Ai Vola I Jona Na Parofita 1
1
A WASE I. —O Jona, ni sa talai ki Ninive, sa dro ki Tarisisi, 1-3. Sa labati ira na cagi levu, a sa kilai kina ni sa dro ko Jona, 4-12. Sa balati ki wai, 13-16. Sa tilomi koya e dua na ika levu, 17.
1A SA yaco na vosa i Jiova vei Jona na luve e Emitai, ka vaka,
2Mo tu cake, mo lako ki Ninive, na koro levu ko ya, ka vunauca; ni sa lako cake mai ki mataqu na nodra ca. 3Ia ka sa tu cake ko Jona me dro ki Tarisisi mai na mata i Jiova, a sa lako sobu ki Yafa; a sa kunea e dua na waqa sa soko ki Tarisisi: a sa solia nai lavo me nona vodovodo, ka laʼki vodoka, ka me lako kei ira ki Tarisisi mai na mata i Jiova.
4Ia ko Jiova sa tala yani e dua na cagi levu ki na wasawasa, a sa cava levu na Wasawasa, ia na waqa sa nanumi ena sa mate ga. 5Era sa qai rere na lewe ni waqa, a ra sa dui tagi yadua ki na nona kalou, a ra biuta ki wai nai usa ni waqa, me nawa. Ia ko Jona sa lako sobu ki dreke; a sa moce lutu koto.
6A sa toro vua na turaga ni waqa, ka kaya vua, O sa vakaevei ni ko sa moce lutu koto? tu cake, ka tagi vua na nomu Kalou, de na nanumi keda beka mai na Kalou, me da kakua ni mate. 7A ra sa veivosaki, ka kaya, Me da mai vakawiri madigi, me da kila se na vuku i cei sa yaco kina na ca o qo vei keda. A ra vakawiri madigi, a sa qaravi Jona.
8A ra sa kaya vua, Tukuna mada vei keitou, se na vuku ni cava sa yaco kina na ca o qo vei keda; o sa matai ni cava? ia ko sa lako maivei? o cei na nomu vanua? ia dou sa yavusa vata kei cei? 9A sa kaya vei ira ko koya, Oi au na Iperiu; ia ko Jiova, na Kalou ni lomalagi, kaʼu sa rerevaka, o koya sa bulia na waitui kei na vanua mamaca. 10A ra sa qai rere vakalevu sara na tamata, a ra sa kaya vua, A cava ko sa cakava kina na ka o qo? ni ra kila na tamata, ni sa dro ko koya mai na mata i Jiova, ni sa tukuna vei ira. 11A ra sa qai kaya vua, A cava me keitou kitaka vei iko, me maravu kina na wasawasa vei keda? ni sa tubu vakalevu cake tikoga na biau e na wasawasa. 12A sa kava vei ira ko koya, Dou laveti au, ka balati au ki waitui; ena qai mudu ni labati kemudou na biau: niʼu sa kila ni sai au ga sa liwaki kemudou kina na cava levu o qo.
13A ra sa tabalaka nai voce na tamata me vakasavuya donu ki vanua na waqa; a ra sa sega ni rawata: ni sa tubu vakalevu cake tikoga vei ira na biau e na wasawasa. 14A ra sa tagi vei Jiova, ka kaya, Keitou sa masuti iko, Jiova, keitou sa masuti iko, me keitou kakua ni mate nai sau ni tamata o qo, ia me kakua ni tauci keitou na dra tawa cala: ni sai iko, Jiova, sa cakava na nomu veitalia. 15A ra sa laveti Jona cake, ka balati koya ki waitui: a sa qai mudu ni cudru na Wasawasa. 16Ia ko ira na tamata era sa qai rerevaki Jiova vakalevu sara, a ra sa cabora nai soro vei Jiova, ka ia na vosavavakini.
17A SA vakarautaka ko Jiova e dua na ika levu me tilomi Jona. A sa tiko ko Jona mai na kete ni ika ka siga tolu ka bogi tolu.
Currently Selected:
Ai Vola I Jona Na Parofita 1: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
