Ai Vola I Maika Na Parofita 2
2
Sa vunauca na nodrai valavala kaukauwa, 1, 2. Sa tukuna tale na cudru ni Kalou vei ira, 3-5. Sa vunauca na nodra cata na vunau ni Kalou, 6-11. Sa tukuna na vosa ni yalayala ni Kalou vei ira na luve i Jekope e vo, 12, 13.
1E CA vei ira sa nanuma me caka cala, ka bukia na ca e na nodrai mocemoce! ni sa kida na mataka era sa qai cakava, ni sa rawata na ligadra. 2A ra kocova na veiwere, ka kovea; kei na veivale, ka kauta: a ra sa vakacacana na tamata kei na nona mataqali, io, na tamata kei na ka e taukena.
3O koya o qo sa vosa vakaoqo kina ko Jiova; Raica, au sa bukia na kedra ca na mataqali o qo, a ya dou na tawa vakaseavutaka rawa maikina na domomudou; dou na tawa viavialevu lako talega: ni na gauna ca ko ya. 4E na siga ko ya ena taurivaki na kemudoui bole, ka lelevaki na kemudou lele vakatagi, lavaka, Eda sa vakacacani vakaidina: a nodrai votavota na kai noqu sa volitaka ko koya: sa vakaseavutaka tani vei au! vua na dauvuki sa vota kina ko koya na noda veiwere. 5O koya o qo ena sega kina ni vo vei iko e dua me viri dali e na veidigiyaka e nai vavakoso i Jiova.
6Dou kakua ni ia na parofisai; me ra ia ga na parofisai era tawa parofisaitaka na ka vakaoqo: sa tawa mudu na veivakamaduataki. 7A vosa cava o qo, na mataqali i Jekope! sa vakalekalekataki beka na Yalo i Jiova? sa vakaoqo beka na nona cakacaka? a noqu vosa sa tawa yaga beka vei koya sa lako vakadodonu? 8A sa nodrai tovo ga mailiu na noqu tamata me tu cake vakameca: ai tutuvi vata kei nai sulu vakaturaga dou sa kauta tani vei ira era lako vinaka voli mai, io, vei ira era lesu mai nai valu. 9A watidra na noqu tamata dou a vakasevi ira tani mai na nodra veivale domoni; maivei ira na luvedra dou a kauta tani na noqu ka vakaiukuuku, me sega sara tale ni nodra. 10Dou tu cake, ka lako tani; ni sa sega ni nomudoui vakavakacegu o qo: e na vuku ni sa vakadukadukalitaki, ena vakarusai kemudou, io, e na veivakarusai rarawa. 11Ke dua na tamata, e curumi ka lasu tiko, me na vosa lasu ka kaya, Au na parofisaitaka vei iko na waini kei na yaqona; ke sai koya ga me na nodra parofita na tamata o qo.
12Au na vakasoqoni kemudou kece sara dina ga, na Jekope; au na kumuni ira dina vata na vo ni Isireli; au na vakatikori ira vata me vaka na sipi ni Posira, me vaka na qele ni sipi e na loma ni kedra bai: era na ue vakalevu e na vuku ni sa lewe vuqa na tamata. 13Sa liutaki ira cake ko koya sa daubasubasu: era na basu yani, ka lako yani ki na matamata-ni-koro, ka curu yani kina: ia ena liutaki ira ko koya na nodra tui, io, ko Jiova ena nodrai liuliu.
Currently Selected:
Ai Vola I Maika Na Parofita 2: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
