Ai Vola I Isaia, na Parofita 36
36
Sa mai kabai Jerusalemi ko Sanikeripi, 1-3. O Rapisake, ni sa talai koya mai ko Sanikeripi, sa vakamasuti ira na kai Jerusalemi e na vosaveicavilaki, me vuki, 4-21. A sa tukuni na nona vosa vei Isikiya, 22.
1IA e na kenai katinikava ni yabaki i Isikiya na tui, sa qai lako cake ko Sanikeripi na tui Asiria ki na veikoro kaukauwa kecega nei Juta, a sa rawa. 2Ia ko tui Asiria sa talai Rapisake kei nai valu levu mai Lakisi ki Jerusalemi kivei Isikiya na tui: a sa laʼki tu voleka ki nai salisali ni drano ecake ki na salatu e nodra vanua na dausavai sulu. 3A ratou sa lako yani vua ko Eliyakimi na luve i Ilikiya, o koya sa lewa na vale levu, kei Sepina na vu-ni-vola, kei Yoa na luve i Asafi, o koya sa dauvola na ka ni matanitu.
4A sa kaya vei iratou ko Rapisake, Dou kaya mada vei Isikiya, Sa vosa vakaoqo na tui levu, na tui Asiria, A vakararavi cava o qo ko sa vakararavi kina? 5Au sa kaya, sa vosa walega ni gusu na nomu vuku kei na nomu kaukauwa me ia nai valu: ia ko sa vakararavi vei cei, mo sa talaidredre kina vei au? 6Raica, ko sa vakararavi ki nai titoko gasau o qo e bibivoro, io ki Ijipita, a ya kevaka sa ravita e dua, ena lauta na ligana, ka suaka: sa vakakina ko Fero na tui Ijipita kivei ira kecega era vakararavi vua. 7Ia kevaka ko sa kaya vei au, Keimami sa vakararavi vei Jiova na neimami Kalou: sai koya beka, se segai, na nona veitikina cecere kei na nonai cabocabo-ni-soro ka sa biuta tani ko Isikiya, ka kaya vei ira na Juta kei ira ni Jerusalemi, Dou soro ga e na mata ni cabocabo-ni-soro o qo? 8Ia o qo, mo solia mada vua na noqu turaga na tui Asiria nai vakadinadina, kaʼu na qai solia vei iko e rua na udolu na ose, kevaka ko sa rawata ko iko me vakavodoka kina na tamata dauvodo e na ose. 9O na qai saumaka tani vakaevei na matana e dua na turaga lailai ni valu vei ira na tamata ni noqu turaga? ka sa qai laʼki vakararavi ki Ijipita me so kina na nomu vale-vodoki kei na nomu tamata e dauvodo e na ose? 10Ia kaʼu sa qai lako cake beka mai vakai au ga, ka sega ni keirau kei Jiova, me vakarusa na koro o qo? Sa kaya ga vei au ko Jiova, Mo lako cake ki na vanua o qori, ka vakarusa.
11Eratou sa qai kaya vei Rapisake ko Eliyakimi na luve i Ilikiya, kei Sepina, kei Yoa, Mo vosa mada vei keitou na nomu tamata e na vosa vaka-Siria, ni keitou sa kila o qori: ia mo kakua ni veivosaki kei keitou e na vosa vaka-Jutia e na daligadra na tamata era toka e na dela ni bai: 12A sa kaya ko Rapisake, Sai kemudrau beka ga kei na nomu turaga, sa talai au kina na noqu turaga, meʼu tukuna na ka o qo? ka sega li vei ira talega na tamata era sa toka e na dela ni bai, me ra kania na dedra ka gunuva na nodra mi, koi kemudou vata ga?
13A sa tu ko Rapisake, ka kaci vakadomoilevu e na vosa vaka-Jutia, ka vosa, ka kaya, Dou rogoca na nona vosa na tui levu, na tui Asiria. 14Sa vosa vakaoqo na tui, Me kakua ni vakaisini kemudou ko Isikiya, ni na sega ni vakabulai kemudou rawa: 15ia me kakua ni qisi kemudou ko Isikiya me vakararavi vei Jiova, ni sa kaya, Ena vakabulai keda vakaidina ko Jiova: ena tawa soli na koro o qo ki na ligana na tui Asiria. 16Dou kakua ni vakarorogo vei Isikiya: ni sa vaka ko tui Asiria, Dou soro mada mai vei au, ka lako mai kitautuba vei au, ka kania tiko na tamata yadua na vua ni nona vaini, kei na vua ni nona lolo, ka gunuva na tamata yadua na wai ni nona mata-ni-wai; 17ka meʼu qai lako malua mai, ka kauti kemudou yani ki na vanua sa vaka na nomudou vanua, a vanua ni sila kei na waini, a vanua ni madrai kei na veivainivaini. 18Me kakua ni vakaisini kemudou ko Isikiya, ka kaya, Ena vakabulai keda ko Jiova. O ira na kalou ni veivanua, era sa dui Vakabula li na nona vanua mai na ligana na tui Asiria? 19Sa evei na kalou ni Emaci kei Aripati? sa evei na kalou ni Sifariveimi? era sa vakabulai Samaria li mai na ligaqu? 20O cei vei ira kece qa kalou ni veivanua o qori, era sa Vakabula na nodra vanua mai na ligaqu, me sa vakabulai Jerusalemi kina ko Jiova mai na ligaqu? 21A sa tiko lo ga, ka sega ni cavuta vua e dua na vosa: ni sa vakaoqo nai vakaro ni tui, Dou kakua ni vosa vua.
22Ia ko Eliyakimi, na luve i Ilikiya, o koya sa lewa na vale levu, kei Sepina na vu-ni-vola, kei Yoa na luve i Asafi, o koya sa dauvola na ka ni matanitu, eratou sa qai lako mai vei Isikiya, ka sa dresulaki na nodratoui sulu, a ratou sa tukuna vua na vosa i Rapisake.
Currently Selected:
Ai Vola I Isaia, na Parofita 36: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
