A Nonai Vola Na Dauvunau 2
2
A kena tawa yaga na muria nai valavala vakavuravura, 1-11. Sa vinaka na tamata vuku ka ca na sesewa, ia ka sa dua vata ga na ka sa dauyacovi rau, 12-19. Sa tawa yaga na cakacaka wale, ia ka sa yaga na ka sa solia na Kalou, 20-26.
1AU a kaya e lomaqu, O qo mada, kaʼu na vakatovolei iko e na rereki, ia mo ia mada ki na mamarau: ka, raica, o qo tale na ka walega. 2Au a kaya e na vuku ni dredre, Sa ka lialia: e na vuku ni rereki talega, A cava na betena?
3Au a qaqara e lomaqu, meʼu soli au mada ki na waini, (ia kaʼu sa lewa vakavuku tikoga na lomaqu;) ka meʼu taura nai valavala sesewa, meʼu kila mada se evei beka na kena vinaka dina ko ya mo nodra na luve ni tamata, mo ra kitaka e ruku ni lomalagi e na veisiga kecega ni nodra bula. 4Au a cakava e so na ka lelevu me noqu; au a tara na noqu veivale; au a tea na noqu veivainivaini: 5au a cakava na noqu veiwere kei na were kau vinaka, ia kaʼu a tea kina na kau vua kecega: 6au a cakava na noqu drano e so, me vakasuasuataki kina na veikau lalai sa tubu cake mai: 7au a rawata e so na noqu tagane kei na noqu vada, a sa sucu na luvedra e noqu vale me noqu tamata; au a taukena talega na karavau kei na sipi na ka levu, ka lailai na nodratou kecega eratou sa liu vei au e Jerusalemi: 8au a kumuna vata talega vei au na siliva kei na koula, kei nai vakacavacava maivei ira na tui, kei na veiqali: au a rawata na noqu tagane dausere kei na noqu alewa dausere, kei na ka era daumarautaka na luve ni tamata, ia na ka domo vinaka, ka vuqa na kenai valavala. 9Ia kaʼu a levu, ka uasivi cake vei iratou kecega eratou sa liu vei au e Jerusalemi: a sa tiko ga vei au na noqu vuku. 10Ia na ka kece sa domona na mataqu kaʼu a sega ni bureitaka kina, kaʼu a sega ni tarova na yaloqu mai na dua na ka e marautaki; ni sa daureki na yaloqu e na noqu cakacaka kecega: ia o qo ga na noqui votavota e na noqu cakacaka kecega. 11Au a qai sarava na cakacaka kecega ka sa cakava na ligaqu, kei na sagasaga kaʼu a sagati kina me rawa: ka, raica, sa ka wale kecega kei na ocaoca wale, ka sega na yagana e ruku ni siga.
12Ia kaʼu a qai gole meʼu raica nai valavala vuku, kei na ka lialia ka sesewa: ia ka cava tale me rawa vua na tamata sa na taravi koya na tui? sai koya ga sa caka oti eliu. 13Au a qai kunea ni sa sivia na lialia na vuku, me vaka na rarama sa sivia na butobuto. 14A matana na vuku sa toka e na uluna; ia ko koya sa lialia sa lako voli vakabutobuto: ia koi au kaʼu sa qai kila mai ni sa dua vata ga na ka sa yacovi ira kecega.
15Au a qai kaya e lomaqu, Me vaka na ka sa yacova na lialia, sai koya vata sa yacovi au talega; ia kaʼu a gu ni vuku mei cavai? Au a qai kaya e lomaqu, O qo talega na ka wale. 16Ni na tautauvata ni rau na tawa nanumi na vuku kei na lialia me tawa mudu; ka ni na guilecavi e na gauna maimuri na ka sa tu edaidai. Ia ka sa mate vakaevei ko koya sa vuku? me vakataki koya ga sa lialia. 17O koya kaʼu a cata kina na bula; e na vuku ni sa ca vei au na ka sa caka e ruku ni siga: ni sa ka wale kecega, kei na ocaoca wale. 18Io, kaʼu a cata na noqu cakacaka kecega kaʼu a oga kina e ruku ni siga: o na vuku niʼu na laiva vua na tamata ena taravi au. 19Ia ko cei e kila se na vuku ko koya se lialia? ia ena veitaliataka ga na noqu cakacaka kecega kaʼu a oca kina, ka cakacaka vakavuku kina o ruku ni siga. O qo talega na ka wale.
20O koya kaʼu a ia kina meʼu yalolailai taka na noqu cakacaka kecega kaʼu a oga kina e ruku ni siga: 21ni sa dua na tamata daucaka vakavuku, ka vakayalomatua, ka dodonu; ia ena laiva ga me nonai votavota na tamata sa sega ni oca kina. O qo tale na ka wale ka ca sara ga. 22Ia ka cava li me nona na tamata c na vuku ni nona cakacaka kecega, kei na ocaoca ni yalona, c na ka sa oga kina ko koya e ruku ni siga? 23ni sa ka rarawa na nona veisiga kece, ka ca na nona oca: io, sa sega ni cegu rawa na lomana kei na bogi. O qo tale na ka walega. 24Sa sega tale na ka e vinaka vua na tamata, me kana ga ka gunu, ka vakaceguya na yalona e na vinaka ni nona cakacaka. O qo tale kaʼu a kunea, ni sa mai vua na Kalou na ka o qori. 25Ia ko cei tale me tovolea, se ko cei tale me kusarawataka na ka vakaoqori, me sivi au? 26Ni sa dausolia na Kalou vua na tamata sa vinaka e matana na vuku, kei na yalomatua, kei na marau: ia ka sa vota vua nai valavala ca na oca, me kumuna ka binia vata, me mani solia vei koya sa vinaka vua na Kalou. O qo tale na ka walega kei na ocaoca wale.
Currently Selected:
A Nonai Vola Na Dauvunau 2: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
