Ai Vola I Isaia, na Parofita 37
37
Sa vakamalumalumutaki koya vei Jiova ko Isikiya, a sa talaki vei Isaia, a sa vakacegui kina, 1-7. Sa suka tani e Jerusalemi nai valu ni meca, a sa qai vola mai ko Sanikeripi vei Isikiya, a sa vosavakacacataki Jiova, 8-13. A masu i Isikiya, kei na vosa i Jiova vua, 14-35. Sa yaviti ira na kai Asiria e dua na agilose, 36. Sa mokuti mai Ninive ko Sanikeripi, 37, 38.
1A SA yaco, ni sa rogoca ko Isikiya na tui, sa dresulaka na nonai sulu, ka ubi koya e nai sulu ca, ka laʼki curu ki na vale i Jiova.
2A sa talai Eliyakimi, o koya sa lewa na vale levu, kei Sepina na vu-ni-vola, kei iratou e qase vei ira na bete, ka ratou sa vakaisulu e nai sulu ca, kivei Isaia na parofita na luve i Amosi. 3A ratou sa kaya vua, Sa vosa vakaoqo ko Isikiya, Sa siga ni veivakararawataki o qo, kei na veivunauci, kei na vosaveivakacacataki; ni sa voleka ni sucu na gone, ka sega na kaukauwa me ra vakasucumi kina: 4ena rogoca beka ko Jiova na nomu Kalou na vosa kecega i Rapisake, o koya sa tala mai ko tui Asiria na nona turaga me vosavakacacataka na Kalou bula; ia ena vunauca na vosa sa rogoca ko Jiova na nomu Kalou: o koya mo qai cavuta na masu e na vukudra na lewe lailai era vo tiko.
5A sa lako vei Isaia ko iratou nai talatala i Isikiya na tui. 6A sa kaya vei iratou ko Isaia, Dou vosa vakaoqo vua na nomudou turaga. Sa vaka ko Jiova, Mo kakua ni rere e na vosa ko sa rogoca, a ya sa ratou vosavakacacataki au kina ko iratou na nona tamata na tui Asiria. 7Raica, kaʼu na liwaki koya e na cagi, ia ena rogoca ko koya e dua nai rogo, ka lesu yani ki na nona vanua; ia kaʼu na tavakabalei koya e nai seleiwau e na nona vanua.
8A sa lesu yani ko Rapisake, a sa kunei tui Asiria ni sa vala kei Lipina; ni sa rogoca eliu ko koya ni sa lako tani mai Lakisi. 9A sa rogoca ko koya na tui ni sa kainaki e na vuku i Tiraka, na tui Kusi, ka vaka, Sa mai veivala kei iko ko koya: ia ni sa rogoca na ka o qo, sa baki tala tale e so nai talatala vei Isikiya, ka kaya, 10Dou vosa vakaoqo vei Isikiya na tui Juta, ka kaya, Me kakua ni vakaisini iko na nomu Kalou, o koya ko sa vakararavi kina, ni sa kaya, Ena sega ni soli ko Jerusalemi ki na liga i tui Asiria. 11Raica, ko sa rogoca oti na ka era sa cakava na tui Asiria ki na veivanua kecega, ni sa vakarusa sara; ia ko na vakabulai beka ko iko? 12Era sa Vakabula li ko ira na nodra kalou na veivanua ka vakarusa ko iratou na noqu qase, io ko Kosani, kei Arani, kei Resefi, kei ira na luve i Iteni era tiko mai Tilasari? 13sa evei ko tui Emaci, kei tui Aripati, kei na tui ni koro ko Sifariveimi kei Ena, kei Iva?
14A sa taura nai vola ko Isikiya mai na ligadratou nai talatala, ka wilika: a sa lako cake ko Isikiya ki na vale i Jiova, a sa tevuka e na mata i Jiova. 15A sa masu ko Isikiya e na mata i Jiova, a sa kaya, 16I Jiova ni lewe vuqa, na neimami Kalou na Isireli, o iko sa tiko e na tadrua ni Jerupi, sai iko na Kalou, o iko duaduaga, ni veimatanitu kecega kei vuravura: o iko sa cakavi lomalagi kei vuravura: 17i Jiova, mo vakalakala daligamu, ka vakarorogo: i Jiova, mo vakayadrata na matamu, ka raica; ka rogoca na vosa i Sanikeripi, o koya sa talai koya me vosavakacacataka na Kalou bula. 18E dina, Jiova, o iratou na tui Asiria, eratou sa vakarusa na lewe ni veivanua kei na nodra vanua, 19a ratou sa biuta ki na buka waqa na nodra kalou: ni ra sa sega ni kalou, a sa cakacaka walega ni liga ni tamata, na kau kei na vatu: ia eratou sa vakarusai ira kina. 20Ia o qo, Jiova na neimami Kalou, mo vakabulai keimami mada mai na ligana, me kila kina na veimatanitu kecega e vuravura ni sai iko duaduaga ko Jiova.
21A sa talaki vei Isikiya ko Isaia na luve i Amosi, ka kaya: Sa vosa vakaoqo ko Jiova na noda Kalou na Isireli, Na ka ko sa masu kina vei au e na vuku i Sanikeripi na tui Asiria: 22o qo na vosa sa vosataka ko Jiova e na vukuna:
Na gonealewa, na luve i Saioni, sa beci iko, ka dredrevaki iko ko koya; sa kurea vei iko na uluna na gonealewa ni Jerusalemi! 23Ko sa vosavakacacataki cei, ka vakalialia? ia vei cei beka ko sa tabalaka na domomu, ka ta cake na matamu? vei Koya ga na Yalosavasava nei Isireli. 24O sa vosavakacacataki koya na Turaga e na gusudra na nomui talatala, ni ko sa kaya, Oi au kei na noqu vale-vodoki e vuqa, keimami sa cabecabe ki na kena cecere ni veiulu-ni-vanua, ki na yasa i Lipanoni, ia kaʼu na taya sobu na kena veisitari babalavu, kei na kena veipaini vinavinaka: kaʼu na yacova na kenai yalayala e cecere sara, kei na kena veikau bulabula: 25kaʼu sa kelia ka gunuva na wai; ka vakadiva e na qeteqete ni yavaqu na uciwai kecega ni Ijipita. 26O sa sega beka ni rogoca makawa, niʼu sa cakava; ka mailiu sara, niʼu a lesia? ia o qo kaʼu sa qai vakayacora, ena yaco kina mo cakava me bukebuke walega na Veikoro kaukauwa. 27O koya sa ra malumalumu kina na lewena, era sa waicala ka taqaya: era sa vaka na co ni vanua, kei na co karakarawa sa qai rovu, na co mai na dela ni vale, kei na sila sa malai ni sa sega ni tubu. 28Ia kaʼu sa kila na nomu tiko, kei na nomu curu kituba, kei na nomu curu kiloma, kei na nomu cudru levu vei au. 29E na vuku ni sa lako cake mai ki daligaqu na nomu cudru vei au, kei na nomu viavialevu, kaʼu na qai qilaita kina na ucumu e na noqui qila, ka vakaciqara na noqui tarovi ki na tebenigusumu, ia kaʼu na saumaki iko yani e na sala ko a lako mai kina.
30Ia o qo na kenai vakadinadina vei iko, Dou na kania e na yabaki o qo na ka sa tubu walega; e na kenai karua ni yabaki na ka sa tubu walega maikina: ia e na kenai katolu ni yabaki dou kaburaka, ka tamusuka, ka tea na veivaini, ka kania na vuana. 31Ia ko ira na bula sa vo e na mataqali i Juta era na ti sobu tale, ka vua kicake. 32Ni na lako tani mai Jerusalemi na kena vo, kei ira era dro bula mai na ulu-ni-vanua ko Saioni; ena kitaka na ka o qo na yalogumatua i Jiova ni lewe vuqa.
33O koya sa kaya vakaoqo kina ko Jiova e na vuku i tui Asiria, Ena sega ni curu mai ki na koro o qo, se vanataka kina e dua na gasau, se mai tu kina vakaisasa-bai, se viri suva kina: 34e na sala sa lako mai kina, o qori ena lesu tale kina, ka sega ni curu ki na koro o qo, sa kaya ko Jiova; 35ia kaʼu na vakaruruga na koro o qo meʼu Vakabula e na vukuqu, kei na vuku i Tevita na noqui talatala.
36A sa lako yani na agilose i Jiova, ka yavita e na nodrai tikotiko ni valu na kai Asiria e oba vakatinikawalu ka lima na udolu: ia ni ra sa sou e na sabogibogi, raica, era sa mate sara koto kecega. 37A sa lesu tani ko Sanikeripi na tui Asiria, ka laʼki lesu, ka tiko mai Ninive. 38Ia ni sa soro tiko e na bure i Nisiroki na nona kalou, erau sa mokuti koya e nai seleiwau koi rau na luvena ko Etirameleki kei Sareseri: a rau sa dro bula ki na vanua ko Arimenia. A sa tui ko Esariatoni na luvena, me kenai sosomi.
Currently Selected:
Ai Vola I Isaia, na Parofita 37: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
