A Nonai Vola Na Dauvunau 3
3
Sa tawa dei nai valavala vakavuravura, 1-8; ia na cakacaka ni Kalou sa vinaka ka dei, 9-15. Sa tawa caka dodonu na tamata, ia na Kalou sa caka dodonu, 16, 17. Sa dodonu vua na tamata me kania na vinaka ni nona cakacaka, 18-22.
1SA dui vakagauna na ka kecega, ka sa dui vakasiga na ka kece sa caka e ruku ni lomalagi: 2sa tiko na siga me sucu kina, kei na siga me mate kina; na siga me ia na teitei, kei na siga me cavuta na ka sa tei; 3na siga me ia na veivakamatei, kei na siga me ia na veivakabulai; na siga me ia na basu vale, kei na siga me ia na tara vale; 4na siga ni tagi, kei na siga ni dredre; na siga me ia na yaso, kei na siga me ia na meke; 5na siga me tala vatu, kei na siga me vakasoqo vatu; na siga me ia na veimokoti, kei na siga me cegu ni veimokoti; 6na siga me rawai yau, kei na siga me yali nai yau; na siga me manini, kei na siga me dausoli ka; 7na siga mo ia na kadresudresu, kei na siga me ia na culacula; na siga me tiko lo, kei na siga me vosa; 8na siga me veilomani, kei na siga me veicati; na siga ni valu, kei na siga ni sautu.
9A cava na kena yaga vua sa daucakacaka na ka sa dauoca kina ko koya? 10Au sa raica oti na ocaoca, sa vota na Kalou vei ira na luve ni tamata me ra veiogai kina. 11Sa cakava na ka kece me matavinaka ga e na kena gauna: ia ka sa vakatikora ki lomadra na gauna ena tawa mudu, a sa sega kina na tamata sa kunea rawa na cakacaka sa cakava na Kalou mai na kenai vakatekivu ka yacova na kenai otioti. 12Au sa kila ni sa sega tale na vinaka e tu kina, a ya ga me reki na tamata, ka caka vinaka ni sa bula: 13ia me kana talega ka gunu na tamata yadua, ka kunea na vinaka ni nona cakacaka kecega, nai solisoli ni Kalou o qori. 14Au sa kila, na ka kece sa cakava na Kalou, ena tu ga ka tawa mudu: ena sega na ka me vakaikuritaki kina, ka sega na ka me kauti tani maikina: ia sa cakava o qori na Kalou, me ra rere na tamata e matana. 15Na ka sa tiko eliu sa tiko edaidai; kei na ka ena tiko maimuri sai koya ka tiko eliu; ia na Kalou ena taroga tale na ka sa oti yani.
16Ia kaʼu a raica e ruku ni siga na tikina ni veilewai, ni sa tiko kina na ka ca; na tikina talega ni caka dodonu, ni sa tiko kina na caka cala. 17Au a kaya e lomaqu, A Kalou ena lewai ira sa yalododonu kei na tamata ca: ni sa tiko na kena gauna maikea ni vakanananu kei na cakacaka kecega.
18Au a kaya e lomaqu e na vuku ni nodrai valavala na luve ni tamata, Me vakararamataki ira mada na Kalou, io, me ra raica rawa ni ra sa vaka na manumanu ko ira. 19Ni sa yacovi ira na luve ni tamata na ka sa yacova na manumanu; ni sa dua vata ga na ka sa yacovi ira: me vaka sa mate o qo, sa mate vaka talega kina ko ya; io, sa dua vata ga na kedra cegu; a sa sega ni uasivi cake na tamata e na manumanu: ni sa ka wale kecega. 20Era sa lako kece ki na yasana e dua bauga; era sa kuvu-ni-soso kecega, a ra sa suka tale kecega me kuvu-ni-soso. 21O cei sa kila na yalo ni tamata sa lako cake, kei na yalo ni manumanu sa lako sobu kivakaki vuravura? 220 koya o qo kaʼu sa kunea kina ni sa sega e dua na ka e yaga vua na tamata, ka me rekitaka ga na nona cakacaka; ni sai koya o qo na nonai votavota: ia ko cei beka me na kauti koya me raica na ka ena muri koya?
Currently Selected:
A Nonai Vola Na Dauvunau 3: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
