vanua, ka kauta mai na kau, ka tara na vale; ia kaʼu na rekitaka, niʼu na vakarokorokotaki kina, sa kaya ko Jiova. 9Dou a namaka na ka levu, ka, raica, sa ka lailai ga; ia ni dou sa kauta mai ki vale, kaʼu sa uvuca. E na vuku ni cava? sa kaya ko Jiova ni lewe vuqa. E na vuku ni noqu vale sa rusa koto, ia koi kemudou, dou sa dui cici yadua ki dui nona vale. 10O koya o qo e na vukumudou sa bureitaka kina na tegu ko lomalagi, o vuravura talega sa bureitaka na vuana. 11Ja kaʼu a kaciva na dausiga me tauca na vanua, kei na veiulu-ni-vanua, kei na sila, kei na waini vou, kei na waiwai, kei na ka sa vuataka na qele, kei na tamata, kei na manumanu, kei na cakacaka kecega ni liga ni tamata.
12Ia ko Sirupapeli na luve i Sialitieli, kei Josua na luve i Yiosataki, na bete levu, kei na kena vo kece ni tamata, era sa qai vakarorogo ki na domo i Jiova na nodra Kalou, kei na vosa i Akei na parofita, me vaka na ka sa talai koya kina ko Jiova na nodra Kalou; a ra sa rere na tamata e na mata i Jiova.
13Sa qai vosa ko Akei nai talatala i Jiova e na ka sa talai koya kina ko Jiova vei ira na tamata, ka kaya, Au sa tiko vata kei kemudou, sa kaya ko Jiova. 14A sa vakayavalata ko Jiova na yalo i Sirupapeli na luve i Sialitieli, na turaga ni Juta, kei na yalo i Josua na luve i Yiosataki, na bete levu, kei na yalodra na tamata kecega sa vo; a ra sa mai cakava na cakacaka e na vale i Jiova ni lewe vuqa, na nodra Kalou, 15e nai karuasagavulu ka va ni siga, enai kaono ni vula, e nai karua ni yabaki i Tario na tui.
Currently Selected:
Ai Vola I Akei Na Parofita 1: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
