Ai Vola I Maika Na Parofita 3
3
A nodrai valavala vakausausa na turaga, 1-4, kei na nodra dauvosa lasu na parofita, 5-8, kei na nodra tiko vakacegu wale kecega, 9-12.
1IA kaʼu a kaya, Dou vakarorogo mada, na nodra turaga na Jekope, kei kemudou na mataveilewai ni mataqali nei Isireli; Sa sega beka ni kilikili kei kemudou me kila na lewa dodonu? 2Oi kemudou sa cata na ka e vinaka ka vinakata na ka e ca; ka vocia tani vei ira na kulidra, kei na lewedra mai na suidra; 3io, era sa kania na lewedra na noqu tamata, kei na kulidra era sa vocia tani vei ira; kei na suidra era sa musulaka, ka talaka, me vaka sa lewe ni kuro, ka vaka sa lewe ni manumanu e na loma ni kuro levu. 4Era na qai tagi vei Jiova, ia ena sega ni rogoci ira ko koya: ena tabonaka ga na matana vei ira e na gauna ko ya, e na vuku ni sa ca na nodrai valavala.
5Sa vosa vakaoqo ko Jiova e na vukudra na parofita era vakacalai ira na noqu tamata, a ra katia na batidra, ka kacivaka, Na vakacegu; ia ko koya sa tawa solia na kakana ki gusudra era sa vakaraui valu vua. 6O koya o qo ena nomudou kina na bogi ka sega na raivotu; ia ena nomudou na butobuto ka sega na ia na caka-mana vakailasu; io, ena dromu na mata-ni-siga vei ira na parofita, ena siga butobuto ga vei ira. 7Era na qai madua na rairai, ka taqaya na daucaka-mana vakailasu: io, era na ubia na tebenigusudra kecega: e na vuku ni sa sega na ka e cavuta mai na Kalou. 8Ia e dina niʼu sa sinai e na kaukauwa maivei koya na Yalo i Jiova, o na lewa dodonu talega, kei na yalodei, meʼu tukuna vei ira na Jekope na nodra talaidredre, kei ira na Isireli na nodrai valavala ca.
9Dou rogoca mada na ka o qo, oi kemudou na turaga ni mataqali i Jekope, kei kemudou na mataveilewai ni mataqali nei Isireli, e kemudou sa cata na lewa dodonu, kei na ka dodonu kecega dou sa kauta vakatani; 10a sa tarai Saioni e na dra, kei Jerusalemi e na caka cala; 11o ira na nodra turaga era sa ia na veilewai me vakaisolisoli kina, kei ira na nodra bete era sa ia nai vakavuvuli me ra vakaivoli kina, kei ira na nodra parofita era sa ia na caka-mana vakailasu me ra vakailavo kina: ia vei Jiova era na vakararavi ga kina, ka kaya, Sa sega li ko Jiova e tiko kei keda? ena sega ni yacovi keda e dua na ca. 120 koya o qo e na vukumudou ena cukiti kina ko Saioni me vaka na were, ia ko Jerusalemi ena yaco me bukebuke walega, kei na ulu-ni-vanua ni vale tabu ena vaka na veitikina cecere ni veikau.
Currently Selected:
Ai Vola I Maika Na Parofita 3: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
