Ai Vola I Isaia, na Parofita 7
7
Ni sa rerevaki Risina kei Peka ko Aasi, 1-4, sa vakacegui koya ko Isaia, 4-9. Ni sa bese ni digitaka ko Aasi e dua nai vakatakilakila, sa qai yalataka vua na Mesaia mei vakatakilakila, 10-16. A sa tukuna ni na yaco mai na nona cudruvi ko Aasi mai na vanua ko Asiria, 17-25.
1A SA yaco e na gauna i Aasi, na luve i Yocami, na luve i Usiya, na tui Juta, ni rau sa qai lako cake ki Jerusalemi, ko Risina na tui Siria, kei Peka na luve i Rimaliya, na tui Isireli, me kabata, a rau sa sega ni kabata rawa. 2A sa tukuni ki na mataqali i Tevita, ka vaka, Sa to vata ko Siria kei Ifireimi. A sa yavala na lomana, kei na lomadra na nona tamata, me vaka sa yavala na kau ni veikau e na mata ni cagi. 3Sa qai kaya vei Isaia ko Jiova, Mo drau lako mada, o iko kei Siari-yasupi na luvemu me tavaki Aasi, ki na mua ni savu ni wai drano maicake ki na salatu mai nodratou na dausavai sulu; 4ka kaya vua,
Mo qarauni iko, mo vakacegu; kakua ni ko rere, se yalolailai e na vukudrau na bui ni kau o qo sa kubou tu, io e na vuku ni nodra cudru waqawaqa ko Risina kei Siria, kei na luve i Rimaliya. 5Ka ni ra sa bukia na ka ca vei iko ko Siria, kei Ifireimi, kei koya na luve i Rimaliya, a ra sa kaya, 6Me da lako cake ki Juta, ka vakararawataka, ia me da basuka me noda, ka vakatikora kina e dua na tui, io na luve i Tapeli: 7sa vaka na Turaga ko Jiova, Ena sega ga ni rawa, se yaco: 8ni sa ulu ga i Siria ko Tamasiko, a sa ulu ga i Tamasiko ko Risina; ia ena sega ni oti na yabaki e onosagavulu ka lima, ena musuki mada eliu ko Ifireimi, me kakua ni matanitu. 9Ia na ulu ga i Ifireimi ko Samaria, kei na ulu i Samaria na luve i Rimaliya. Kevaka dou na tawa vakadinata, dou na tawa vakataudeitaki.
10A sa vosa tale vei Aasi ko Jiova, ka kaya, 11Mo kerea e dua nai vakadinadina me nomu maivei Jiova na nomu Kalou; mo kerea e dua mai na tikina titobu, se na tikina cecere ecake. 12A sa kaya ko Aasi, Au na sega ni kerea, ia kaʼu na sega ni vakatovolei Jiova vakaca. 13A sa kaya ko Isaia, Dou rogoca mada na mataqali i Tevita; A ka lailai beka na nomudou vakaocai ira na tamata, mo dou sa vakaocai koya talega na noqu Kalou? 14Ia ko Jiova vakai koya ga ena solia vei kemudou e dua nai vakadinadina; Raica, ena bukete e dua na gonealewa, ena vakasucuma e dua na goneatagane, ena vakatoka na yacana ko Imanueli: 15na uro ni wai-ni-sucu ena kania ko koya, ka me kila mada me biuta na ka e ca, ka digitaka na ka e vinaka: 16ia ni sa bera ni kila ko koya na gone me biuta na ka e ca, ka digitaka na ka e vinaka, ena lala mada na nodrau vanua ruarua na tui ko sa rerevaka.
17Ena vakayacora ko Jiova vei iko, vei ira talega na nomu tamata, kei na mataqali i tamamu, na gauna sa sega tale e vakakina, mai na siga sa lako tani kina mai Juta ko Ifireimi; io na tui Asiria. 18Ia ena yaco e na siga ko ya, ena kalu ko Jiova ki na lago sa tiko mai na vu ni uciwai ni Ijipita, kei na lagotavuivui mai na vanua ko Asiria: 19ia ena lako mai, ena tiko kece e na veibuca e lala, kei na veiqara ni uluvatu, kei na kau vakavotona kecega, kei na veico kecega. 20E na siga ko ya ena tasia ko Jiova e nai toroi sa voli mai na tai kadua ni uciwai, io ko tui Asiria, na ulu, kei na vutika ni yava; ia na kumi talega ena tasia laivi. 21Ia ena yaco e na siga ko ya, ena vakabula na tamata e dua na nona karavau alewa, ka rua na nona sipi; 22ena yaco, e na vuku ni kena levu ni wai-ni-sucu ena rawa maikina ena kana ko koya ki na uro ni wai-ni-sucu: ni ra na kania na uro ni wai-ni-sucu kei na oni ko ira kecega era vo tiko e na vanua. 23Ia ena yaco e na siga ko ya, na yasana kecega sa tu kina na vaini e udolu sa daukenai voli e dua na udolu na sikeli siliva, ena yaco ga me veikau vakavotona ka veisoni. 24Era na vakagasau ka vakadakai na tamata era lako voli yani kikea; ni na veikau vakavotona ka veisoni na vanua taucoko. 25Ia na veiulu-ni-koro kecega sa dauwereci e nai sivi, sa tabu mo lako kina e na vuku ni kau vakavotona kei na soni e rerevaki: ena kedra yasana ga na karavau me vakatalai tu kina, kei na kedra na sipi me butubutuka.
Currently Selected:
Ai Vola I Isaia, na Parofita 7: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
