Marika 3
3
Sa Vakabula ko Jisu e dua na tamata sa malai na ligana, kei ira e le vuqa sa tauvi-mate, 1-12. Sa digitaki iratou nai apositolo, 13-19. Eratou sa kaya na wekana ni sa lialia ko koya, 20, 21. Sa vosa ko Jisu vei ira era sa beitaki koya e na nona vakasavi ira na tevoro, 22-30. Sa vakatakila se ko cei sa wekana dina, 31-35.
1A SA curu tale ko koya ki na vale ni lotu; a sa tiko kina e dua na tamata sa malai na ligana. 2A ra sa vakaraici koya, se na vakabulai koya e na siga ni vakacecegu, se segai; a ya me ra beitaki koya. 3Sa qai kaya ko koya vua na tamata sa malai na ligana, Tu cake mai. 4A sa tarogi ira, Sa tara beka me cakava na ka vinaka e na siga ni vakacecegu, se me cakava na ka ca? me ia na veivakabulai, se na veivakamatei? A ra sa galu ga. 5A sa rai vakavolivolita vei ira ko koya, a sa cudru, ni sa rarawa na lomana e na vuku ni sa kaukauwa na yalodra, a sa kaya vua na tamata, Dodoka mai na ligamu. A sa dodoka yani: a sa vakabulai na ligana ka yaco me vaka na kenai kadua. 6A ra sa lako yani na Farisi, a sa bosei koya sara ko ira vata kei ira nai tokani i Eroti, se ra na vakamatei koya vakaevei.
7A sa lako tani ko Jisu kivaka ki na wai kei iratou vata kaya na nona tisaipeli: a ra sa lewe vuqa sara sa muri koya mai Kalili, kei Jutia, 8mai Jerusalemi talega, kei Itu-mia, kei na tai kadua ni Joritani; o ira talega e na veiyasana i Teiri kei Saitoni, era lewe vuqa sara, ni ra sa rogoca na levu ni veika sa cakava ko koya, era sa lako mai vei koya. 9A sa kaya ko koya vei iratou na nona tisaipeli, me dua na waqa lailai me toka ga vua e na vukudra na lewe vuqa, de ra drigita. 10Ni ra sa lewe vuqa sa Vakabula ko koya; a ra sa drigiti koya kina me ra tarai koya, o ira kecega era sa tauvi-mate. 11O ira talega na yalo tawa-savasava, ni ra sa raici koya, era sa bale sobu e matana, a ra sa qoqolou, ka kaya, O iko na Luve ni Kalou. 12A sa vakarota matua vei ira ko koya, me ra kakua ni tukuni koya.
13A sa cabe ki na ulu-ni-vanua, ka kacivi ira mai sa digitaka: a ra sa lako mai vua. 14A ratou sa lewe tinikarua sa lesia ko koya, me ratou tiko vata kaya, ka me vakatalai iratou ko koya me ratou vunau, 15me tu talega vei iratou na kaukauwa me ratou vakabulai ira sa tauvi-mate, ka me ratou vakasavi ira na tevoro: 16A sa vakayacani Saimoni ko koya mei Petero: 17kei Jemesi na luve i Sepeteo, kei Joni na taci i Jemesi, (a sa vakayacani rau ko koya mei Poaneriji, a kenai balebale, A luve ni kurukuru:) 18kei Adriu, kei Filipo, kei Paricolomiu, kei Maciu, kei Tomasi, kei Jemesi na luve i Alifio, kei Cateo, kei Saimoni e dua vei ira sa vakatokai Na gumatua, 19kei Juta Isikarioti, o koya sa soli koya yani.
A ratou sa curu ki na dua na vale. 20A ra sa lewe vuqa sa soqoni vata tale, a ratou sa sega kina ni kania rawa na kedratou. 21Ia ni ratou sa rogoca ko iratou na wekana, eratou sa lako mai me ratou tauri koya: ni ratou sa kaya, Sa lialia ko koya.
22Ia ko ira na vu-ni-vola ka lako sobu mai Jerusalemi, era sa kaya, Sa tiko vua ko Pielisipupi, a sa vakasavi ira na tevoro e na kaukauwa ni nodra turaga na tevoro.
23A sa kacivi ira mai ko koya, ka kaya vei ira e na vosa vakatautauvata, E rawata vakaevei ko Satani me vakasavi Satani? 24ia kevaka sa dua na matanitu sa veisei vakai koya, ena sega ni tu dei rawa na matanitu ko ya: 25ia kevaka sa dua na vale sa veisei vakai koya, ena sega ni tu dei rawa na vale ko ya. 26Ia kevaka e tu cake ko Satani me veivala vakai koya, ka veisei, ena sega ni tu dei rawa, ka na mudu ga. 27Sa sega na tamata me curuma rawa na vale ni qaqa, ka kovea na nonai yaya, kevaka sa sega ni vauca mada na qaqa: ena qai kovea emuri na nonai yau. 28Au sa kaya vakaidina vei kemudou, Ena rawa ga me ra kakua ni cudruvi na luve ni tamata ena vuku ni nodrai valavala ca kecega, kei na nodra vosa ca kecega era vosavakacacataka kina na Kalou: 29ia ko koya sa vosavakacacataka na Yalo Tabu ena dredre sara tikoga me kakua ni cudruvi, ka sa dodonu me cudruvi ka tawa mudu: 30ni ra a kaya, Sa dua na yalo tawa-savasava sa tu vua.
31Sa qai lako mai ko iratou na tacina kei na tinana, a ratou s tu etautuba, ka talaki vua, me kaciva mai 32Ia era sa lewe vuqa sa tiko vakavolivolita; ka ra sa kaya vua, Raica, na tinamu kei iratou na tacimu eratou sa tu etautuba, eratou mai qarai iko. 33A sa vosa vei ira, ka kaya, O cei na tinaqu, se ko iratou na taciqu? 34A sa vakaraici ira era sa tiko vakavolivoliti koya, ka kaya, Raica na tinaqu kei iratou na taciqu! 35ni koya yadua ena cakava na veitalia ni Kalou, o koya o qo na taciqu, se na ganequ, se na tinaqu.
Currently Selected:
Marika 3: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
