Ai Vola I Amosi Na Parofita 5
5
Sa lelevaki ira na Isireli ko Amosi, 1-3. Sa vakaroti ira me veivutuni, 4-17. Sa tukuna na siga i Jiova me, ka rerevaki, 18-20. Ena cata ga na Kalou na cakacaka vakailasu vua, 21-27.
1DOU rogoca na vosa o qo kaʼu sa taurivaka, io, na kemudou lele, na mataqali nai Isireli. 2Sa bale, ena sega ni tu cake tale, na gonealewa ko Isireli: sa biu laivi tu e nona vanua, sa sega e dua me vakaduri koya cake. 3Ni sa vosa vakaoqo na Turaga ko Jiova; A koro ka daulako maikina e lewe udolu, ena vo ga e dua na drau, kei na koro o daulewe drau ka lako maikina, ena vo ga e tini, ki na mataqali nei Isireli.
4Ni sa vosa vakaoqo ko Jiova ki na mataqali nei Isireli, Dou vakasaqarai au, mo dou bula kina: 5ia kakua ni dou vakasaqarai Peceli, ia ko Kilikali, kakua ni dou curu kina, o Pieri-sepa talega, dou kakua ni lako kina: io, ko Kilikali, ena kauti vakabobula tani; kei Peceli, ena yaco me ka sa sega wale. 6Dou vakasaqarai Jiova, mo dou bula; de kida ko koya me vaka na buka ki na mataqali i Josefa, ka katia, ka sega e dua mai Peceli me bokoca.
7Oi kemudou sa vukica na lewa dodonu me kau gaga, ia nai valavala dodonu dou sa vakalaiva no ga e na qele, 8dou vakasaqarai koya ka buli Arikituro kei Oreoni, a sa vukica na yaloyalo ni mate me mataka, ia na siga sa cakava ko koya me bogi butobuto: a sa kaciva na wai ni wasawasa, ka sovaraka ki na dela i vuravura: o Jiova na yacana: 9o koya sa vagumatuataki koya e vakacacani vua na qaqa, io, ko koya sa vakacacani me na laki kaba na koro kaukauwa.
10Era cati koya sa ia na veivunauci e na matamata-ni-koro, ka vakasisilataki koya sa vosa dodonu. 11Ia e na vuku ni dou sa buturaki koya sa kaisi, ka tara mai vua nai kaukau sila: dou a tara na veivale e na vatu e ta, ia dou na sega ga ni tiko kina; dou a tea na veivainivaini domoni, ia dou na sega ga ni gunuva na kena waini. 12Niʼu sa kila na nomudou talaidredre vakavuqa, kei na nomudoui valavala ca e kaukauwa: ia era sa vakararawataka na yalododonu, ka tara na tautauri, kei ira na dravudravua era sa vakatala tani mai na matamata-ni-koro.
13Ia ko koya sa yalomatua e na gauna ko ya ena tiko lo ga, ni sa gauna ca. 14Dou vakasaqara na ka e vinaka, ka sega ni ka e ca, mo dou bula: ena qai tiko vata vakakina kei kemudou ko Jiova, na Kalou ni lewe vuqa, me vaka dou a kaya. 15Dou cata na ka e ca, ka vinakata na ka e vinaka, ka vakadeitaka na lewa dodonu e na matamata-ni-koro: ena qai yalololoma beka ko Jiova na Kalou ni lewe vuqa ki na kena vo ni Josefa.
16O koya o qo sa vosa vakaoqo kina ko Jiova, na Kalou ni lewe vuqa, na Turaga; E nai saqata ni koro kecega ena ia na tagi; e na salatu kece talega era na vakauleule, a ra na kaciva nai vakatau-ni-were me tagi, kei ira sa vuku e na tagi me tagi yaso. 17E na veivainivaini kece talega ena ia na tagi: niʼu na lako voli yani e tikimu.
18E CA vei kemudou sa domona na siga i Jiova! e vaka tale evei na yagana vei kemudou? a siga i Jiova sa butobuto, ka sega ni rarama. 19Sa vaka na tamata sa drotaka na laioni, a sa tavaki koya e dua na pera; se curu ki vale, ka ravita na lalaga e na ligana, a sa kati koya na gata. 20Me na tawa butobuto li na siga i Jiova, ka sega ni rarama? io, me butobuto sara ga, ka sega na rarama e tu kina?
21Au sa cata, au sa vakasisilataka na nomudou solevu, au na sega talega ni boivinakata na nomudoui soqosoqo tabu. 22Ni dou vakacabora vei au nai soro kama kei na nomudoui madrali laukana, au na tawa vinakata: ia nai soro, ni veivinakati, na nomudou manumanu uro, au na tawa vakadonuya. 23Kauta tani vei au na domo ni nomu meke; ia na domo ni nomu api kaʼu sa bese ni rogoca. 24Ia me dave yani me vaka na wai na lewa dodonu, kei nai valavala dodonu me vaka na uciwai kaukauwa. 25Nai soro kei nai madrali, dou a vakacabora li vei Au e na veikau ka yabaki vasagavulu, oi kemudou na mataqali nei Isireli? 26Ia dou a colata ga na vale ni nomudou Moloki kei Kiyuni na nomudou matakau, na kalokalo ni nomudou kalou, a ya dou a cakava me nomudou. 27O koya o qo kaʼu na vakauti kemudou tani kina ki na daku i Tamasiko, sa kaya ko Jiova, sa Kalou ni lewe vuqa na yacana.
Currently Selected:
Ai Vola I Amosi Na Parofita 5: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
