Ai Vola Vakaibalebale 26
26
1ME vaka na uca-vulavula e na vula i katakata, kei na uca dina e na vula i mago, sa vakakina sa sega ni kili kaya na lialia na veivakarokorokotaki.
2Me vaka na manumanu sa veiseseyaki, kei na kakabace sa veivukayaki, sa vakakina na veirukaki wale, ena sega ni tau mai.
3Sa kena na ose na wa-qaliqali, sa kena na asa nai tarovi, a sa kedra na lialia na kuita e na dakudra.
4Mo kakua ni vosa yani vua na lialia me vaka nona lialia, do ko vakataki koya kina.
5Mo vosa yani vua na lialia me vaka na nona lialia, de nanumi koya me vuku.
6O koya sa tala na tamata lialia e na dua na talai, sa yava mudu, a sa gunu ka ca.
7Sa tawa tautauvata na yavana na gera: sa vakakina na vosa vakaibalebale e na gusudra na lialia.
8Me vakai koya sa vauca na vatu talei ki nai binibini vatu wale, sa vakakina ko koya sa ia na vakarokoroko vua na lialia.
9Me vaka sa lau na voto ni kau ki na liga i koya sa mateni, sa vakakina na vosa vakaibalebale ni sa taura ko ira na lialia.
10O koya na Kalou levu ka bulia na ka kecega sa sauma vua na lialia, a sa sauma vei ira talega na dautalaidredre.
11Me vaka na koli sa lesu tale ki na nona lua, sa lesu tale vakakina na lialia ki na nona lialia.
12O sa kunea li na tamata sa nanumi koya me vuku? sa na vuku vei rau ko koya sa lialia.
13Sa kaya na yalovucesa, E dua na laioni ka tiko e na sala; a laioni sa tiko voli e nai saqata. 14Me vaka nai sogo ni katuba sa veilakoyaki e na kenai ruberube, sa vakakina na vucesa e na nonai mocemoce. 15Sa vunia na ligana na vucesa e na lomaserena; sa dredreta ni kauta tale mai ki gusuna. 16Sa nanumi koya me vuku na vucesa, ka lialia ko ira e lewe vitu era sa tukuna rawa nai balebale ni ka.
17O koya sa lako voli yani, ka laʼki veivuke wale e na veileti, sa vaka e dua sa taura na daliga ni koli. 18Me vakai koya na lialia dina sa veibiuyaka na buka waqa, kei na gasau, kei na mate, 19sa vakakina na tamata sa vakaisina na kai nona, a sa kaya, Sa noqu veiwali bagi, ne?
20Ni sa tawa bukani, sa boko na buka: ia ni sa sega na daukakase, sa cegu na veileti. 21Sa qilaiso sa bukani kina na buka qilaiso, kei na buka droka na buka waqa; a sa tamata dauveileti sa bukani kina na veileti, 22A nona vosa na daukakase sa vaka na vue, a sa lau sara ki na vu ni loma ni tamata.
23A tebenigusu katakata sa tu vata kei na yalo dauca sa vaka na ka ni bilo sa boro e na qa ni siliva. 24O koya sa veicati sa vosa veivakaisini, a sa binia na lasu e lomana; 25ni sa vosa vakavinaka ko koya, kakua ni ko vakadinata: ni sa vitu na ka vakasisila e lomana: 26sa ubi e na lasu na nona Veicati, ena vakavotuni na nona ca e matadra nai vavakoso. 27O koya sa kelia nai keli ena lutu kina: o koya talega sa vaqiqica na vatu, ena qiqi tale mai vua. 28A yame lasu sa cati ira era ca kina; ia na gusu veicavilaki sa ia na veivakarusai.
Currently Selected:
Ai Vola Vakaibalebale 26: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
