Ai Vola I Amosi Na Parofita 7
7
Sa vakaraitaki vei Amosi na nodra cudruvi na Isireli, a sa tukuna vei ira na raivotu ni vodre, 1-3, kei na buka waqa, 4-6, kei na vatu i vakarau, 7-9. Sa tarovi koya ko Emasiya, a sa cudruvi kina, 10-17.
1SA ka vakaoqo e vakaraitaka vei au na Turaga ko Jiova; ka, raica, sa bulia na vodre ni sa qai vakatekivu me tubu na co emuri; ka, raica, sa kena co emuri o qo ni sa tamusuki oti na nona co na tui. 2A sa yaco, ni sa kania oti na co ni vanua, au a qai kaya,
Turaga Jiova, loloma mada mai, o cei ko Jekope, me na tu rawa? ni sa lailai ko koya. 3Sa veivutunitaka na ka o qo ko Jiova: Ena tawa yaco, sa kaya ko Jiova.
4SA ka vakaoqo e vakaraitaka vei au na Turaga ko Jiova: ka, raica, sa kaciva na Turaga ko Jiova, me ia na veilewai kaya e na buka, a sa katia na wasa levu, a sa kania e dua na tiki ni vanua. 5Au a qai kaya,
Turaga Jiova, mo kakua mada: o cei ko Jekope, me na tu rawa? ni sa lailai ko koya. 6Sa veivutunitaka na ka o qo ko Jiova: A ka o qo talega ena tawa yaco, sa kaya na Turaga ko Jiova.
7SA ka vakaoqo e vakaraitaka vei au ko koya: ka, raica, na Turaga sa wavu tu e na dela ni bai e tu vakadodonu, a sa dua na vatu i vakarau e na ligana. 8A sa kaya vei au ko Jiova, A cava ko sa raica, Amosi? Au a kaya, E dua na vatu i vakarau. Sa qai kaya na Turaga,
Raica, au na viritu e dua na vatu i vakarau e na kedra maliwa na noqu tamata na Isireli: au na sega sara ni vosoti ira tale: 9ia ena vakalalataki na veiyasana cecere nei Aisake, a veitikina tabu talega nei Isireli ena vakacacani; ia kaʼu na tu cake me vala kei na mataqali i Yaropiami o nai seleiwau.
10Sa qai talaki ko Emasiya na bete mai Peceli vei Yaropiami na tui Isireli, ka kaya, Sa bukia na kemu vere ko Amosi e na kedra maliwa na mataqali nei Isireli: sa tawa rawata na vanua na nona vosa kecega. 11Ni sa vosa vakaoqo ko Amosi, Ena mate e nai seleiwau ko Yaropiami, ia ko ira na Isireli era na kauti vakabobula tani sara e na nodra vanua.
12A sa kaya ko Emasiya vei Amosi, Na rairai, mo laʼki dro ki na vanua ko Juta, ka kana madrai maikea, maikea talega mo ia kina na parofisai: 13ia e Peceli, kakua ni ko ia tale kina na parofisai: ni sa nona koro tabu na tui, kei na bure levu ni nona matanitu.
14Sa qai vosa ko Amosi, ka kaya vei Emasiya, Sa sega na parofita koi au, au sa sega talega ni luvena e dua na parofita; ai vakatawa ni sipi ga koi au, kei na dausamaki lolo: 15a sa kauti au ko Jiova niʼu sa muria na sipi, a sa kaya vei au ko Jiova, Mo laʼki parofisai vei ira na noqu tamata na Isireli. 16Ia o qo, mo rogoca na vosa i Jiova; O sa kaya, Kakua ni ko parofisaitaka na kedra na Isireli, kakua talega ni ko vakatauca na kedra na mataqali nei Aisake. 17O koya o qo sa vosa vakaoqo kina ko Jiova;
A watimu, ena ia na dauyatagane e na koro, a luvemu tagane talega kei na luvemu alewa, era na bale e nai seleiwau, a nomu vanua talega, ena votai ni sa vakarauti e na dali; ia ko iko, ko na mate e na vanua dukadukali: o ira talega na Isireli, era na kauti vakabobula tani sara e na nodra vanua.
Currently Selected:
Ai Vola I Amosi Na Parofita 7: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
