Ai Vola I Isaia, na Parofita 11
11
Sa tukuna na Mesaia, o koya sa vakatokai na Coke sa tubu mai na dulumi i Isei, 1-5. Ena tubu na sautu e vuravura e na nona lewa, 6-9. Ena lesu tale mai rua ko ira na Isireli, era na kacivi na lewe ni veiveivanua, me ra lewe ni nona matanitu, 10-16.
1IA ena tubu mai e dua na Coke mai na dulumi i Isei, e dua na Tabana ena tubu cake mai na wakana. 2Ia ena tiko ga vei koya na Yalo i Jiova, na Yalo ni vuku kei na lewa dina, na Yalo ni vakavuvuli kei na kaukauwa, na Yalo ni daukila ka kei na rerevaki Jiova: 3ena kila deivaka sara ko koya na rerevaki Jiova: ena sega ni lewa ko koya me vaka na ka sa rairai ki matana, se vosa me vaka na ka sa rogo e daligana: 4ena lewai ira vakadodonu ga na dravudravua, ka veilewai vakadodonu e na vukudra na yalomalumalumu e vuravura: ena yaviti vuravura e nai titoko ni gusuna, ia e na cegu ni tebenigusuna ena vakamatei ira nai valavala ca. 5Enai vau ni tolona na yalododonu, kei nai vau ni nonai ivi na yalodina.
6Ia ena tiko vata na wolifa kei na lami, ka koto vata na leparite kei na luve ni koti; ena tiko vata talega na luvedratou na karavau kei na laioni kei na manumanu uro; ia na gone lailai ena tuberi iratou. 7Ena kana vata na karavau alewa kei na pera; ena koto sobu vata na luvedratou: ia na laioni ena kania na co ni sila me vaka na karavau. 8Ena qito mai na qara ni gata na gone dramidrami, ia ki na qara ni gata daukata ena virikotora na ligana na gone sa qai kali. 9Era na sega ni ia na veivakacacani se na veivakamatei e na noqu ulu-ni-vanua tabu kecega: ni na sinai ko vuravura e na veikilai kei Jiova, me vaka ni sa ubia na wasa titobu na wai. 10Ia e na siga ko ya ena dua na coke kei Isei, a ya ena tu cake me nodra rogele na veimataqali; era na vakasaqarai koya ko ira na veimatanitu: ia na nonai tikotiko ena vakaiukuuku. 11Ia ena yaco e na siga ko ya, ena baki dodoka tale vakarua na ligana na Turaga, me vakabulai ira na kena vo ni nona tamata, era sa vo tiko, mai Asiria, kei Ijipita, kei Pacirosi, kei Kusa, kei Elama, kei Sainari, kei Emaci, kei na veiyanuyanu mai na wasawasa. 12Ia ena vakaduria ko koya e dua na rogele vei ira na veimatanitu, ka vakasoqoni ira vata na Isireli era sa biu laivi, kei ira na Juta era dui veiseyaki ena kumuna vata ko koya mai na veiyalayala vava kei vuravura. 13Ena takali talega na vuvu i Ifireimi, a ra na muduki tani na meca i Juta: ena sega ni vuvutaki Juta ko Ifireimi, ena sega talega ni vakararawataki Ifireimi ko Juta. 14A rau na vukaca ga na nodrai yalayala na kai Filisitia ki ra; erau na lomavata me vakacataki ira na kai natuicake: erau na laveta na ligadrau vei Itomi kei Moapi; a ra na talairawarawa vei rau ko ira na luve i Amoni. 15Ena vakarusa sara ko Jiova na toba ni wasawasa ni Ijipita; ena laveta na ligana ki na uciwai e na nona cagi levu, ka yavita me soniwai e vitu, ka kauti ira tawa suasua yani na tamata. 16Ia ena dua na nodra salatu na kedra vo ni nona tamata, era sa vo tiko, mai Asiria; me vaka sa dua na nodra na Isireli e na siga era a lako cake mai kina mai na vanua ko Ijipita.
Currently Selected:
Ai Vola I Isaia, na Parofita 11: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
