Marika 1
1
A WASE I. —Ai tukutuku kei Joni na dauveipapitaiso, 1-8. Sa papitaisotaki ko Jisu, 9-11. Sa dauveretaki, 12, 13. A sa qai vakatekivu me vunau, 14, 15. A sa kacivi Petero, kei Adriu, kei Jemesi, kei Joni, me ratou nona tisaipeli, a sa vakatavuvuli, 16-22. Sa vakabula e dua na tamata ka curumi koya e dua na tevoro, kei na tina ni wati i Petero, kei ira sa tauvi-mate era le vuqa, kei na vukavuka e dua, 23-45.
1AI vakatekivu ni tukutuku-vinaka kei Jisu Karisito, na Luve ni Kalou; 2me vaka na nodrai vola na parofita: Raica, au sa tala na noqui talatala me liu e matamu, o koya ena caramaka na nomu sala e matamu: 3A domona e dua sa kacikaci e loma ni veikau, Dou caramaka na sala i Jiova, cakava me dodonu na nona veisalatu. 4Sa dauveipapitaisotaki ko Joni e loma ni veikau, ka vakarota na nodra papitaiso era veivutuni me bokoci nai valavala ca. 5A sa lako mai vua na vanua taucoko ko Jutia, kei ira na kai Jerusalemi, a sa papitaisotaki ira kecega ko koya e na uciwai ko Joritani, ni ra sa vakatusa na nodrai valavala ca.
6A sa vakaisulu ko Joni e nai sulu vuti ni kameli, ka vauci na tolona e na wa kuli-ni-manumanu; a sa kania tiko na vodre kei na oni ni veikau. 7A sa dauvunau, ka kaya, E dua sa muri au mai sa levu cake vei keirau, ia na wa ni nonai vava kaʼu sa sega ni yaga meʼu cuva sobu me sereka. 8E dina kaʼu sa papitaisotaki kemudou e na wai: ia ena papitaisotaki kemudou ko koya e na Yalo Tabu.
9A sa yaco e na gauna ko ya, sa lako mai Nasareci e Kalili ko Jisu, a sa papitai-sotaka ko Joni e na Joritani. 10Ia ni sa cabe sara ko koya mai na wai, sa qai raici lomalagi ni sa wase rua, kei na Yalo ni sa lako sobu vua me vaka na ruve: 11a sa lako mai lomalagi e dua na domo: O iko na noqu Gone ni toko, au sa dauvinakati iko vakalevu.
12A sa vakauti koya vakasauri na Yalo ki na veikau. 13A sa tiko maikea e loma ni veikau e na bogi e vasagavulu, a sa dauveretaki koya ko Satani; a sa tiko vata kei na manumanu tawa lasa; a sa qaravi koya ko ira na agilose.
14IA ni sa biu oti ki na vale ni veivesu ko Joni, sa lako mai ki Kalili ko Jisu, a sa dauvunautaka nai tukutuku-vinaka ni matanitu ni Kalou, 15ka kaya, Sa yaco na gauna, a sa voleka na matanitu ni Kalou; dou veivutuni, ka vakabauta nai tukutuku-vinaka.
16A sa lako voli ko koya e na bati ni wai mai Kalili, a sa raici Saimoni kei Adriu na tacina, erau sa viritaka na lawa ki na wai: ni rau sa gonedau. 17A sa kaya vei rau ko Jisu, Drau muri au mai, kaʼu na qisi kemudrau mo drau yaco me gonedau ni tamata. 18A rau sa biuta saraʼni na nodrau lawa, ka muri koya.
19Ia ni sa lako vakalailai ko koya vaka kiliu, sa raici Jemesi na luve i Sepeteo, kei Joni na tacina, erau sa tiko e na waqa ka oneva na lawa. 20A sa kacivi rau sara ko koya: a rau sa biuta na tamadrau ko Sepeteo e na waqa, kei iratou na tamata, ka muri koya.
21A ratou sa lako ki Kaperinaumi; ia e na siga ni vakacecegu sa curu sara ko koya ki na vale ni lotu, ka vakatavuvuli. 22A ra sa kidacala e na nonai vakavuvuli; ni sa vakatavulici ira me vaka e dua e kaukauwa vakai koya, ka sega ni vakataki ira na vu-ni-vola.
23A sa tiko e na nodra vale ni lotu e dua na tamata ka curumi koya e dua na yalo tawa-savasava; a sa qoqolou cake, 24ka kaya, Ule! a cava vei kedatou, i Jisu na kai Nasareci? o sa lako beka mai me rawai keitou? au sa kila se ko cei ko iko, na Yalosavasava ni Kalou. 25A sa vunauci koya ko Jisu, ka kaya, Mo galu ga, ka lako tani mai vua. 26Ia ni sa dresulaki koya na yalo tawa-savasava, ka qoqolou e na domo levu, sa qai lako tani vua.
27A ra sa kidacala kecega, ka vei tarogi kina vakai ira, ka kaya, A ka cava beka o qo? a cava beka nai vakavuvuli vou o qo? ni sa vosa vakaukauwa vakai koya ga ko koya vei ira na yalo tawa-savasava, a ra sa talairawarawa vua. 28A sa kuruvaki vakasauri na kenai rogorogo mai Kalili, e na yasana kecega sa voleka.
29Ia ni ratou sa lako tani e na vale ni lotu, eratou sa curu sara ki na vale i Saimoni kei Adriu, o iratou vata kei Jemesi kei Joni. 30A sa davo na tina ni wati i Saimoni ni sa tauvi-katakata, a ra sa tukuni koya sara vei koya. 31A sa lako ko koya ka taura na ligana, ka vakaduria cake: a sa takali vakasauri na nona katakata, a sa qaravi iratou ko koya.
32Ia ni sa yakavi mai, ni sa dromu na siga, sa kau mai vei koya ko ira kecega sa tauvi-mate, kei ira ka curumi ira na tevoro e so. 33A ra sa soqoni vata kecega na lewe ni koro e na mata ni katuba. 34A sa Vakabula ko koya na lewe levu sa vuqa na mate sa tauvi ira, ka vakasavi ira na tevoro e lewe levu; a sa sega ni laivi ira na tevoro me ra vosa, ni ra sa kilai koya.
35Ia ni sa mataka mai, sa tu cake ko koya ni sa bogi tu ga na vanua, a sa lako ki tautuba, a sa lako ki na dua na yasana lala, ka masu kina.
36A ratou sa muri koya ko Saimoni, kei iratou eratou sa tiko vata kaya. 37Ni ratou sa qai kunea, eratou sa kaya vua, Sa vakasaqarai iko na tamata kecega. 38A sa kaya vei iratou, Tou lako ki na Veikoro lalai sa voleka, meʼu vunau talega kina: ni sa ka ga o qo kaʼu sa lako mai kina. 39A sa dauvunau ko koya e na nodra veivale ni lotu mai Kalili taucoko, ka vakasavi ira tani na tevoro.
40A sa lako mai vei koya e dua na vukavuka, ka masuta, ka tekiduru vua, ka kaya vua, Kevaka ko sa vinakata, ko sa vakasavasavataki au rawa. 41A sa yalololoma ko Jisu, ka dodoka na ligana, ka tarai koya, ka kaya vua, Au sa vinakata; mo savasava mai. 42Ia ni sa vosa oti, sa takali vakasauri vua na vukavuka, a sa savasava mai. 43A sa vakarota matua vua ko koya, ka vakatala sara yani; 44a sa kaya vua, Raica, mo kakua ni tukuna vua e dua: ia mo laʼki vakatakilai iko vua na bete, ka vakacabora na ka sa vosa kina ko Mosese me nomui vakasavasavataki, mei vakatakilakila vei ira. 45A sa lako tani yani ko koya, ka vakatekivu me tukuna vakalevu, ka cacava-ka na ka, a sa dredre kina vei Jisu me curu votu ki na koro, a sa tiko ga e nai bili e na veiyasana lala: a ra sa lako mai na yasana kecega vei koya.
Currently Selected:
Marika 1: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
