Ai Vola I Isaia, na Parofita 5
5
A loloma ni Kalou ki na nona tamata, kei na nodra tawa loloma vua, 1-7; era sa cudruvi e na vuku ni nodra domonikoco, 8-10; kei na nodra gadreva ca, 11, 12; kei na nodra tawa kila na Kalou, 13-17; e so tale na ka era ca kina, 18-23; kei na nodra biuta na vunau ni Kalou, 24, 25: ai valavala ni nodra cudruvi, 26-30.
1AU na meketaka mada vua na wekaqu na meke nei koya na wekaqu e na vuku ni nona veivaini. E dua na veivaini nei koya na wekaqu, ka no mai na dua na ulu-ni-vanua qele bula: 2a sa viribaita, ka biuta tani na kena vatu, ka tea kina na vaini vinaka sara, a sa tara na vale-cecere e lomana, a sa kelia kina nai keli-ni-waini: a sa qai namaka me vuataka na vuana, a sa vuataka na vua ca. 3Ia koi kemudou na kai Jerusalemi, kei na tamata ni Juta, dou lewai keirau mada kei na noqu veivaini. 4A cava tale me caka ki na noqu veivaini, kaʼu a sega ni cakava kina? ia e na vuku ni cava, niʼu a namaka me vuataka na vua ni vaini, sa vuataka kina na vua ni vaini ca? 5Ia o qo; kaʼu na tukuna mada vei kemudou na ka kaʼu na cakava ki na noqu veivaini: au na kauta tani na kena bai kau, ena qai laukana; au na basuraka sobu na kena bai vatu, ena qai buturaki: 6au na cakava me lekutu: ena sega ni samaki se wereci; ena tubura ga na kau vakavotona kei na soni: ia kaʼu na sautaka na o me kakua ni tau kina na uca, 7Ia na veivaini i Jiova ni lewe vuqa na mataqali i Isireli, kei ira na tamata ni Juta era sa nonai teitei daudomoni: a sa namaka na caka dodonu, ka, raica! na veivakamatei; kei nai valavala dodonu, ka, raica! na qoqolou.
8Era na ca era dauvakautura na vale ki na vale, ka dau vakayacora na were ki na were, me kakua na yasana e vo, ia dou sa qai tiko duadua vakai kemudou ga e na loma ni vanua! 9Sa kaya tiko e na daligaqu ko Jiova ni lewe vuqa, E dina ena lala mai na vale e vuqa, na vale lelevu ka vinaka, me sega na lewena. 10Io, na were ni vaini sa ekera tini ena dua kina na paca waini na vuana, kei na omeri sila e dua ena dua kina na efa na vuana.
11Era na ca era souta na yaqona e na mataka caca; ka ia tiko kei na bogi, me ra mateni e na waini! 12Ia na api, kei na vaioli, na lali, kei na bitunivakatagi, kei na waini, sa ka ni nodra solevu: ia na cakacaka i Jiova era sa sega ni nanuma, kei na ka sa cakava na ligana era sa sega ni vakaraica.
13O koya o qo era sa kauti tani kina na noqu tamata, ni sa sega na nodra vuku: ia na nodra ka rogo, era sa viakana; kei na nodra lewe vuqa, era sa mamaca e na viagunu. 14O koya o qo sa vakalevutaki koya kina ko bulubulu, a sa dalaga vakalevu sara na gusuna: a sa lako sobu kina na kena ka rogo, kei na kena rorogo, kei na kena lewe vuqa, kei koya sa marautaki koya. 15A sa vakamalumalumutaki na tamata wale, ka vakasivoki na tamata turaga, a matadra talega na viavialevu sa biuti sobu: 16ia ko Jiova ni lewe vuqa sa vakalevui e na lewa dodonu, a sa vakarokorokotaki na Kalou yalosavasava e nai valavala dodonu. 17Ena qai kana voli na lami me vaka na kedrai valavala, ia na nodra vanua lala na vutuniyau ena kania ko ira na kai tani.
18Era na ca era yarataka mai na ka tawa dodonu e na dali ni ka lasu, kai valavala ca me vaka e na dali kaukauwa: 19o ira era kaya, Me tei kusarawa ko koya, me vakusakusataka na nona cakacaka me da raica: ia na ka sa bosea ko koya na Yalosavasava nei Isireli, me toro mada mai ka yaco, me da kila! 20Era na ca era vakatoka na ca me vinaka, kei na vinaka me ca; era kaya e rarama na butobuto, ka butobuto na rarama; era kaya sa kamikamica na ka gaga, ka gaga na ka e kamikamica! 21Era na ca era namumi ira me vuku, ka vakasami ira me yaloqase! 22Era na ca era qaqa ni gunu waini, kei ira era tamata kaukauwa ni caka yaqona: 23era vakadonui koya sa cala me nodra kina nai yau, ia na nona ka dodonu na tamata dodonu era sa kauta tani vua!
24Ia me vaka sa katia na vu-ni-sila na yameyame ni buka, a sa yavu saraʼni na co sa caudre, ena vuca sara vakakina na wakadra, ia na sedra ena vuka cake me vaka na kuvu-ni-soso: e na vuku ni ra sa biuta tani na vunau i Jiova ni lewe vuqa, ka beca na vosa i Koya na Yalosavasava nei Isireli. 25O koya o qo sa waqa kina na cudru i Jiova vei ira na nona tamata, a sa dodoka yani na ligana vei ira, ka yaviti ira: a sa sautaninini na ulu-ni-vanua, ia na yagodra sa mate sa vaka nai soqosoqo e loma ni saqata ni koro. E na ka kece o qo sa sega ga ni lesu tani kina na nona cudru, ka sa laveti tu ga na ligana.
26Ia ena vakaduria ko koya na rogele vei ira na veimatanitu vakayawa, ka kaluvi ira mai nai yalayala kei vuravura: ka, raica, ena vakusakusa ka vakatotolo na nodra lako mai: 27sa sega vei ira sa malumalumu se tidara; sa sega ena sosovu se moce; ia nai vau ni tolodra ena sega ni tasere, kei na wa ni nodrai vava ena sega ni sereki: 28sa vagatai na nodra gasau, a sa lokati tu na nodra dakai kecega, a ququ ni nodra ose sa nanumi ni sa vaka na qiwa, kei na nodra vale-vodoki ni sa vaka na covulaca: 29era na tagi me vaka na laioni, era na tagi me vaka na laioni cauravou: io era na kudru, ka cova na kedra, ka kauta, ka sega e Vakabula. 30A ra na kudruti ira e na siga ko yame vaka na kudrukudru ni Wasawasa: ia ni sa rai ki vanua, raica, sa butobuto sa ka rarawa! a sa tabonaki na rarama e na kena o.
Currently Selected:
Ai Vola I Isaia, na Parofita 5: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
