Ai Vola Vakaibalebale 24
24
1MO kakua ni vuvutaki ira na tamata ca, kakua talega ni ko via tiko kei ira: 2ni sai valavala kaukauwa e sa vakanananu kina na lomadra, kei na ca e sa vosa kina na tebenigusudra. 3A vuku ga sa tara rawa kina na vale, kei na yalomatua ka sa vakataudeitaki kina: 4kei na kila ka ena oso kina na veitikina e nai yaya kecega sa talei ka vinaka.
5Sa kaukauwa na tamata vuku; ia na tamata daukila ka sa vakaikuritaka na kaukauwa: 6ni sa bose vuku ko na ia rawa kina na nomui valu: a sa rawa na bula ni ra lewe vuqa na daubose.
7Sa cecere na vuku vua na lialia: sa sega ni vosa rawa e na matamata ni-koro.
8O koya sa dauvakananuma me caka ca ena vakatokai me vu ni ca.
9A nanuma ni lomana na lialia nai valavala ca: a sa ka vakasisila vua na tamata na dauveivakalialiai.
10 Kevaka ko sa gu ca e na siga ni rarawa, sa lailai na nomu kaukauwa.
11Kevaka ko sa cegu ni vakabulai ira era sa yarataki me mate, kei ira era sa donu me moku; 12kevaka ko kaya, Raica, keitou a sega ni kila; o koya li sa dikeva na yalo, me sega ni nanuma kina ko koya? ia ko koya sa maroroya na yalomu, me sega beka ni kila kina ko koya? me na sega beka ni sauma na tamata ko koya me vaka na nona cakacaka?
13Mo kania, luvequ, na oni, ni sa ka vinaka; kei na qa ni oni, ni sa kamikamica ki na gusumu: 14ena vakakina na vuli vuku ki na gusumu: ni ko sa qai kunea, ena dua kina na kenai sau, ia na ka ko namaka ena sega ni muduki tani.
15O iko, tamata ca, kakua ni ko lawaka na nonai tikotiko na yalododonu; kakua ni vakacacana na nonai kotokoto: 16ni sa vakavitu na nona bale na tamata yalododonu, a sa tu cake tale: ia ko ira na tamata ca era na lutu sara ki na ca. 17Ni sa bale na nomu meca kakua ni ko reki, ia ni sa tidara me kakua ni marau na yalomu: 18de kunea ko Jiova, ka ca e matana, ka vakasuka tani vua na nona cudru. 19Kakua ni ko rarawa e na vukudra na ka ca, mo kakua talega ni vuvutaki ira na tamata ca; 20ni na sega na ka vinaka ni e nona na ka ca; a nodra cina na tamata ca ena bokoci.
21Na luvequ, mo rerevaki Jiova kei na tui: kakua ni viriti kei ira era dauvei-vukiyaki: 22ni na tubu vakidacala na kedra ca; ia nai valavala ni dui nodra rusa kecega ko cei me kila?
23A ka o qo talega sa nodra na vuku. A vinakata loa na tamata ni lewai, sa sega ni vinaka. 24O koya sa kaya vua na tamata ca, O iko ko sa donu; ena cati koya ko ira na tamata, era na vakasisilataki koya ko ira na lewe ni veivanua: 25ia ko ira era vunauci koya ena nodra kina na rereki, ena tauci ira talega na vosaveivakalougatataki vinaka.
26Ena reguci na tebenigusu i koya sa vosa yani vakadodonu.
27Mo vakarautaka mai bili na nomu cakacaka, ka vakarauta mai veikau vei iko; ka oti, mo qai tara nomu vale.
28Mo kakua ni beitaki koya wale na kai nomu; kakua talega ni ko ia na vei vakacalai e na tebenigusumu: 29kakua ni ko kaya, Me vaka na nona cakacaka kivei au, kaʼu na kitaka vakakina vua; kaʼu na sauma vua na tamata o qori me vaka na nona cakacaka.
30Au a lako voli yani ki nona were na vucesa, kei na nona veivaini na tawa vakayalo; 31ka, rai ca, sa oti sara ni tubu wa votavotoa, a sa ubi na delana e na kau karokaroa, a kena bai vatu talega sa kabasu. 32Au a qai raica, ka vakasama sara: au a vakasarava, ka vakavulici kina. 33Me vakalailai tale na moce, vakalailai na sosovu, vakalailai na roqoveinu me moce: 34ia ena lako tu mai me vaka na daulako na nomu dravudravua; kei na nomu viakana mai, me vaka na tamatai valu.
Currently Selected:
Ai Vola Vakaibalebale 24: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
