Ai Vola I Isaia, na Parofita 38
38
Sa tauvi mate ko Isikiya, a sa vakabulai ni sa masu, 1-8. A nana meke ni vakavinavinaka ni sa bula, 9-22.
1E NA veisiga ko ya sa tauvi mate ko Isikiya me laʼki ciba kina. A sa lako mai vua ko Isaia na parofita na luve i Amosi, a sa kaya vua, Sa vosa vakaoqo ko Jiova, Mo vakaroti ira na nomu lewe-ni-vale; ni ko na mate, ka sega ni bula. 2Sa qai goleva na lalaga ko Isikiya, ka masu vei Jiova, 3a sa kaya, Au masuti iko, Jiova, mo nanuma mada na noqu lako voli e matamu e na yalodina kei na yalo e dua bau, kei na noqu caka vinaka e matamu. A sa tagi vakalevu ko Isikiya. 4A sa yaco mai na vosa i Jiova vei Isaia, ka kaya, 5Mo laʼki kaya vei Isikiya, Sa vosa vakaoqo ko Jiova na Kalou i Tevita na nomu qase, Au sa rogoca na nomu masu, au sa raica na wai ni matamu: raica, kaʼu na kuria na nomu siga e na yabaki e tinikalima: 6ia kaʼu na vakabulai iko kei na koro o qo mai na ligana na tui Asiria; ia kaʼu na vakaruruga na koro o qo. 7Ia o qo na kenai vakadinadina vei iko maivei Jiova, ni na cakava ko Jiova na ka o qo sa cavuta ko koya: 8raica, kaʼu na vakasuka tale kimuri na yaloyalo, e sa lako sobu e nai vakatakilakila ni mata-ni-siga nei Aasi, me tini na tikina. A sa suka tale kimuri na mata-ni-siga me tini na tikina, a tikina o qori ka sa lako sobu kina.
9AI vola i Isikiya na tui Juta, ni sa tauvi mate, ka sa bula tale mai na nona mate.
10Au a kaya, Ni sa siga levu tu na noqu siga kaʼu na curuma na mata ni katuba kei etesi; sa yali vei au na noqu yabaki sa vo. 11Au a kaya, Au na sega tale ni raici Jiova, io ko Jiova, e na nodra vanua na bula; au na sega ni kunea tale na tamata, kei ira na kai vuravura. 12Sa cavuti tani na noqu vale, ka kauti tani vei au me vaka na nona vale malo nai vakatawa; au sa drutia laivi na noqu bula me vaka na wa i koya na dautali sulu: sa druti au tani mai nai musumusu ni rua; o na kitaki au me oti e na mataka ka bogi. 13Au a vakasama koto ga ka mataka mai, ni sa vaka na laioni, ena musuka kece na suiqu: o na kitaki au me oti e na mataka ka bogi mai. 14Au a tagi me vaka na lakaba se na belo; au a tagi rarawa me vaka na ruve; sa oca na mataqu niʼu sa rai koto kicake: i Jiova, kaʼu sa bitaki sara; mo vukei au mai.
15A cava meʼu kaya? sa vosa mai vei au ko koya, a sa vakayacora talega ko koya: au na tiko malua lako e na noqu bula kecega, e na vuku ni rarawa ni yaloqu. 16I Jiova, e na ka vakaoqo era bula kina na tamata; ia e na vuku ni ka kecega o qo sa bula na yaloqu: ni ko na vakabulai au, meʼu sa bula kina. 17Raica, sa vuki na noqu rarawa me vakacegu: ia ko a lomana na yaloqu ka Vakabula mai nai keli ni rusa; ni ko sa biuta ki dakumu na noqui valavala ca kecega. 18Ni na sega ni vakavinavinaka vei iko nai bulubulu, se vakacaucautaki iko na mate, o ira sa lako sobu ki nai keli era na tawa namaka na nomu vosa dina. 19O koya sa bula, o koya sa bula, ena vakavinavinaka vei iko ko koya, me vakataki au e na siga o qo: ena tukuna na qase na nomu vosa dina vei ira na gone. 20Sa mai vakabulai au ko Jiova: ia na noqu meke eda na ia vata kei nai qiriqiri e na vale i Jiova e na veisiga ni noda bula.
21A sa kaya oti ko Isaia, Me ra kauta e dua nai buli lolo, ka botani kina na kasi, ena qai bula kina ko koya. 22A sa kaya talega ko Isikiya, A cava na kenai vakadinadina niʼu na lako cake ki na vale i Jiova?
Currently Selected:
Ai Vola I Isaia, na Parofita 38: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
