Maciu 23
23
Sa vakavulici ira na tamata ko Jisu me ra muria na nodrai vakavuvuli vinaka na Farisi kei na vu-ni-vola, ia me ra kakua ga ni muria na nodrai valavala ca, 1-12. Sa qai vunauci ira na Farisi, a sa vakatakila ni na ca ko Jerusalemi, 13-39.
1SA qai vosa ko Jisu vei ira na lewe vuqa, vei iratou talega na nona tisaipeli, 2ka kaya, Sa tiko e nai tikotiko i Mosese ko ira na vu-ni-vola kei ira na Farisi; 3ia na ka kecega era sa kaya vei kemudou mo dou vakabauta, dou vakabauta ga ka cakava; ia dou kakua ga ni kitaka na nodrai valavala, ni ra sa vosa ga ka sega ni cakava. 4Ni ra sa vauca nai colacola bibi e dredre sara ni colati, ka vakataqara e na usouso-ni-domodra na tamata; a ra sa sega ni via vakayavalata e na dua na nodrai qaqalo. 5Ia na nodra cakacaka kecega era sa kitaka me raici ira kina na tamata: era sa vakarabailevutaka na nodra veivakananumi tabu, ka ra sa vakalevutaka na tutu ni nodrai sulu, 6a ra sa vinakata nai tikotiko vakaturaga e na veisolevu, kei nai tikotiko ni qase e na veivale ni lotu, 7kei na veikidavaki e na veirara ni veivoli, me vakatokai talega vei ira na tamata, Vakavuvuli, Vakavuvuli. 8Ia koi kemudou, dou kakua ni vakatokai mei Vakavuvuli: ni sa dua bauga na nomudou Turaga, o koya na Karisito; ia dou sa veiwekani kecega. 9Dou kakua talega ni vakatoka e dua me tamamudou e vuravura; ni sa dua bauga na Tamamudou, o koya mai lomalagi. 10Dou kakua talega ni vakatokai me turaga: ni sa dua bauga na nomudou Turaga, o koya ua Karisito. 11Ia ko koya sa uasivi cake vei kemudou, me nomudoui talatala ko koya. 12Ia ko koya ena vakalevulevui koya, ena vakamalumalumutaki: ia ko koya ena vakamalumalumutaki koya, ena vakalevulevui.
13Ia e ca vei kemudou, na vu-ni-vola kei na Farisi, na dauveivakaisini! ni dou sa sogota na matanitu vakalomalagi vei ira na tamata: ni dou sa sega ni curu rawa kina koi kemudou, se laivi ira era sa curu tiko me ra curu kina.
14E ca vei kemudou, na vu-ni-vola kei na Farisi, na dauveivakaisini! ni dou sa kovea na nodrai yau na yada, ni dou sa masu balavu tiko me veivakaisini: o koya o qo dou na cudruvi vakalevu cake kina.
15E ca vei kemudou, na vu-ni-vola kei na Farisi, na dauveivakaisini; ni dou sa lako voli e na Wasawasa kei na vanua me cakava e dua me tamata lotu vakai kemudou; ia ni sa caka oti, dou sa cakava me luve ni eli vakarua vei kemudou.
16E ca vei kemudou, nai vakavuvuli mataboko! dou sa kaya, O koya ena bubului ka cavuta na vale ni soro, a ka wale ko ya; ia ko koya ena bubului ka cavuta na koula ni vale ni soro, sa vauci kina ko koya. 17Na lialia ka mataboko! a cava vei rau e levu cake, a koula, se na vale ni soro sa vakatabui kina na koula? 18Ia, O koya ena bubului ka cavuta nai cabocabo-ni-madrali, a ka wale ko ya; ia ko koya ena bubului ka cavuta nai madrali sa koto kina, sa vauci kina ko koya. 19Na kalia ka mataboko! a cava vei rau e levu cake, ai madrali, se nai cabocabo-ni-madrali sa vakatabuya nai madrali? 20O koya sa bubului ka cavuta nai cabocabo-ni-madrali, sa bubului ka cavuta o qori, kei na ka kecega sa koto kina: 21ia ko koya sa bubului ka cavuta na vale ni soro, sa bubului ka cavuta o qori, vei koya talega sa tiko kina: 22ia ko koya sa bubului ka cavuta na lomalagi, sa bubului ka cavuta nai tikotiko vakaturaga ni Kalou, vei koya talega sa tiko kina.
23E ca vei kemudou, na vu-ni-vola kei na Farisi, na dauveivakaisini! ni dou sa solia nai katini ni botebotekoro, kei na veika vakaoqo, ia dou sa biuta laivi na veika bibi e na vunau, nai valavala dodonu, kei na loloma, kei na vakadinata: a ya e kilikili kei kemudou me kitaka, me kakua talega ni biu laivi ko ya. 24Ai vakavuvuli mataboko! dou sa tauvulona na nana, ia na kameli dou sa tiloma ga.
25E ca vei kemudou, na vu-ni-vola kei na Farisi, na dauveivakaisini! ni dou sa vakasavasavataka na bilo kei na dari etaudaku, ia na lomana sa sinai e na daubutako kei na garogaro. 26A Farisi mataboko! mo vakasavasavataka mada na loma ni bilo kei na dari, me mai savasava talega etaudaku.
27E ca vei kemudou na vu-ni-vola kei na Farisi, na dauveivakaisini! ni dou sa vaka na veivale ni bulubulu ei boro vulavula, era sa rai vinaka etaudaku, ia na lomadra sa sinai e na sui ni mate, kei na ka kecega sa velavela. 28Sa vaka talega kina koi kemudou, dou sa rairai etaudaku vei ira na tamata me tamata dodonu, ia eloma dou sa sinai e na dauveivakaisini kei na ka e tawa dodonu.
29E ca vei kemudou na vu-ni-vola kei na Farisi, na dauveivakaisini! ni dou sa tara na nodra veivale ni bulubulu na parofita, ka vakaiukuukutaka na nodra veivale ni bulubulu na tamata yalododonu, 30ka kaya, Kevaka edatou a bula e na gauna ni nodatou qase, edatou a bese ni lomavata kei ira e na vakamatei ira na parofita. 31O koya o qo dou sa tukuni kemudou kina, ni dou sa luvedra era vakamatei ira na parofita. 32Ia mo dou vakasinaita nai vakarau ni nomudou qase. 33Na gata, a luve ni gata loaloa! dou na dro rawa vakaevei mai na cudruvi mai eli?
34Ia ka raica, au na tala yani vei kemudou e so na parofita, kei na tamata vuku, kei na vu-ni-vola; ia e so vei ira dou na vakamatea ka vakota ki na kauveilatai; ka so dou na vakanakuitataka e na nomudou veivale ni lotu, ka vakasavi ira mai na koro e dua ki na koro e dua: 35me yaco kina vei kemudou nai sau ni kedra dra na tamata yalododonu kecega ka vakadavei e vuravura: mai na dra i Epeli na yalododonu ka yaco ki na dra i Sakaria na luve i Para-kia, o koya dou a vakamatea e na tadrua ni vale ni soro kei nai cabocabo-ni-madrali. 36Au sa kaya vakaidina vei kemudou, A ka kecega o qori ena yaco ki nai tabatamata o qo.
37I Jerusalemi, Jerusalemi! o iko sa vakamatei ira na parofita, ka viriki ira sa talai yani vei iko, au a nanuma vakavica vata meʼu vakasoqoni ira na nomu gone, me vaka na toa yalewa sa vakasoqoni ira na luvena e ruku ni tabana, ia dou a sega ni vinakata! 38Raica, sa qai biu vei kemudou na nomudou vale me laladidi: 39niʼu sa kaya vei kemudou, Dou na sega ni raici au tale, ka malua dou na kaya mada, Sa kalougata ko koya sa lako mai e na yaca ni Turaga.
Currently Selected:
Maciu 23: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
