Ai Vola I Isaia, na Parofita 8
8
Sa tukuni ni na rawai Siria kei ira na Isireli ko Asiria, 1-4; ena rawai ira talega na Juta e na vuku ni nodra tawa vakabauta, 5-8. Ena tawa vakadaroi rawa na lewa ni Kalou, 9-16; o ira era sa rerevaki koya era na vakacegui, 17, 18; Ena vakararawataki ko ira sa vakararavi ki na kalou lasu, 19-22.
1A SA kaya vei au ko Jiova, Mo kauta vei iko e dua na rara ni volavola levu, ka vola vakamacala kina E na vuku i Measalalasipasi [Kusarawa ki nai toki ni valu! kusa ki nai yau!]. 2Ia kaʼu a kauta vei au e rua na tamata dina me rau vakadinadinataka, ko Uriya na bete, kei Sikariya na luve i Yiperekiya. 3Ia kaʼu a lako vua na parofita alewa; a sa kunekune mai ko koya, a sa vakasucuma na goneatagane. A sa kaya vei au ko Jiova, Mo vakatoka na yacana ko Measalalasipasi. 4Ka ni na sa tawa vuku na gone me kaci, Tamaqu, kei tinaqu, ena kauti tani nai yau mai Tamasiko, kei nai toki ni valu mai Samaria kivei tui Asiria.
5A sa vosa tale vei au ko Jiova, ka kaya, 6E na vuku ni sa beca ko ira na tamata o qo na wai ni Siloa sa drodro malua, ka ra marautaki Risina kei koya na luve i Rimaliya; 7raica, sa qai ia kina na Turaga me kauta cake mai vei ira na wai ni uciwai, sa kaukauwa ka levu, io na tui Asiria, kei na nona kaukauwa vakaturaga kecega: ia na uciwai o qo ena tubu cake e na kena dreke-ni-wai kecega, ka vuabale e na batina kecega: 8ena dave voli mai ki Juta; ena luvu ka ua voli mai; ena cavaraki ki na domo; ia ni sa vakate tabana ena ubi kece sara kina na nomu vanua, Imanueli.
9Dou soqoni vata vakaivalu, na veimataqali, ia dou na musuki ga; dou rogoca, na lewe ni veivanua vakayawa: dou vauci kemudou, dou na musuki ga; dou vauci kemudou, ia dou na musuki ga. 10Dou ia na bose, ena vukici ga; dou tukuna na vosa, ena sega ga ni yaco: ni sa tiko kei keimami na Kalou. 11Ni sa vosa vakaoqo vei au ko Jiova me vakaukauwa, ka vakasalataki au meʼu kakua ni lako e nodra sala na tamata o qo, ka sa kaya, 12Dou kakua ni cavuta me vere na ka kece era sa cavuta na tamata o qo me vere; dou kakua talega ni rerevaka na ka era rerevaka, se kidroa. 13Ia ko Jiova ni lewe vuqa, dou vakarokorokotaki koya ga; me sai koya ga dou sa rerevaka, me sai koya ga dou sa kidroa kina. 14Ia ena yaco ko koya me vale tabu; kei na vatu era na tarabe kina, kei na vatu era na bale kina na mataqali ruarua nei Isireli; enai cori talega ka tudai kivei ira na kai Jerusalemi. 15Ia ena tarabe kina na lewe vuqa, era na bale, ka ramusu, ka coriti, ka tauri. 16Mo viviga nai vola ni tukutuku, dregata na vunau me nodra na noqu tisaipeli.
17Ia kaʼu na waraki Jiova, o koya sa tabonaka na matana mai na mataqali i Jekope, kaʼu na namaki koya. 18Kaica, oi au kei ira na gone sa solia mai vei au ko Jiova, e keitou sa soli mei vakatakilakila kei na ka e veivakidacalataki vei ira na Isireli maivei Jiova ni lewe vuqa, o koya sa tiko mai na ulu-ni-vanua ko Saioni.
19Ia ni ra na kaya vei kemudou, Dou laʼki tarogi ira sa curumi, kei ira na rairai era sa kaci ka kudru: me ra kakua li ni tarogi koya na nodra Kalou na tamata? me ra lako li vei ira na mate e na vukudra na bula? 20io ki na vunau ga kei nai tukutuku: kevaka era sa vosa ka sega ni vaka na vosa o qo, sai ira ga sa sega vei ira na rarama ni mataka. 21A ra na lako voli yani, ka vakararawataki ka viakana: ia ena yaco, ni ra sa viakana, era na cudruvi ira vakai ira, ka rukaki rau na nodra tui kei na nodra Kalou, a ra na rai kicake, 22a ra na rai ki vuravura talega; ka kunea na ka rarawa kei na butobuto, na butobuto kei na yaluma; a ra na vakasavi tani ki na butobuto.
Currently Selected:
Ai Vola I Isaia, na Parofita 8: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
