Ai Vola I Isaia, na Parofita 1
1
A WASE I. —O Isaia na parofita, 1, sa vunauci ira na Juta e na nodra talaidredre, 2, 3; ka tagicaka na nodra daucudruvi, 4-9; a sa vakarota vei ira me veivutuni, 10-17, me bokoci kina na nodrai valavala ca, 18-20, me ra sautu; ni na cudruvi ga ko ira sa tawa veivutuni, 21-31.
1A RAIVOTU i Isaia na luve i Amosi, a ya ka raica e na vuku ni Juta kei Jerusalemi e na nodratou gauna ko Usiya, kei Yocami, kei Aasi, kei Isikiya, na tui Juta.
2DOU rogoca, na lomalagi, ka vakatu daliga, na vuravura, ni sa kaya mai ko Jiova, Kaʼu a susuga ka vakalevulevui ira na luvequ, io ko ira, era sa vuki tani vei au. 3Sa kila na kenai taukei na karavau, kei na asa na bai ni nona turaga: ia ko ira na Isireli, era sa sega ni kilai au; o ira na noqu tamata, era sa sega ni nanumi au.
4Ule na matanitu dauca, na mataqali sa bitaki e na caka cala, na kawai valavala ca, na gone dauvakacaca: era sa biuti Jiova, era sa vakacudrui Koya na Yalosavasava nei Isireli, era sa vuki tani tale. 5Me kemudou yaviti tale e na tikina cava, mo dou sa kuria kina na dauvuki? sa mate taucoko na ulumu, a sa malumalumu taucoko na lomamu: 6mai na qeteqete ni yavamu ka cavaraki ki na ulumu sa sega kina na tikimu e bula; sa vue ga, a sa dabuiloa, a sa qai mavoa tale: sa sega ni bobo, se viviraki, se lumuti e nai lumu. 7A nomudou vanua, sa lala; a nomudou veikoro, sa kama e na buka: a nomudou veiwere, o ira na kai tani era sa kania e na matamudou, a sa lala didi me vaka ni sa dauvukica ko ira na kai tani. 8A sa biu tu na gonealewa ni Saioni me vaka na vale bola e na veivainivaini, me vaka nai cili e na loga ni meloni, me vaka na koro sa kabai. 9Kevaka sa sega ni vakavoca ko Jiova ni lewe vuqa na keda vo lailai sara, eda sa qai vakai Sotoma, eda sa qai vakataki Komora.
10Dou rogoca na vosa i Jiova, oi kemudou na daulewai Sotoma; dou vakani daliga ki na vunau ni noda Kalou, oi kemudou na kai Komora. 11A cava na kena yaga vei au na nomudoui soro e vuqa? sa kaya ko Jiova: au sa mamau e na sipi tagane ei soro kama, kei na uro ni manumanu uro: ia na dra ni karavau, kei na lami, kei na koti tagane, kaʼu sa sega ni vinakata. 12Ni dou sa mai rairai e mataqu, o cei sa taroga vei kemudou, me butubutuka na noqu lomanibai? 13Dou kakua ni kauta tale mai nai cabocabo wale: nai madrali boi vinaka na ka vakasisila vei au; na vula vou talega kei na siga tabu, na kaci me soqoni levu mai: kaʼu sa sega ni vosota rawa nai valavala ca kei na solevu tabu. 14Ia na nomudou vula vou kei na nomudou solevu tabu sa cata na yaloqu: au sa bitaki kina; au sa oca ni colata. 15Ia ni dou sa dodoka mai na ligamudou, kaʼu na tabonaka na mataqu maivei kemudou: io, ni dou sa vakalevutaka na masumasu, kaʼu na sega ni rogoca: a ligamudou sa sinai e na dra. 16Dou vui kemudou, vakasavasavataki kemudou; kauta tani e mataqu na nomudoui valavala ca; dou cegu ni caka ca; 17vulica na caka vinaka; qara na lewa dodonu, vukei koya sa vakasaurarataki, dou ia na veilewai e na vukuna na luveniyali, kei na dautataro e na vukuna na alewa dawai.
18Dou mada mai, me tou veivosaki vata, sa kaya ko Jiova; ke sa vaka sa damudamu na nomudoui valavala ca, ke na vulavula me vaka na uca-vulavula; ke sa kulakula me dravaka, ke na vaka na vutika ni sipi. 19Kevaka dou vakadinata ka vakarorogo, dou na kania na veta ni ka ni vanua: 20ia kevaka dou sa beca ka talaidredre, ena kani kemudou nai seleiwau: ni sa tukuna na gusu i Jiova.
21Na kena vuki me dauyatagane na koro ka daudina! a sinai tu eliu e na lewa dodonu; a ka dodonu ga ka dautiko kina; ia edaidai na daulaba ga. 22A nomu siliva sa vuki me de ni kaukamea, na memu waini sa waicala: 23a nomu turaga era sa dautalaidredre, a ra sa nodrai tokani na daubutako: era dui dauvinakata nai solisoli, ka dangu me vakaivoli: vua na luveniyali era sa sega ni ia na veilewai dodonu, kei na ka ni alewa dawai me lewai kina sa sega ni yaco kivei ira.
24O koya sa kaya kina na Turaga, ko Jiova ni lewe vuqa, o Koya na Kaukauwa nei Isireli, Io, kaʼu na vakacegui au maivei ira na noqu meca, ka saumi au vei ira era cati au: 25ia kaʼu na tarai iko, ka sava tani laivi na nomu de ni kaukamea, ka kauta tani kecega na nomu ca: 26kaʼu na vakatikori ira tale na nomu dauveilewai me vaka eliu, kei ira na nomu daubose me vaka e nai vakatekivu: ka oti, ko na qai vakatokai, Na koro daucaka dodonu, na koro daudina. 27Ena; vakabulai ko ira na Saioni e na lewa dodonu; kei ira na lesu tale mai, e nai valavala dodonu. 28Ia na nodra rusa na dautalaidredre kei ira nai valavala ca ena yaco vata ga, ia ko ira era sa biuti Jiova era na kawayali. 29Ni ra na maduataka na oki dou sa daudomona, dou na taqaya talega e na vuku ni veiwere dou sa digitaka. 30Ni dou na vaka na oki sa malai na drauna, kei na were sa sega kina na wai. 31Ia ko koya sa kaukauwa ena vaka na wa ni cina, kei na nona cakacaka me vaka na lidi ni buka, a rau na kama vata ruarua, ka sega e dua me bokoca.
Currently Selected:
Ai Vola I Isaia, na Parofita 1: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
