Ai Vola I Isaia, na Parofita 10
10
Ena ca na turaga erai valavala vakaukauwa, 1-4. Ena musuki ko Asiria, na kedrai wau na dauveivakaisini; e na vuku ni viavialevu, 5-19. Ena vakabulai na kedra vo ni Isireli, 20-27. Sa mai kabai Jerusalemi ko tui Asiria, a ra sa cudruvi sara na nonai valu, 28-34.
1ENA ca ko ira sa viritu nai vakaro tawa dodonu, ka vola na ka rarawa era sa lesia; 2me vakasukai ira tani na dravudravua mai na veilewai dodonu, ka kauta tani na dodonu vei ira na noqu tamata era sa malumalumu, me ra kovea na nodrai yau na alewa dawai, ka butakoci ira na luveniyali! 3Ia ka cava mo dou qai cakava e na siga ni veilakovi, kei na veivakarusai sa lako vakayawa mai? dou na dro vei cei me vukei kina? ia dou na laiva kivei na ka dou sa dokai kemudou kina? 4Niʼu sa laivi ira, era na cuva kei ira na bobula, ka bale kei ira na moku. E na ka kece o qo sa sega ga ni lesu tani kina na nona cudru, ka sa laveti tu ga na ligana.
5O na ca ko iko na kai Asiria, nai titoko ni noqu cudru; ia na matanakilagi e na ligadra sa noqu cudru waqawaqa. 6Au na talai koya ki na matanitu dauveivakaisini, ia ki na mataqali kaʼu sa cudruva kaʼu na vakaroti koya, me ia na veitokitaki, kei na veikoveraki, me buturaki ira sobu me vaka na oruoru e na salatu. 7Ia ko koya, ena sega ni nanuma e vakakina; ia na lomana, ena sega ni nakita vakakina; ni sa lomana ga me ia na veivakarusai, ka muduka na matanitu e vuqa. 8Ni sa kaya, Sa sega li ni ra tui dina na qau turaga? 9Sa sega ni vakai Karikimisi ko Kalino? sa sega ni vakai Eripati ko Emaci? sa sega li ni vakai Tamasiko ko Samaria? 10Me vaka ni sa kunea ko na ligaqu na kedra veimatanitu na ka lasu, ka sa uasivi cake talega na nodra matakau e na nodra ni Jerusalemi kei Samaria; 11ia na ka kaʼu a cakava ki Samaria kei na nona matakau, meʼu sega li ni cakava vaka talega, kina ki Jerusalemi kei na nona matakau? 12Ia ena yaco, ni sa vakaotia ko Jiova na nona cakacaka kecega ki na ulu-ni-vanua ko Saioni kei Jerusalemi, kaʼu na qai cudruva na vua ni nona yalolevu na tui Asiria, kei na lagilagi ni nona mata viavialevu. 13Ni sa kaya ko koya, E na kaukauwa ga ni ligaqu kaʼu sa rawata, e na noqu vuku; niʼu sa yalomatua: ia kaʼu sa kisira nai yalayala ni veimatanitu, ka kovea na nodrai yau, kaʼu sa vakasivoki ira na lewena me vaka na qaqa: 14ia na ligaqu, sa kunea na nodrai yau na veimatanitu me vaka sa sova ni yaloka; me vaka e dua sa kumuna na yaloka sa biu tu, kaʼu sa kumuni vuravura kecega; a sa sega e vakayavala tabana, se dalaga gusuna, se tagitagi. 15Me dokai koya li na matau vei koya sa tavaka? me sa vakalevulevui koya li nai toqa vei koya sa toqalaka? me vaka nai titoko ni sa laveti ira sa laveta; me vaka na matanakilagi ni sa laveta na ka sa sega ni kau. 16Ia na Turaga, na Turaga ni lewe vuqa, ena tala kina vei ira na nona tamata uro na suivotu; e ruku ni nonai ukuuku ena tutuvaka na buka me vaka na kena waqa na buka waqa. 17Ia na nodra Rarama na Isireli ena yaco me buka, kei Koya na nodra Yalosavasava me yameyame ni buka: ena waqa ga ka vakayavuna na nona kau votovotoa kei na nona soni e na siga e dua bauga; 18ia nai ukuuku ni nona veikau kei na nona were bulabula, na yalona kei na yagona, ena vakayavuna ko koya: ia ena vaka na nona suivotu mai e dua sa tauvi mate. 19Ia na kena vo ni kau ni nona veikau ena lailai ga, sa na vola rawa na gone.
20IA ena yaco e na siga ko ya, o ira na kedra vo ni Isireli, kei ira ni mataqali i Jekope era dro bula, era na tawa vakararavi tiko vua ka yaviti ira; era na vakararavi vakaidina ga vei Jiova, ko Koya na Yalosavasava nei Isireli. 21Ena lesu mai na kena vo, na kedra vo ni Jekope, vua na Kalou kaukauwa. 22Ia kevaka ena vaka na nuku ni wasa liwa ko ira na nomu tamata, Isireli, ena lesu mai na kedra vo walega: na kawaboko sa lesi me yaco ena vuabale ga e na caka dodonu. 23Io na kawaboko, o qori sa lesi, ena vakayacora ga na Turaga ko Jiova ni lewe vuqa e loma i vuravura kecega.
24Ia ka sa vaka na Turaga ko Jiova ni lewe vuqa, Dou kakua ni rere, na noqu tamata sa tiko mai Saioni, e na vukuna na kai Asiria: ena yaviti iko ko koya e nai titoko, ka laveta vei iko na nona matanakilagi, me vakataki Ijipita: 25ka sa vo e lailai sara ga, ena qai tini na cudru waqawaqa, kei na noqu cudru e na nodra rusa. 26Ia ko Jiova ni lewe vuqa ena vakauqeta na kuita me kena me vaka na nodra yaviti na kai Mitiani mai na uluvatu ko Orepi; a nonai titoko ena tauca na wasawasa, ia ena laveta tale ko koya me vaka mai Ijipita. 27Ia ena yaco e na siga ko ya, ena kauti tani na nonai kaukau mai na nomui colacola, kei na nonai vua mai na domomu; ia ena musuki nai vua e na vuku i koya sa lumuti.
28Sa yaco ko koya ki Aiaci; sa lako yani ki Mikironi; sa laiva tu yani ki Mikimasi na nonai yaya: 29era sa sivia na tadrua ni uluvatu: era sa moce ki Kepa; sa rere ko Rama; sa dro ko Kipia na koro i Saula. 30Mo qoqolou, na gonealewa ni Kalimi! mo vakarogoca, Leisi! ule ko Anacoci! 31Sa se ko Matimena; sa kubu na kai Kepemi. 32Sa bogi dua ga mai Nopi ko koya: ena qai laveta na ligana ki na ulu-ni-vanua ni gonealewa ni Saioni, ki na ulu-ni-koro ko Jerusalemi.
33Raica, na Turaga, ko Jiova ni lewe vuqa, ena tamusuka vakaukauwa vakaidina na tabana; ena ta sobu na ka cecere; ia na ka viavialevu ena vakamalumalumutaki. 34Ena taya sobu ko koya na kau ni veikau e na matau, ia ko Lipanoni o qo ena tava-kabalea ko Koya sa Kaukauwa.
Currently Selected:
Ai Vola I Isaia, na Parofita 10: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
