Ai Vola Vakaibalebale 8
8
A kenai rogo vinaka, kei na kena yaga ko ruku, 1-11. A kenai valavala e vuravura, 12-21. Sa ka mailiu sara ko koya, 22-31. A nonai vakaro vinaka, 32-36.
1SA daukaci ko vuku, se segai? ka dauta-balaka na domona ko yalomatua? 2Sa tu e na dela m tikina cecere, e na bati ni sala e na yasana sa vakasala. 3E na matamata-ni-koro, e nai curucuru ki na kore, e na mata ni katuba, sa dauvunau ko koya, ka kaya, 4Au sa kaci vei kemudou; ia na domoqu sa yacovi kemudou, na luve ni tamata. 5Oi kemudou na tawa vuku, dou kila na vuku: kei kemudou na lialia, dou yalomatua mai. 6Dou rogoca niʼu na vosataka na ka vinaka; ia na tebenigusuqu ni sa dalaga, ena tukuna na ka dodonu: 7ni na vosataka na ka dina na gusuqu; ia na ca sa ka vakasisila ki na tebenigusuqu. 8Sa dodonu kecega na vosa ni gusuqu; sa sega kina na ka vereverea se takelo: 9sa macala kecega vua sa yalomatua, ka dodonu vei ira era kunea na lomavuku. 10Dou vinakata na noqui vakavuvuli, ka cata na siliva; kei na vuku, ka cata na koula talei; 11ni sa vinaka na vuku ka ca na rupi; ia na ka kecega e daudomoni sa sega ni vakatauvatani kaya rawa.
12Oi au ko vuku, keirau sa tiko kei yaloqase, kaʼu sa daukunea ka kila na ka e dauveinanuyaki. 13O qo na rerevaki Jiova me cata na ka ca: a qaciqacia, kei na viavialevu, kei na sala ca, kei na gusu vosa veve, kaʼu sa cata. 14Sa noqu nai vakavuvuli, kei na vuku dina: oi au na yalomatua; sa tu vei au na kaukauwa. 15Sai au ga era buli kina na tui, ka sautaka na ka dodonu ko ira na turaga ni lewa: 16sai au ga era ia kina na lewa na turaga, kei ira na tamata turaga, io, ko ira kecega na dauveilewai e vuravura. 17Au sa lomani ira era sa lomani au; ia ko ira era sa qarai au taudonu era na kunei au. 18Sa tiko kei au nai yau kei na vakarokoroko; io nai yau veiqati kei na ka dodonu. 19A vuaqu sa vinaka ka ca na koula, io sa ca na koula talei sara; ia na noqu vuata sa vinaka ka ca na siliva dina. 20Au sa liu tu e na sala ni valavala dodonu, e na loma ni sala ni lewa dodonu: 21meʼu lewa me ra taukena na ka dina era sa lomani au; ia kaʼu na vakasinaita na nodra kato kamunaga.
22Au a nei Jiova ni sa vakatekivu na nona cakacaka, sa liu koi au ka muri na nona cakacaka eliu. 23Au a lesi mailiu sara, mai nai vakatekivu, ni sa sega ko vuravura. 24Ni sa sega na wai titobu, kaʼu a sucu; ni sa sega nai vurevure e vutu ni wai. 25Ni sa sega ni tauyavutaki na veiulu-ni-vanua, ni sa sega na veiulu-ni-koro kaʼu a sucu: 26ni sa sega ni cakava oti na vuravura kei na vanua, kei na dela ni kuvu-ni-soso kei vuravura. 27Ni sa vakarautaka na lomalagi, kaʼu a tiko maikina: ni sa vola volita na dela ni wai titobu: 28ni sa vakataudeitaka na o maicake: ni sa vakaukauwataka nai vurevure ni wasawasa: 29ni sa sautaka na wasawasa me kakua ni sivia na nona vosa na wai: ni sa vakataudeitaka na yavu kei vuravura: 30au a qai tiko kaya me nona ka e susuga: kaʼu a nona ka e daudomoni e na veisiga, kaʼu a marau tiko e matana; 31ka rekitaka na nona yasayasa vakavuravura e tawa; ia kaʼu a daumarautaki ira na luve ni tamata.
32Dou qai vakarorogo kina kivei au, ragone: ni ra sa kalougata era vakabauta na noqu sala. 33Dou rogoca nai vakavuvuli, mo dou vuku, dou kakua ga ni beca. 34Sa kalougata na tamata sa rogoci au, ka sa vakatawa e na veisiga e na noqu veimatamata-ni-koro, ka wawa tiko mai na vu ni duru ni noqu katuba. 35Ni sai koya sa kunei au sa kunea na bula; ena vinakati koya talega ko Jiova. 36Ia ko koya sai valavala ca vei au sa vakacacana vakai koya na yalona: o ira kecega era cati au, era sa vinakata na mate.
Currently Selected:
Ai Vola Vakaibalebale 8: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
