Ai Vola I Akei Na Parofita 2
2
Sa vagumatuataki ira e na vosa ni yalayala e levu ka talei, me tara na vale tabu, 1-9. Sa tukuna na ka ca ena yacovi ira kevaka era gucataka, 10-19. Sa ia na vosa veivakacegui vei Sirupapeli, 20-23.
1E NAI kavitu ni vula, e nai karuasagavulu ka dua ni siga ni vula, sa yaco na vosa i Jiova vei Akei na parofita me tukuna, ka vaka, 2Mo vosa mada vei Sirupapeli na luve i Sialitieli, na turaga ni Juta, kei Josua na luve i Yiosataki, na bete levu, kei ira na vo ni tamata, ka kaya,
3O cei vei kemudou sa vo tiko dou a raica na vale o qo e na kenai ukuuku eliu? a sa vaka beka evei na ka dou sa qai raica edaidai? ni sa vakatauvatani kaya, sa sega li ni vaka na ka wale e na matamudou? 4Ia mo kaukauwa mada ga, Sirupapeli, sa kaya ko Jiova; mo kaukauwa talega, Josua na luve i Yiosataki, na bete levu; dou kaukauwa kece talega, na lewe ni vanua, sa kaya ko Jiova, ia dou ia na cakacaka, niʼu sa tiko kei kemudou, sa kaya ko Jiova ni lewe vuqa. 5Na vosa kaʼu a veiyalayalatitaka vei kemudou, ni dou a lako mai Ijipita, kei na Yaloqu, sa tiko ga kei kemudou: dou kakua ni rere.
6Ni sa vosa vakaoqo ko Jiova ni lewe vuqa; Sa vakadua tale, sa vo e lailai, kaʼu na qai vakayavalataki lomalagi, kei vuravura, kei na waitui, kei na vanua mamaca; 7ia kaʼu na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia kaʼu na vakasinaita na vale o qo e nai ukuuku, sa kaya ko Jiova ni lewe vuqa. 8Sa noqu na siliva, a sa noqu na koula, sa kaya ko Jiova ni lewe vuqa. 9Ena levu nai ukuuku ni vale o qo kimuri ka lailai nai ukuuku ni vale eliu, sa kaya ko Jiova ni lewe vuqa: ia e na yasana o qo kaʼu na ia na veivinakati, sa kaya ko Jiova ni lewe vuqa.
10E NAI karuasagavulu ka va ni siga e nai kaciwa ni vula, e nai karua ni yabaki i Tario, sa yaco na vosa i Jiova vei Akei na parofita me tukuna, ka vaka, 11Sa vosa vakaoqo ko Jiova ni lewe vuqa; Mo tarogi ira mada na bete e na vuku ni vunau, ka kaya, 12Ke dua na tamata sa kauta lako na lewe ni manumanu ei soro tabu e na tutu ni nonai sulu, a sa tara e na tutu ni sulu na madrai, se na su, se na waini, se na waiwai, se dua na kakana, ke na tabu li kina na ka o qori? A ra sa vosa na bete ka kaya, E segai. 13Sa qai kaya ko Akei, Ke dua sa tawa savasava o na vuku ni yago ni mate, me na tara e dua na ka o qori, ke na tawa savasava li na ka ko ya? A ra sa vosa na bete, ka kaya, Ena tawa savasava ga. 14Sa baki vosa tale ko Akei, ka kaya,
Sa vakakina ko ira na tamata o qo, a sa vakakina na matanitu o qo e mataqu, sa kaya ko Jiova; sa vaka kece talega kina na cakacaka ni ligadra; ia na ka sa ra vakacabora maikea sa tawa savasava ga. 15Ia o qo, dou vakasara mada na lomamudou ki na siga o qo ka ia yani kiliu, ni sa sega na veivatu e veitaqataqai e na vale tabu i Jiova: 16mai na veibogi ko ya, ni sa lako mai e dua ki nai binibini vau sila e ruasagavulu, sa rui tini ga: ni sa lako mai ki nai keli-waini me takiva e limasagavulu mai nai keli, sa rui ruasagavulu ga. 17Au a yaviti kemudou e na cagi todra, kei na bokata, kei na uca-cevata, e na cakacaka kece ni ligamudou; ia dou a sega ga ni lesu vei au, sa kaya ko Jiova.
18Dou vakasara mada na lomamudou ki na siga o qo ka ia yani kiliu, ki nai karuasagavulu ka va ni siga e nai kaciwa ni vula; io ki na siga sa tauyavutaki kina na vale tabu i Jiova, dou vakasara kina na lomamudou. 19Sa to tu li na sila e na lololo? ia na vaini, kei na lolo, kei na karaniti, kei na olive, e sa sega sara ni vuai; mai na siga o qo kaʼu na vakalougatataki kemudou.
20A SA baki yaco tale na vosa i Jiova me vakarua vei Akei e nai karuasagavulu ka va ni siga ni vula, ka vaka, 21Mo vosa vei Sirupapeli, na turaga ni Juta, ka kaya,
Au na vakayavalataki lomalagi kei vuravura; 22ia kaʼu na vukica nai tikotiko vakaturaga ni veimatanitu, ka vakarusa na kaukauwa ni veimatanitu e na veivanua; ka vukica na veivale-vodoki, kei ira e vodo kina: a ra na dui bale sobu na ose kei ira e vodo kina, na tamata yadua e nai seleiwau ni wekana. 23E na siga ko ya, sa kaya ko Jiova ni lewe vuqa, au na kauti iko, Sirupapeli na luve i Sialitieli, na noqu tamata, sa kaya ko Jiova, ia kaʼu na cakavi iko mo tautauvata kei na mama ni ligaqu: ni sai iko kaʼu sa digitaka, sa kaya ko Jiova ni lewe vuqa.
Currently Selected:
Ai Vola I Akei Na Parofita 2: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
