Maciu 24
24
Sa tukuna ko Jisu na ka ca ena yaco ki Jerusalemi, 1-28; kei nai vakatakilakila ni nona lako tale mai, 29-35. Sa vunauci iratou na tisaipeli me ratou vakararau tu, ni sa sega ni kilai na tiki-ni-siga ena lako mai kina na Turaga, 36-51.
1A SA curu yani ko Jisu ka lako tani e na vale ni soro: a ratou sa lako mai na nona tisaipeli me ratou vakatakila vua na veiyasana ni vale ni soro. 2A sa kaya vei iratou ko Jisu, Dou sa raica na ka kecega o qori, ne? au sa kaya vakaidina vei kemudou, Ena sega ni vo tu eke na veivatu sa veitaqataqai, me kakua ni talaraki sobu.
3Ia ni sa tiko ko koya mai na ulu-ni-vanua ni veiolive, sa lako vakatikitiki vua ko iratou na tisaipeli, ka kaya, Tukuna mai vei keitou, se na yaco ninaica na veika o qo? ia ka cava nai vakatakilakila ni nomu lako mai, kei nai vakataotioti kei vuravura?
4A sa vosa ko Jisu, ka kaya vei iratou, Raica vinaka de vakacalai kemudou e dua. 5Ni ra na lewe vuqa era na lako mai e na yacaqu, ka kaya, Oi au na Karisito; ia ka lewe vuqa era na vakacala. 6Ia dou na rogoca nai valu, kei nai rogorogo ni valu: dou raici kemudou vinaka mo dou kakua ni kidroa: ni sa kilikili me yaco na ka kecega o qo, ia ka sa bera ga nai vakataotioti. 7Ni na veibolebolei na veivanua e so, kei na veimatanitu e so: ena yaco talega na dausiga, kei na mate ca, kei na tavuki ni vanua, e na yasana e vuqa 8Ia na ka kecega o qo nai vakatekivu ni ka rarawa. 9Dou na qai soli yani me vakararawataki, ka dou na vakamatei; ia dou na cati vei ira na lewe ni veivanua kecega e na vuku ni yacaqu. 10Ia ena lewe vuqa era na qai tarabe, a ra na veisoliyaki, ka veicati. 11Ena lewe vuqa talega na parofita vakailasu ena tubu cake mai, ia ka lewe vuqa era na vakacala. 12Ia ni sa tubu vakalevu nai valavala ca, ena liliwa mai na nodra loloma na lewe vuqa. 13Ia ko koya ena vosota me yacova nai vakataotioti, ena vakabulai ko koya. 14Ia ena vunautaki e vuravura taucoko nai tukutuku-vinaka o qo ni matanitu, mei vakadinadina ki na veivanua kecega; sa na qai yaco mai emuri nai vakataotioti.
15Ia ni dou sa raica ni sa tu e na tikina tabu na ka vakasisila sa dauveivakarusai, a ya sa vosa kina ko Tanieli na parofita, (me vakananuma ko koya sa wilika:) 16me qai se ki na veiulu-ni-vanua ko ira era sa tiko e Jutia: 17me kakua ni lako sobu mai ko koya sa tiko e na dela ni vale, me kauta tani na ka e na nona vale; 18ia me kakua ni lesu tale ko koya sa tiko e na were, me kauta na nonai sulu.
19Ka na ca vei ira sa bukete, kei ira era sa vakasucuma na gone, e na gauna ko ya! 20Ia dou masu me kakua ni yaco na nomudou se e na vula i liliwa, se e na siga ni vakacecegu: 21ni na qai levu sara na rarawa, ka sega ni vakakina eliu mai nai vakatekivu kei vuravura ka yacova na gauna o qo, ka na sega sara talega emuri. 22Ia kevaka ena sega ni vakalekalekataki na gauna ko ya, ena sega na tamata me bula rawa: ia e na vukudra na digitaki ena vakalekalekataki na gauna ko ya.
23Kevaka ena qai kaya vei kemudou e dua, Kaica, eke na Karisito; se, Maikea; kakua ni dinata. 24Ni na tubu mai na Karisito vakailasu e so, kei na parofita vakailasu e so, a ra na vakatakila na veivakatakilakila lelevu kei na veika e veivakidacalataki; ia ke rawa, ke ra na vakacalai ira talega na digitaki 25Raica, au sa tukuna oti mada vei kemudou eliu. 26Kevaka era na kaya vei kemudou, Raica, sa tiko ko koya mai veikau! kakua ni lako kina: Raica, mai na vale vuni! kakua ni vakadinata. 27Ni sa vaka na livaliva sa lako mai cake, ka liva yani ki ra; ena vaka talega kina na nona lako mai na Luve ni tamata. 28Ni ra na soqoni vata na ikeli ki na yasana kece sa tu kina na yago.
29Ia ni sa oti mada na gauna rarawa ko ya, ena qai vakabutobutotaki vakasauri na mata-ni-siga, ena sega talega ni cila na rarama ni vula, ka na lutu mai lomalagi na veikalokalo, ka na veitosoyaki na veika kaukauwa ni lomalagi: 30ena qai rairai mai nai vakatakilakila ni Luve ni tamata mai lomalagi; ena qai tagi na veimataqali vakaaduaga e vuravura, era na qai raica na Luve ni tamata ni sa lako mai e na veio ni lomalagi e na kaukauwa kei nai ukuuku levu. 31Ia ena talai ira na nona agilose ko koya e na davui domoilevu, ka ra na vakasoqoni ira vata na nona digitaki mai na mata ni cagi e va, mai na vu ni lagi e dua ka yacova nai kadua.
32Mo dou kila mada na vosa vakatautauvata e na lolo: Ni sa qai lavo vou na tabana, a sa tubu na drauna, dou sa kila kina ni sa voleka na vula i katakata: 33Sa vaka talega kina koi kemudou, ni dou sa raica kecega na ka o qo, dou kila ni sa voleka, io mai na katuba. 34Au sa kaya vakaidina vei kemudou, Ena sega ni takali mada nai tabatamata o qo, ena yaco eliu na ka kecega o qo. 35Ena takali ko lomalagi kei vuravura: ia na noqu vosa ena sega ni takali.
36Ia na siga ko ya kei na tiki-ni-siga ko ya sa sega e dua e kila, o ira na agilose mai lomalagi e segai, ia ko koya duaduaga na Tamaqu. 37Ia me vaka dina na siga i Noa, ena vaka talega kina na nona lako mai na Luve ni tamata: 38ni na vaka ni ra sa kana e so, ka gunu, sa vakawati ka veimusumusukitaki me ra vakawati, e na gauna sa liutaka na waluvu, ka yacova na siga sa curu kina ko Noa ki na waqa: 39a ra sa sega mada ni kila eliu, a sa qai yaco dina na waluvu, ka kauti ira kece yani; ena vaka talega kina na nona lako mai na Luve ni tamata. 40Ena qai lewe rua erau na tiko e na veiwere; ena kau tani e dua, ka biu e dua. 41Ena lewe rua na yalewa erau na qaqi sila, ena kau tani e dua, ka biu e dua.
42O koya mo dou qai vakatawa; ni dou sa sega ni kila na tiki-ni-siga sa lako mai kina na nomudou Turaga. 43Ia dou kila ga o qo, kevaka e kila nai taukei ni vale na tiki-ni-bogi e lako mai kina na daubutako, sa vakatawa ga, ka sega ni biuta na nona vale me ravabasuki. 44O koya mo dou qai vakararau tu, koi kemudou talega: ni sa lako mai na Luve ni tamata e na tiki-ni-siga dou sa sega ni nanuma kina. 45Ia ko cei na tamata yalododonu ka vuku, sa lesia ko na nona turaga me lewai ira na nona lewe-ni-vale, me solia vei ira na kedra e na gauna dodonu? 46Sa kalougata na tamata ko ya, o koya ena kunea ko na nona turaga ni sa kitaka vakakina, ni sa lako mai ko koya. 47Au sa kaya vakaidina vei kemudou, Ena lesi koya me lewa na nona ka kecega. 48Ia kevaka ena kaya e lomana na tamata ca ko ya, Sa vakaberaberataka na nona lako mai na noqu turaga: 49a sa vakatekivu kina me yaviti ira na nonai tokani, me daukana talega ka daugunu vata kei ira na daumateni; 50ena lako mai na turaga ni tamata ko ya e na siga e sega ni namaka kina, kei na tiki-ni-siga e sega ni kila kina; 51ena qai varo-musuka rua, ka vota vua mei votavota vata kei ira na dauveivakaisini: ena dautagi kina, ka katia na batina.
Currently Selected:
Maciu 24: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
