Marika 2
2
Sa vakabula ko Jisu e dua na tamata sa tauvi-paralasi, 1-12. Sa kacivi Maciu me nona tisaipeli, a sa kana vata kei ira na tamatai valavala ca, 13-17. Sa kaya ni sa sega ni cala ko iratou na nona tisaipeli ni ratou sa sega ni daulolo, 18-22; se ni ratou sa vetia na veisola ni sila e na siga ni vakacecegu, 23-28.
1SA qai curu tale ki Kaperinaumi ko koya, ni sa oti na bogi e so; a sa qai rogovaki ni sa tiko e vale. 2A ra sa lewe vuqa sa soqoni vata sara mai, a sa sega kina na yasana me ra tu rawa kina, e sega e na mata ni katuba: a sa vunautaka na vosa vei ira ko koya.
3A sa lako mai e so vei koya, ka kauta mai e dua sa tauvi-paralasi, sa colati koya e le va. 4Ia ni ratou sa sega ni torovi koya rawa e na vukudra na lewe vuqa, eratou sa basuka na dela ni vale sa tiko kina ko koya: ia ni ratou sa basuka sara, eratou sa tukuca sobu nai mocemoce sa davo kina ko koya sa tauvi-paralasi. 5Ia ni sa raica ko Jisu na nodratou vakabauta, sa kaya vua sa tauvi-paralasi, Na luvequ, sa bokoci na nomui valavala ca. 6Ia ka so na vu-ni-vola era sa tiko kina, a ra sa veinanuyaka e lomadra, ka vakaoqo, 7Sa vosavakacacataka vakakina na Kalou ko koya o qo e na vuku ni cava? o cei tale li sa bokoca rawa nai valavala ca, a Kalou duaduaga? 8Sa qai kila sara e yalona ko Jisu ni ra sa veinanuyaka vakakoya e lomadra, a sa kaya vei ira, A cava dou sa veinanuyaka kina na ka o qo e na lomamudou? 9a cava vei rau e rawarawa cake, me kaya vua sa tauvi-paralasi, Sa bokoci na nomui valavala ca; se me kaya, Mo tu cake, ka kauta na nomui mocemoce, ka lako? 10Ia mo dou kila kina ni sa rawata na Luve ni tamata e vuravura me bokoca nai valavala ca, (sa qai kaya ko koya vua sa tauvi-paralasi,) 11Au sa kaya vei iko, Mo tu cake, ka kauta na nomui mocemoce, ka lako ki na nomu vale. 12A sa tu cake sara ko koya, ka kauta nai mocemoce, ka lako yani e na matadra kecega; a ra sa kidacala kecega kina, ka vakarokorokotaka na Ka-lalou, ka kaya, Eda sa sega ni raica na ka e vakaoqo na kenai valavala.
13A sa lako tale yani ko koya ki na matasawa, a ra sa lako vei koya ko ira kecega era sa lewe vuqa, a sa vakavulici ira ko koya.
14Ia ni sa lako voli yani, sa raici Levi na luve i Alifio sa tiko e na vale ni vakacavacava, a sa kaya vua, Muri au. A sa tu cake ko koya, ka muri koya.
15Ia ni sa tiko ko koya e na vale i koya me kana, era sa lewe vuqa na kumuna nai vakacavacava kei na tamatai valavala ca era sa tiko me kana vata kei Jisu kei iratou na nona tisaipeli: ni ra sa lewe vuqa, a ra sa muri koya. 16Ia ni ra sa raica ko ira na vu-ni-vola kei ira na Farisi ni sa kana vata ko koya kei ira sa kumuna nai vakacavacava kei ira na tamatai valavala ca, era sa kaya vei iratou na nona tisaipeli, A cava sa kana vata ka gunu vata kina ko koya kei ira sa kumuna nai vakacavacava kei ira na tamatai valavala ca? 17Ia ni sa rogoca ko Jisu, sa kaya vei ira, Sa sega ni yaga na vu-ni-wai vei ira sa bula vinaka, vei ira ga sa tauvi-mate: au sa sega ni lako mai me kacivi ira sa yalododonu, o ira ga nai valavala ca, me ra veivutuni.
18A ra sa daulolo ko ira na tisaipeli i Joni kei na nodra na Farisi: a ra sa lako mai ka kaya vua, A cava sa lolo kina ko ira na tisaipeli i Joni kei na nodra na Farisi, ia na nomu tisaipeli era sa sega ni lolo? 19A sa kaya vei ira ko Jisu, Era sa lolo rawa li na weka ni watina-tagane, ni sa tiko vata kei ira na watina-tagane? ni sa tiko ga kei ira na watina-tagane, era sa sega ni lolo rawa. 20Ia ena yaco mai na siga, ena kau tani kina vei ira na watina-tagane; ka ra na qai lolo e na gauna ko ya. 21Ia sa sega na tamata sa cula vata na tiki ni sulu tawa savai kei nai sulu madra: ke sa vaka, ena dresuka na kena madra na tikina vou sa botani kina, a sa kadresu vakalevu kina. 22Sa sega talega na tamata sa vakataloca na waini vou ki na tavaya kuli-ni-manumanu madra; ke sa vakakina, ena vakacabotetaka na tavaya na waini vou, ka dave yani na waini, ka rusa na tavaya; e vinaka ga me vakataloca na waini vou ki na tavaya vou.
23A SA yaco ni sa lako ko koya e loma ni veiwere ni sila e na siga ni vakacecegu; a sa vakatekivu ko iratou na nona tisaipeli, ni ratou sa lako voli, me ratou vetia na veisola ni sila. 24A sa kaya vua ko ira na Farisi, Raica, a cava sa kitaka kina ko iratou e na siga ni vakacecegu na ka e sega ni tara? 25Sa qai kaya vei ira ko koya, Dou sa sega beka ni wilika na ka sa kitaka ko Tavita, ni sa sega na kena, ka sa viakana, o koya kei ira sa tiko vata kaya: 26Ni sa curu ko koya ki na vale ni Kalou, e na gauna i Epiyacari na bete levu, a sa kania na madrai dauraici, o qori sa sega ni tara me kani, vei ira duaduaga na bete, a sa solia talega vei ira era sa tiko vata kaya? 27Sa kaya talega vei ira, Sa caka na siga ni vakacecegu e na vukudra na tamata, e sega na tamata e na vuku ni siga ni vakacecegu: 28ia sa Turaga talega kina ni siga ni vakacecegu na Luve ni tamata.
Currently Selected:
Marika 2: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
