Vei Ira Na Kai Roma 16
16
Sa tukuni ira e so na tamata lotu dina ko Paula, 1-16. Sa cavu na loloma, 17-24. Sa tinia na nonai vola, 25-27.
1IA kaʼu sa vosavakavinakataki Fipi na ganeda, o koya sa vada ni vavakoso lewe ni soro mai Kenikiria: 2mo dou vakacegui koya e na vuku ni Turaga, me vaka sa kilikili kei ira era sa lotu, ka mo dou vukei koya e na cakacaka kecega dou na yaga kina vua: ni sa nodrai vukevuke na lewe vuqa ko koya, kei na noqu talega.
3Me cavu mada na loloma vei rau ko Pirisila kei Akuila, koi rau sa cakacaka vata kei au e na veika i Karisito Jisu: ( 4a rau sa virikotora na domodrau meʼu bula kina: keitou sa vakavinavinaka kina vei rau, keitou kei ira kece na veivavakoso lewe ni soro vei ira na veimatanitu:) 5vei ira talega nai vavakoso lewe ni soro e na nodrau vale. Me cavu mada na loloma vei Epinito, na tamata kaʼu sa daulomana, o koya nai sevu mai Akaia vei Karisito. 6Me cavu mada na loloma vei Meri, o koya sa daucakacaka vakalevu e na vuku i keitou. 7Me cavu mada na loloma vei Adroniko kei Junia, na wekaqu, keitou a vesu vata kei rau, a rau sa rogo vei iratou nai apositolo, erau sa nei Karisito eliu, au sa muri koi au. 8Me cavu mada na loloma vei Abilia, o koya kaʼu sa daulomana e na vuku ni Turaga. 9Me cavu mada na loloma vei Uripenu, o koya sa dau vukei keitou e na cakacaka i Karisito, kei Siteki, o koya kaʼu sa daulomana. 10Me cavu mada na loloma vei Apeli sa dauvinakati e na veika i Karisito. Me cavu mada na loloma vei ira na mataqali i Arisitopulo. 11Me cavu mada na loloma vei Irotioni na wekaqu. Me cavu mada na loloma vei ira na mataqali i Narikiso, era sa nona ga na Turaga. 12Me cavu mada na loloma vei Taraifina kei Tirifosa, erau daucakacaka e na veika ni Turaga. Me cavu mada na loloma vei Perisi sa daulomani, o koya sa daucakacaka vakalevu e na veika ni Turaga. 13Me cavu mada na loloma vei Rufu o koya sa digitaki me nona na Turaga, kei na tinana sa noqu talega. 14Me cavu mada na loloma vei Asinikirito, ko Filekoni, ko Elima, ko Patiropa, ko Erimi, kei ira na veiwekani sa tiko vata kei iratou. 15Me cavu mada na loloma vei Filoloko, kei Julia, kei Niriu, kei na ganena, kei Olimipa, kei ira kecega era sa lotu, era sa tiko vata kei iratou. 16Dou ia na loloma vakai kemudou e na veireguci e na yalosavasava. Sa loloma yani vei kemudou ko ira na nona veivavakoso lewe ni soro ko Karisito.
17Ia kaʼu sa vakamasuti kemudou, na veiwekani, mo dou kilai ira era sa vakatekivuna na veisei kei na veika e dauveitara-betaki, sa sega ni vaka nai vakavuvuli dou sa vakatavulici kina; ia kakua ni veiriti kei ira. 18O ira era sa vakaoqo, era sa sega ni qarava na noda Turaga ko Jisu Karisito, na ketedra ga; ia e na vosa vinaka kei na loloma vakailasu, era sa lawakitaka na lomadra era sa wele. 19Ni sa kuruvaki ki na tamata kecega na nomudou talairawarawa. O koya o qo kaʼu sa reki kina e na vukumudou: ia sa yaloqu ga mo dou vuku e na ka vinaka, mo dou kakua talega ni cala e na ka ca. 20Ia na Kalou ni veivakacegui ena butuki Satani vakusarawa e ruku ni yavamudou. Me tiko vei kemudou na loloma ni noda Turaga ko Jisu Karisito. Emeni.
21Sa loloma yani vei kemudou ko Timoci na noqui tokani, kei Lusiu, kei Jesoni, kei Sosipatiro, ko iratou na wekaqu. 22Oi au ko Teritiu, ka vola nai vola o qo, au sa loloma yani vei kemudou e na Turaga. 23Sa loloma yani vei kemudou ko Keio, o koya kaʼu sa dautiko e nona vale, kei ira kecega nai vavakoso lewe ni soro. O Erasito na mata-ni-vanua ni koro o qo sa loloma yani vei kemudou, kei Kuaritu a wekada.
24Me tiko vei kemudou kecega na loloma ni noda Turaga ko Jisu Karisito. Emeni.
25Ia vei koya sa kaukauwa me vakataudeitaki kemudou me vaka na noqui tukutuku-vinaka, kei na vunautaki Jisu Karisito, me vaka ni sa qai vakatakila mai na ka vuni, sa vuni tu mai na gauna makawa, 26ia ka sa qai vakaraitaki mai, ka sa vakatakilai e na nodrai vola na parofita, me vaka na vosa ni Kalou tawa mudu, ki na veivanua kecega me ra vakabauta ka talairawarawa kina: 27io, vua na Kalou sa vuku duaduaga, me ia na vakarokoroko e na yaca i Jisu Karisito, ka tawa mudu. Emeni.
Currently Selected:
Vei Ira Na Kai Roma 16: FIJ1864
Highlight
Share
Compare
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
