A Meke I Solomoni 3
3
1E NA noqui mocemoce kei na bogi kaʼu a qarai koya kaʼu sa lomana: au a qarai koya, a sa sega niʼu kunea. 2Au na tu cake mada, ka lako voli e na koro e na salatu, ia e na rara kaʼu na qarai koya kaʼu sa lomana: au a qarai koya, a sa sega niʼu kunea. 3Era kunei au nai vakatawa era volivolita na koro: au a kaya vei ira, Dou a raici koya li kaʼu sa lomana? 4Sa vakalailai ga niʼu sa sivi iratou yani, kaʼu sa kunei koya kaʼu sa lomana: au a tauri koya, ka bese ni vakalaivi koya, kaʼu a kauti koya mada ki na vale i tinaqu, ki na loqi i koya sa kunekunetaki au.
5Au sa vakaroti kemudou, na gonealewa ni Jerusalemi, e na vuku ni koti kila, kei na teira alewa ni veico, mo dou kakua ni yavalata, se vakayadrati koya kaʼu sa lomana, ka me veitalia ga ko koya.
6O cei na marama o qo sa lako mai na veikau ka vaka na duru kubou, ka vakaisaluakitaki e na mura kei na drega boi vinaka, kei nai saluaki kecega ni tamata dauveivoli? 7Raica na nonai davodavo, na nei Solomoni; era lewe onosagavulu na tamata qaqa era volita, na nodra qaqa na Isireli. 8Era dui taura kecega nai seleiwau, ka ra vuku e nai valu: sa dui nonai seleiwau sa lili mai sagana e na vuku ni rere kei na bogi. 9Na nonai davodavo sa cakava ko Solomoni na tui e na kau ni Lipanoni: 10na kena duruduru sa cakava e na siliva, na botona e na koula, na delana e na ka damudamu, na lomana ga sa coni e na nodrai loloma na gonealewa ni Jerusalemi. 11Dou lako yani, na gonealewa ni Saioni, me raici Solomoni na tui ni sa vakaisala tu e nai sala sa vakaisalataki koya kina ko tinana e na si ga sa vakawati kina, ia na siga ni marau ni lomana.
Currently Selected:
A Meke I Solomoni 3: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
