Ai Vola I Isaia, na Parofita 9
9
Ni sa ka levu sara na butobuto, ena qai sucu mai na Karisito me rarama levu, 1-7. Era na cudruvi na Isireli e na vuku ni nodra viavialevu, 8-12, kei na nodra lotu vakailasu, 13-17, kei na nodra tawa veivutuni, 18-21.
1IA ena tawa butobuto tu ga ko koya sa vakararawataki o qo: me vaka ni sa beci eliu na vanua ko Sepuloni kei na vanua ko Nafitali, ena vakarokorokotaki e na gauna maimuri na yasayasa vakawaitui, na bati ni Joritani, ko Kalili ni veimatanitu. 2O ira na tamata ka lako e na butobuto, era sa raica na rarama levu; vei ira sa tiko e na yasana ni yaloyalo ni mate sa cadra cake kina na rarama. 3O sa qai vakalevutaka na matanitu, o sa vakaikuritaka na kena marau; era sa marau e matamu me vaka na marau ni sa cava na yabaki, ka vaka na nodra marau era sa vota nai toki ni valu. 4Io na nonai savenaki bibi, kei nai vua ni domona, kei nai titoko i koya ka vakasaurarataki koya, ko sa musuka me vaka e na siga i Mitiani. 5Io na nodrai yaragi kecega na dauia nai valu kei na kaila ni valu, kei nai sulu sa vakatatoqitoqi e na di a, ena ka ga me visa, me buka ni buka waqa.
6Ni sa sucu mai e dua na gone me noda, sa soli mai vei keda e dua na goneatagane: ena virikotori ki tabana na lewa: ena vakatokai na yacana ko Veivakidacalataki, ko Vakavuvuli, na Kalou kaukau wa, na Tama ni gauna tawa mudu, na Tui ni Sautu. 7Ena tawa oti na kena tubu na nona lewa kei na sautu, e nai tikotiko vakaturaga i Tevita, kei na nona matanitu, me vakataudeitaka, ka vakaukauwataka e na lewa dodonu kei nai valavala dodonu mai na gauna o qo ka yacova na gauna kecega. A lomakatakata i Jiova ni lewe vuqa ena cakava na ka o qo.
8SA tala na vosa na Turaga kivei ira na Jekope, a sa tauci ira na Isireli. 9Ena kila kina ko ira na tamata kecega, na Ifireimi kei na kai Samaria, era sa kaya e na viavialevu kei na kaukauwa ni lomadra, 10Sa bale sobu na vatu-buli, ia e na vatu sa ta eda na qai tara tale kina: sa ta sobu na lolo, ia eda na qai vakaisosomitaka e na sitari. 11Ia ko Jiova ena qai vakalevulevui ira na meca i Risina me vala vei ira, ena qisi ira talega na nodra meca dina me ra to vata kei ira; 12o ira na kai Siria mai cake, kei ira na kai Filisitia mai ra; a ra na tilomi ira sara na Isireli. E na ka kece o qo sa sega ga ni lesu tani kina na nona cudru, ka sa laveti tu ga na ligana.
13Ia ni ra sa sega ni lesu mai na tamata vei koya sa yaviti ira, a ra sa sega ni qaravi Jiova ni lewe vuqa: 14ena muduka tani kina ko Jiova maivei ira na Isireli na uluna kei na buina, na ulu ni niu kei na taria, e na siga e dua bauga. 15A qase kei koya sa rogo, o qori na uluna; a parofita sa vakavulica na ka lasu, o koya na buina. 16Io ko ira sa tuberi ira na tamata o qo, era sa vakasesei ira; o ira era sa tubera, era sa tilomi sara. 17Ia na Turaga ena sega kina ni rekitaki ira na nodra cauravou, ena sega talega ni yalolomani ira na nodra gone era luveniyali kei na nodra alewa dawai: ni ra sa dui veivakaisini kai valavala ca, a gusudra kece sa daucavuta ga na ka lialia. E na ka kece o qo sa sega ga ni lesu tani kina na nona cudru, ka sa laveti tu ga na ligana.
18Ni sa waqa na yaloca me vaka na buka; ena kania na kau vakavotona kei na soni; ena vakacaudreva na kau ni veikau, ka kuvu cake me vaka na kubou. 19Sa vakabutobutotaki na vanua e na cudru i Jiova, ia na tamata era sa vaka na buka ni buka waqa: ena sega e yalololoma vua na tacina. 20Ena kaliraka mai nai matau, ka viakana ga; ena kana mai nai mawi, ka sega ni mamau: era na dui kania na lewe ni ligana: 21ena kani Ifireimi ko Manase, kei Manase ko Ifireimi: a rau na to vata me cati Juta. E na ka kece o qo sa sega ga ni lesu tani kina na nona cudru, ka sa laveti tu ga na ligana.
Currently Selected:
Ai Vola I Isaia, na Parofita 9: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
