Ai Vola I Isaia, na Parofita 16
16
Ai vakaro vei ira na luve i Moapi me vakamalumalumutaki ira vua na tui Juta, 1-5. Era sa viavialevu ga, 6; a sa lewa na Kalou me ra cudruvi ga, 7-14.
1DOU vakauta na lami vua na tui ni vanua, ia mai Sela e lekutu ki na ulu-ni-vanua ni gonealewa ni Saioni. 2Me vaka na manumanu sese sa vakasevi mai na kena sova, era na vakakina na gonealewa ni Moapi mai na wai matia ni Erimoni.
3Dou ia na bose, lewa vakadodonu; cakava na nomudoui vakaruru e na siga levu me tautauvata kei na bogi; vunitaki ira sa se mai; kakua ni tukuni ira na tiko sese. 4Me tiko kei iko, Moapi, ko ira na noqu era sa se mai, mo nodrai vakaruru mai na matana na dauvakacaca; ni sa takali na daukovekove, sa mudu na dauvakacaca, sa vakarusai tani e vanua ko ira ka daubuturaka. 5Ena qai vakataudeitaki e na loloma nai tikotiko ni tui: ena tiko dei kina ko koya e na vale i Tevita, me ia na lewa, ka qarava na lewa dodonu, ka vakusarawataka na caka dodonu.
6Eda sa rogoca na viavialevu i Moapi; o koya sa viavialevu sara: io na nona yalolevu, kei na nona viaqaqa, kei na nona daucudru: a nona lasulasu ena tawa yaco.
7O koya o qo ena tagicaki Moapi kina ko Moapi, era na tagi kecega: dou na tagi e na vuku ni sa rusa ko Kiri-ereseci; ni sa yaviti sara: 8ni sa qai malai na veiwere ni Esiponi, kei na vaini ni Sipima: o ira na turaga ni veimatanitu era sa basuka sobu na tabana talei, e sa laʼki cavaraki ki Yaseri, ka lako sese ki lekutu; a tabana sa tete yani, ka laʼki kosova na Wasawasa. 9O koya o qo kaʼu na tagi kina e na vuku ni vaini ni Sipima, me vaka niʼu sa tagi e na vuku i Yaseri: au na vakasuasuataki kemudrau, Esiponi, kei Elale, e na wai ni mataqu: ni sa lutuka na nomu vuata kei na nomu yabaki na kaila ni valu. 10A sa kauti tani mai na veiwere vakalewe na rereki kei na marau; ena sega na meke se na kaila e na veivainivaini; ia na waini e nai keli-ni-waini ena sega ni sikaraki; kaʼu sa muduka laivi na kena kailavaki. 11O koya o qo ena rorogo kina na ketequ me vaka na api e na vuku i Moapi, kei na lomaqu e na vuku i Kiri-ereseci. 12Ia ena yaco, ni sa rairai mai ko Moapi, io, ni sa qai oca e na yasana cecere, ena qai curuma na nona bure-kalou me soro; ena sega ga ni rawa.
13O qo na vosa sa cavuta eliu ko Jiova e na vuku i Moapi. 14Ia ka sa qai vosa ko Jiova, ka kaya,
E na yabaki e tolu, me vaka na yabaki ni tamata voli, ena qai beci nai ukuuku i Moapi, kei ira kecega na lewe vuqa ko ya; ia na kedra vo era na lewe lailai sara ka malumalumu ga.
Currently Selected:
Ai Vola I Isaia, na Parofita 16: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
