Ai Vola Vakaibalebale 30
30
Sa tukuna ko Akari na ka e vakabauta, 1-6, kei na nona masu, 7-9. Nai tabatamata ca e va, kei na ka e va sa tawa mamau rawa, 10-16. Sa tabu ni beci na qase, 17. Na ka e ca e dredre ni kilai, 18-20; ka va sa dredre ni vosoti, ka va sa vuku, 21-28; ka va sa matavinaka, 29-31. Me cegu na veicudruvi kei na veileti, 32, 33.
1A VOSA i Akuri, na luve i Yake, na parofisai ka vosataka ko koya vei Icieli, io vei rau ko Icieli kei Ukali.
2E dina niʼu sa lialia ka ra yalomatua na tamata kecega, a sa sega vei au na vuku vakatamata: 3au a sega ni vakavulici, ia na nodra vuku na yalosavasava kaʼu sa lecava. 4O cei sa cabe cake ki lomalagi, se lako sobu mai? o cei sa kumuna na cagi ki ligana? o cei sa vauca na wai e nai sulu? o cei sa lesia kecega nai yalayala kei vuravura? o cei na yacana, o cei talega na yaca i koya na luvena, kevaka ko kila? 5A nona vosa kecega na Kalou sa savasava: nai sasabai ko koya vei ira kecega era vakararavi vua: 6mo kakua ni kuria na nona vosa, de vunauci iko ko koya, ka ko sa kune kina me lasu.
7E rua na ka kaʼu sa kerea vei iko; kakua ni ko bureitaka vei au niʼu sa bula tiko: 8mo kauta vakayawa tani vei au na ka lasu kei na vosa lasu: mo kakua ni soli au meʼu dravudravua se vutuniyau; vakani au e na kakana sa ganiti au: 9deʼu mamau, ka lasutaki iko, ka kaya, O cei ko Jiova? se deʼu dravudravua, ka butako, ka cavuta wale na yaca ni noqu Kalou.
10Kakua ni beitaka na tamata e na ca vua na nona turaga, de rukaki iko ko koya, ka ko sa vakacalai kina. 11Sa dua na mataqali sa rukaka na tamadra, ka sega ni vosavakalougatataka na tinadra. 12Sa dua na mataqali sa nanumi ira me savasava, a sa sega ni sava tani na nodra dukadukali. 13Sa dua na mataqali, a ka vakaidina na nodra mata viavialevu! a sa cecere na dakudaku-ni-matadra. 14Sa dua na mataqali sai seleiwau na batidra, kai sele na bati ni galegaledra, me kani ira laivi kina na yalomalumalumu mai na dela i vuravura, kei ira na dravudravua maivei ira na tamata. 15Sa rua na luvena alewa na aluka, a rau dautagi, Soli au, soli au. E tolu na ka sa sega ni mamau rawa, io, e va sa sega ni kaya, Kua soti: 16nai bulubulu; kei na kete yava; na qele sa sega ni mamau e na wai; kei na buka sa sega ni kaya, Kua soti.
17A mata sa vakalialiai tamana, a sa beca ni talairawarawa vei tinana, ena co-vuta na reveni ni uciwai, ka kania na luve ni ikeli. 18E tolu na ka e veivakidacalataki vei au, io, e va kaʼu sa sega ni kila: 19na kenai vukavuka na ikeli mai lomalagi; na kenai lakolako na gata e na dela ni vatu; na we ni waqa e loma ni wasawasa; kei nai valavala ni tagane vua na gonealewa. 20Sa vakaoqo na nonai valavala na alewa dauyatagane; sa kana, ka qusia na gusuna, ka kaya, Au sa sega ni kitaka na ka ca.
21E tolu na ka sa yavavala kina ko vuravura, io, e va e sa sega ni rawata: 22na tamata wale ni sa buli me turaga; kei na tamata lialia ni sa mamau e na kakana; 23na alewa vakasisila ni sa vakawati; kei na vada sa veitaravi kei na nona marama. 24E va na ka e vuravura sa lalai, ka sa vuku vakalevu sara: 25a kadi na yavusa sa tawa kaukauwa, ia ka sa vakarautaka na kedra e na vula i katakata; 26a kalavo na yavusa sa tawa kaukauwa so, ia ka sa cakava ga na nodra vale e na vatu; 27sa sega na nodra tui na vodre, a sa lako kece yani ga vakamataivalu; 28a tina-ni-viritalawa sa tara ka e ligana, a sa tiko e na nodra vale na tui.
29E tolu na ka sa lako vakavinaka, io, e va sa lako vakamatavinaka: 30na laioni, o qori sa kaukauwa e na manumanu, a sa sega ni lesu tani e na vuku ni dua; 31na koli vula; kei na koti tagane; kei na tui, sa sega ni yaga ni vorata.
32Kevaka ko sa caka vakalialia ni ko sa vakalevulevui iko, se ko sa nanuma na ka ca, mo tabonaka na gusumu e na ligamu: 33ni sa tubu na uro ni wai-ni-sucu ni sa vakayavala wai-ni-sucu, a sa tubu na dra ni sa loba ucu: a sa tubu na veileti ni sa kere cudru.
Currently Selected:
Ai Vola Vakaibalebale 30: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.